Mindat Mipi an Lungrethei Kahdaihnak Tuah Ko hmanhnaselaw Mindat Khua Pawngah Ralkap Tam Ngai an Phan Than

April 28, tuchun ah Mindat kahdohnak ah a thimi ralkap hna cu an ruak vuinak tuah a si. Kahdaihnak tuah a si ko nain a thimi hna ruakvuinak a dih hnuah tihnungmi dirhmun kan phan kho tiah CDF-Mindat hruaitu Ko Salai (Min hleng) nih cun a chim.

Mindat khuapi ah lam a zawhmi mino 7 ralkap nih an tlaih hna ruangah April 24,26 le 27 ah CDF-Mindat le ralkap karah kahnak a chuakmi a si.

“Nizan ah an tlaihmi mino 7 cu an thlah than hna. Kanmah lei zongin meng 27 ah a ummi CDF nih an khammi Matupi i ralbawi (biuhahmu) le mawtaw pathum cu kah loin lam kan onh piak ve hna. Ralbawi pa cu a zan lila ah Pakokku ah a lan colh.

Meng 27 ah a thimi hna ruak cu nizan kha an vun phorh i tuni ah an vui hna. An vui khawh in anmah lei in zeidah a ra lai ti theih a si lo. Nizan ah khan bawmtu ralkap mawtaw 10 a phan” tiah Ko Salai nih a chim.

April 27 chun kha zinglei 9:30 am in zanlei 3:00 pm tiang an i kap i ralkap lei nih hriamnam ngan zong an hman. Mindat khuapi he meng khat le cheu aa hlatnak tiang an rak ra kho nain Matupi biuhahmu kha an karceh khawh caah ralkap lei nih biaruahnak ngeih in kahdaihnak tuah dingah an halmi a si.

“Hriamnam ngan aa telmi mawtaw cu Mindat he meng khat le cheu aa hlatnak ah a um ko. Zan i a phanmi bawmtu ralkap hna zong Kyauk Htoh ah an um ko.

Kahdaihnak kan tuah ko nain thinphan dai lo dirhmun kan si ko” tiah Ko Salai nih a chim.

Atu tiang a phanmi ralkap hna hi cu CDF-Mindat nih kham khawhnak thazaang an ngei. Bawmtu ralkap dang an rat khawh ti lonak dingah khua dang nih rak kan kham piak ve hna u tiah CDF-Mindat nih an ti.

“An ra ti nan theih bak in nan kan bawmh can ah lam phih in rak kham hna u ti kan duh. Zei a si hmanh ah dohdalnak kan hlawhtling deng cang, rampi huap in do cio hna usih ti kan duh” tiah Ko Salai nih a chim.

Mindat ah bawmtu ralkap an rat khawhnak ding lam cu Monywa-Pakokku-Mindat, cun Pagan-Seihphyo-Kasonmah-Saw-Mindat le Kalay-Gangaw-Mindat hna an si.

Mahti a si ruangah Mindat khuami hna cu lungrethei le thinphang in an um. Khua lengah siseh khua chungah siseh CDF-Mindat nih tha tein runvennak an tuah dih i ralring tein an um ve tiah theih a si.Credit-TCP

Be the first to comment on "Mindat Mipi an Lungrethei Kahdaihnak Tuah Ko hmanhnaselaw Mindat Khua Pawngah Ralkap Tam Ngai an Phan Than"

Leave a comment

Your email address will not be published.


*