Coronavirus ruangah thlacamnak ni (15); President Trump nih bia a chim mi cu a tha tuk hrinhrang. Zumtu tampi a thawnterhna

Donald Trump USA President a rak si mi hi cu USA mipi caah zeibantuk in dah a sunglawi i thlachua a si ti cu a lang chin lengmang cang ko hi. President Trump nih a chim mi cu, “Nan President ka si bantuk in, nan za sin ah Pathian sin ah thlacam ding in kan sawm hna, American mipi le himtein kan um khawhnak caah le Pathian caah zeihman thil ngan tuk mi amah nih a tuah khawh lo mi a um lo” tiin America mipi hna cu Pathian sin ah thlacam ding in a sawm hna. As your President, I ask you to pray for the health and well-being of your fellow Americans and to remember that no problem is too big for God to handle.”

USA hi atu hi a buai ngai i, a thimi hna hi minung 47 an phan cang i, zawtnak a ngeih mi hna hi 2500 hrawng an phan cang. State 49 ah mah zawtnak hi a phan cang i, State tampi ah State of emergency phuan a si cang. Mah bantuk dirhmun an phan caan caah le atu tiang mah zawtnak sii an serh khawh lo caah Pathian sin ah fakpi in zumtu nih thla kan cam a herh tuk mi a si.  Mah zawtnak ruangah vawlei mikip nih harnak kan tawn lio a si. Mirum zong mi sifak zong nih harnak kan tawn dih. Cucaah zumtu Pathian a bochan mi nih cun Pathian sin ah fakpi in thla kan cam a herh ngai mi a si.

President Trump hi Pathian aa bochanmi hruaitu pakhat a si ti fiang tein hmuh khawh asi. President nih zeiruangah dah Pathian sinah thla kan cam lai ti ah cun COVID-19 zawtnak in Americans mipi cu a kan kal tak khawhnak  hnga caah a si. Thaizing Sunday March 15,2020 cu American mipi nih Pathian sinah thla kan cam hna lai. Pathian sinah umpi nak le runvennak, thawnnak thazaang kan hmuh than khawhnak lai kan umnak hmun cio in thla kan cam hna lai tiah US ramchung ah thawngthanhnak a tuah cang.

President Trump nih hin minung fimnak cu zeihmanh santlaihnak a ngei ti lo ti fiang tein a hngalh cang. Coronavirus cu fawi tukin US nih cun tei khawh ding in an I ruah. Nain nihin tiangah sii an ser kho ti lo. Pathian lawng lawng hi a kan khamh khotu a si ti President nih aa fiang tuk. Cu caah ramchung ah Thlacamnak NI a phuan hi asi. Nihin tiangah zawtnak ruangah minung 40 an thi i minung 1701 nih zawtnak hrik an kai cang. Uar a um kho tak tak. President nih hin a tu lawng hi Pathian sinah thlacamnak NI timi a phuang lo. May 3, 2018 zong kha Rampi thlacamnak NI ah a rak phuang cang.

Cu lio ah President nih zeiruangah dah Pathian sinah thla kan cam lai timi cu hitihin a rak chim, Thlacamnak cu kannun lam a kan hruaitu, kan thazaang le fimnak hrampi a si. Thlacamnak nih cun hnangamnak, ruahchannak le daihnak a kan pek. Cu nih cun America minung ngakchia bikin upa bik tiang a kan huhphen. Cu caah kan ram nih hmailei ding tein a kal khawhnak hnga Bawipa hmai kawl ko hna u sih. Cu kan Pathian cu sifahnak, lungretheihnak le ral kutchungin luatnak a kan petu le a kan cawisang tu a si. Kan ram le miphun nih Pathian dawtnak, a vel le kan cungah a thatnak hi philh hrim hrim hlah u si.

Vawleicung ram hna lakah cungcuangin a kan cawisangtu kan biakmi Pathian cungah lunglawmhnak biachim dingin ramchung mipi kan dihlak thlacam hna u sih. May 3 cu National Day of Prayer hi upat hna u sihlaw, Zeitik caan poh ah America caah thlacam hna u sih. Donald Trump US President a si hnu in a tuahmi thil vialte lakah a tha bikmi cu America nih thluachuahnak a hmuhnak hnga ding caah Pathian sin thlacamnak le lawmhnak bia chimnak Ni a sermi hi a si.

 

Be the first to comment on "Coronavirus ruangah thlacamnak ni (15); President Trump nih bia a chim mi cu a tha tuk hrinhrang. Zumtu tampi a thawnterhna"

Leave a comment

Your email address will not be published.


*