A thar bak si, Kawl ralkap le AA nih Chinram Paletwa ah mi an thah ning video hi zoh ngam si lo. Celh ding si ti lo (Video)

A faktuk hrinhrang ko ee!! Mi an thah ning a faktuk ee!! celh ding si lo. Video hi a tangah a um lai. Video nazoh hlan ah mah ca hi nunrel hmasa law,CNA nih AA hna hi a kah ahau cang ti na fiang tuk cang lai…….Chin miphun nih Kawl pennak cu kan duhlo caah 88 in Sianghlei kai nih hriamnam he avoi thumnak dothlennak an tuah i nihin ahcun kum 32 a kal cang. Hi kum 32 chung ahhin CNA nih Chin miphun caah a hmuitinh a kheng rihlo i lam canceu hmanh a kal rihlo. Cu lakah a doh mi Kawl uktu hna pinah kan ram chuh le lakpiak a kan timtu Arakan Army cu an hun chuak hoi. Hizawn ahhin Arakan Army cu kanmah bantuk in Kawl uktu a do vemi ansi caah AA hi kan doh ding an silo a timi le AA nih kan Pupa ram Paletwah chuh a kan timhlo tiah a chimmi nanum len caah “Zeiruangah AA khi Kham kan herh” timi ka hun langhter lai.

1. AA timi Arakan Army cu Arakan Liberation Army ALA timi nih Arakan/Rakhaing/Yakhaing ram le mipi duhmi le chunmang a tlinh tilo caah 2009 in tulio an Bawizik Htun Mrat Naing le a hawi 20 nih KIA bawmhnak in KIA hmunpi ah an dirhmi asi. An hmuitinh cu Kawl miphun nih kum zabuu 17 lio i an rak tei hna i an hrawh cangmi Arakan Siangpahrang penram (Arakan Kingdom) kha a luat mi Arakan ram ah ser asi. Phundang in kanchim ahcun Arakan/Rakhaing/Yakhaing zalennak (Independent) serchuah ding an i timh. Cu an hmuitinh mi ahcun Arakan miphun (Arakanese) umnak le hlan i an ram asimi paoh kha lakdih than kha asi. Cu chunmang cu AA nih an mipi sinah biatak tein an hun phuan tikah Arakan mipi lung a lut tuk i mipi nih an dirpi colh hna. Paletwah khi Chin miphun asi mi Khumi/Khami/Sami hrinphun an umnak ram asi nain 1824 Mirang nih Arakan ramthen le Bangal rili kiangkap a lak hlan le a lak hnu 1970 tiang cu Arakan ramthen ah an um. U Naywin Cozah a kai hnu 1970 pinlei Chin ramthen hun sersiam hnu longah Paletwah cu Chin miphun umnak asi caah Chin ram ah chiah a hun si. Hiti kachim tikah Paletwah khi Chin ram asilo ka ti duhnak silo in tuanbia sining ka langhter mi asi. Curuang ahcun AA long silo in Arakan upa le mipi nih Paletwah khi kan ram asi tiah an chim theo nak le tulio AA nih raltha ngai le hnangam ngai in Paletwah in dothlennak an tuah ngamh mikhi asi.

2. Tulio Paletwah ramchung ahkhin Chin miphun le Arakan miphun tiah miphun pahnih cawh in um asi nain le mi tam u cu Chin miphun ansi ko nain Paletwah i mirum le khuasa kho deuh paoh le Uktu nawlngeitu paoh cu Arakan miphun ansi. Cucahcun an milu in Chin miphun tamdeuh ko hna hmanhseh law nawl ngeitu le thil tikho deuh paoh Arakan miphun ansi tikah Paletwah ram nawlngeihnak cu Arakan minung hna kut ah aum tiah chimkhawh asi. Curuang ahcun AA nih Paletwah in dothlennak ral an thawh tikah teinak le himnak an hmuh khi asi.
3. Arakan ram khi a zalenmi ram silo ah Wah pawl bang Confederate state in ser kho hna sehlaw tlang lam in ramdang he pehtlaihnak ding ah Paletwah in Bangladesh le India he pehtlaih asi lai caah khikhi ramleng pehtlaihnak kutka pi asi.

Cu tikah Paletwah khi hrial tak le kaltak awk thalo in AA le Arakan mipi nih an duh i an tumtah. Cupinah Hriamnam lak dothlennak tuahnak le ralkap hmun sernak ca ding ah anmah Arakan ramchung nakin Paletwah ram cu let 100 in a thatdeuh le a himdeuh caah AA nih Paletwah chuahtak cu an siang nemmam lailo. Cucahcun AA le Arakan mipi nih Paletwah laknak cading ahcun thluak phunphun an chuah i an mirum pawl le mifim pawl hna nih khuachung nawl ngeihnak le mipi teikhawhnak lam an vih. Khatlei in AA he i bawm in Dothlennak lamthluan ah Chin mipi kha thihphaihnak he lemsoinak he a phunphun in an tuah hna. Cu nihcun Paletwah ramchung ummi Chin mipi lungthin kha a vaivuanh i Arakan duhnak le tihzahnak in an um. Paletwah um Chin mipi kha an duhnak le an hmuitinh mi lamthluan ah heh tiah an hruai hna.

Khatlei in Kawl ralkap he an i kah pah in Paletwah cu Kawl ralkap kut in AA nih kan lak khawh i kan mah penram ah kan chiah khawh timi phichuak khi an kawl i an tuan cuahmah. Hiti ning tein an kal ahcun a rauh hlan ah Paletwah ram ummi Chin mipi nih Arakan mipi le AA cungah tihzahnak a um lai i khatlei in AA nih Paletwah ram khi anmah humhak mi (control area) ah Kawl ralkap kut in an lak/ser lai i foi tein Paletwah cu kanmah ta asi tiah thanh le phuan haulo in an kut ah a kai lai. Cutik ah Chin miphun nih Kawl ral kan dohmi pinah Paletwah lakthannak ding caah Paletwah ramchung ummi Chin miphun pawl lemsoi nak, AA le Arakan mipi dohnak he ral thum ral li in kan doh a hau can a phan telai. Cu tin kan hauh ahcun tulio ralkhat doh hmanh ah Meithal puah a ngamh lomi nihhin ral thum ral li doh cu kan ngamh chinchin lai maw? Kawl le Arakan nih an kan velh le an kan thah hmanh ah a lehrul ngam lo mi nih an phunhnih karlak ah zeitin dah kan doh hnalai?

Cucahcun tulio te i Paletwah ram um Chin mipi nih CNA le hmundang ummi Chin unau hna cungah bochannak le zumhngamh nak an ngeihlio te ah Paletwah khi kan kilven i kan humhak lo ahcun can le sining nih a kan hngak lailo i Thim tein vih ah a pemding kha Hreithlung in a seih in seih a haumi sinak ah kan phan lai. AA nih Kawl ralkap a doh ve ruangah kan unau tangti khat kansi tiah ruat hlah. Arakan pawl cu ALA chan tein meithal zunkhat duh ah an mah bang dothlennak a tuah vemi CNA cungah lamhruang ah in a rak kap lengmang tu ansi khih. Anmah adirhtu le a bawmtu bik KIA hmanh AA lubik Htu Mrat Naing nih timhmi huaha ngeilo dothlentu tiah 2019 TV interview lioah fak piin a phomh tu hna ansi khi. Umnak le tirawl a pe ciami a god father KIA cungah zeirello in Laiza i KIO/A officer hna hmanh fak piin a phomh tu le a velh ngam tu ansi khi. Chin mi kan lungfim a cucang. Ref- Pen Hlawnceu

VIDEO

Be the first to comment on "A thar bak si, Kawl ralkap le AA nih Chinram Paletwa ah mi an thah ning video hi zoh ngam si lo. Celh ding si ti lo (Video)"

Leave a comment

Your email address will not be published.


*