Chinmi nih kan ngei mi Surbung Airport kong ah hna a ngam kho bak lo mi

Chinmi caah thawngtha tuk mi pakhat cu June ni 25 in 27 tiang Chin State, Falam Township ah um mi Surbung Airport zohfelnak (flight Test/check) ngei mi kha a si. Chin State Municipal Minister U So Htat nih a chim ning ah cun, “Vanlawng hi airport ah cun a ttum lo.

Airport cung feet 1500, 1000, 800 sangah chak le thlang ah a zuang i, thli a hramning/kal ning zohfelnak  le control tower rian ttuan ning le Airport chungah machine hna zeidah a law tiah check a tuah tiah a chim. Mah bantuk in Chinmi nih thawngpang tha kan thei lio ah, mah Airport hi Chinmi nih pehzultein kan hmang khawh lai maw ti cu bia le hla a tam ngai. A ruang cu

Kawlram cozah nih a zohkhen mi Myanmar National Airline (MNA) cu a luancia kum 2019-2019 budget chungah Kyat billion 13 leng an sung cang tiah Union Level Parliament tangka zohfeltu nih an chim tiah Eleven Media nih ni 5. June. 2020 ah a tial. MNA hi cozah Air Service a si i, Cozah zohkhennak tangah um mi a si. Tangka a luh mi le a chuak mi budget zong fel tein atuah mi an si

Kum 2014 thawk in MNA nih kum fatin tangka a sung peng i, Kum 2018 thla 6 budget year chungah Kyat billion 3.7 an sung. Myanmar National Airline nih hin rian ttuantu lakha a pek i, budget an mah nih nih an ser bantuk in rian a ttuan mi an si, natein kum 3 chungah tangka an sung mi/deficit ning cu- 2015 -16 budget kum ah 8.962 billion kyats. 2016-17 budget kum ah 5.695 billion kyats. 2017-18 budet kum ah 3.401 billion kyats a si.

2018 thla 6 budget year ah khan kyat millions- 74376 lawng a lut i, a hmang mi dihlak cu kyat millions- 78087 leng a si. A sungmi a tam tuk tinak a si Kum- 2018-19 chungah tangka a hmuh mi dihlak cu Kyat millions- 185199.72 a si. A hmang mi dihlak hi Kyat million- 198923.91 leng a si fawn. A sung mi cu Kyat million- 13724.19 a si. Mah hi kum 5 chungah a sung tambik record a si.

Mah bantuk a si ah cun, Chinram chungah hin Private Air maw si lai, cozah Air nih service a kan tuah piak lai ti tu tiang zeihman fiangtein thei ding a um lo. Airport cu kan ngei cang. Service lei ah buainak fakpi a um khoh. Cozah Air a si ah cun Cozah nih tangka tampi a sung lai tinak a si. Mah bantuk in tangka tampi sung ding in kawl cozah nih Chinram chungah vanlawng hi a zuangter duh lai maw ti bia halnak pakhat a um. Cun Private Company pawl ta a si ah cun a man a fak tuk lai i, Chinmi nih kan nih cit khoh lai maw ti bia halnak a um fawn.

Atachunnak ah Mizoram nih vanlawng (Airport) pakhat an ngei ve. Mah an ngei mi hi mipi nih an hmang tangkai pi ngai. Ni fatin a zuang mi an um i, A caan ah cun ticket a nga lo mi hman an um tawn. Mah bantuk in mipi lei nih an hmang tangkai ngai mi kha Comapnay lei nih service kan duh ti lo, kan sungtuk an ti. Service an nih tim ti lo. Mizoram cozah le India cozah tahtein biaruahnak an ngei hnuah Mizoram ah company pakhat cu a service tthan.

Mah bantuk in a si ah cun Chinram nih Vanlawng kan ngei mi Surbung Airport hi mipi nih kan hmang tangkai pi kho tak tak lai maw ti kha bia halnak tampi a um. cucaah tu vanlawng Ground kan ngei mi hi kan hmang tangkai pi khawhnak ding caah lam a um mi pakhat cu politic hi a si. Union lei ah cozah sertu kha Chinram chunga cozah sertu an si ve lo ah cun buainak tampi a um khawh mi a si.

Surbung airport hi NLD ruangah tlamtling khawh mi asi caah mipi nih kan hmang tangkai khawhnak ding ah cun NLD hi kan her ri ko. Thazang kanpek a hau rih ko tinak a si. Mah hi Eleven Media nih ni 5 ah kawlram cozah nih a zohkhen mi vanlawng kongah cozah nih a sung mi kong a vun ttial mi hmangin tu Surbung vanlawng  Ground kong he ka hmuh ning ka vun ttial mi a si. By- Chinpage Editor

Note: Ka thawngpang (tadin) ttial a rel mi vialte cungah lunglawmnak tampi ka ngei. Ka thawngpang ttialmi nan kan rel piak ruangah keimah zong tangka ka hmuh ve i, chungkhar zong ka zohkhen kho ve hna. Nangmah nih thawngin chungkhar ka zohkhen khawh ve ti ka thei caah thawngpang a dik lo mi ttial ka duh lo i ka tim lo. Hoax/Rumor/Fake ti bantuk hi ttial ka tim lo.

Thawngpang ka rel mi le mi dang nih an ttial mi credit ka pek mi hna hi source a hman mi a si maw ti ka zoh hnuah mah hi cu a hman mi a si lai tiah ka ti mi hna hi ka miphun a si mi “Chinmi” caah ka ttial tawn i ka credit tawn. Natein vawlei cung cu tlamtlinglonak ram a si caah ralrin tein ka ttial zong ah Source ka lak mi ah a hman lo mi a um kho mi a si.

Source ka lak mi, a hman lo mi a um ti nan theih ah cun zeitik caan poah ka theihterh kho ulaw, cun keimah ca zong ah ralrinnak a ka pektuk a si hlei ah ka source kha thatein ka zoh nak ding a si lai caah le  thawngpang a hman mi le dik mi lawng ka thla peng khawhnak ding caah tiin zaangfah kan nih hal hna-Chingpage Editor

Be the first to comment on "Chinmi nih kan ngei mi Surbung Airport kong ah hna a ngam kho bak lo mi"

Leave a comment

Your email address will not be published.


*