Nihin Hakha lei thawngchia kan thei mi 5 hna. A poi chin lengmang ko

Hakha Khuathar ah Pu Tuan Ceu Fale Pahnih Ralkap nih an Tlaih Hna. Tu zaan sml. 9:00 hrawng ah Hakha Khuathar, Thantlang lei kalnak lam ah a ummi Pu Tuan Ceu i a fale mino pahnih ralkap nih an tlaih hna, tiah thawng kan theih.

Tlaih a tongmi Pu Tuan Ceu fale pahnih hi Zo Thang le Tluang Thang an si. Kawlmi hna an umnak Shwe Man Thu dawrkhaan ralkap nih an bauh hnu ah inncung ah a ummi Pu Tuan Ceu fale pahnih an tlaih hna hi a si. Zei ruang ah dah an tlaih hna timi fiang in theih a si lo. The Chin Journal

Hakha ah Ralkap le Palek nih tlaih i hrem mi pakhat cu an thlah hnu ah a nunnak a liam Hakha ah Ralkap le Palek nih March thla dih lei i minung 5 an rak tlaih mi chung ah aa tel mi Yangon khuami pakhat cu, an tlaih hna lio ah an hrem hna, thlah an si hnu ah sii-inn a phan i voi hnih tiang aa thlop hnu April 13 zaan ah a nunnak a Liam.

A thi mi pa hi Shalom Guesthouse ah rian a rak tuan mi a si i amah hi pawfah zawtnak a ngei mi a si. Tutan a thi mi hi Kawl panga le Tedim pakhat an rak tlaih hna lio ah aa tel ve mi a si. Tlaih an ton i thlah than an si hnu in minung pathum zong an hrem hna ning a fah ca ah rian an tuan kho ti lo.

A nunnak a liam mi pa hi, sii-inn ah voi hnih tiang aa thlop i a dam khawh ti lo ca ah a nunnak a Liam hi a si tiah thawng kan theih. A ruak cu April 14, Hakha ah vui a si lai tiah kan theih. Biakilh: Thawngpang fiang deuh in kan rak thanh than lai. Credit-The Hakha Time#DVD

Hakha Khuathar ah Ralkap nih Inn an Bauh Than. Tu zaan sml. 8:50 hrawng ah Hakha Khuathar ah ralkap nih inn pakhat an bauhpiak tthan hna, tiah thawng kan theih. Thlantlang lei kalnak lamkam i Kawlmi ngeihmi Shwe Man Thu dawr ngei hna inn an bauh hi a si.


“Inn an bauhpiak hna tlawmpal ah inn ngeitu an rak chuak i bia an i ruah. Minung an tlaihmi cu an um lo. Asinain, thil an lak le lak lo kan thei lo,” tiah khuami pakhat nih a chim. The Chin Journal

Hakha ah Ralkap nih William Bawi Lian Hup an Tlaih. Nihin chun ah ralkap le palik nih Hakha ah William Bawi Lian Hup an tlaih, tiah thawng kan theih. William an tlaih dih in Hakha Khuathar i an inn zong ralkap nih an bauh i, kawlhawlnak an tuah.

“Ralkap pawl nih plastic anakmi pakhat in thilri an kalpi,” tiah inn an bauh lio a hmutu minung pakhat nih a chim. William an tlaih lio ah hin a hawipa pakhat zong an tlaih ve tiah chungkhar nih an chim. Asinain, William he an tlaihmi a hawipa hi aho a si timi fiang in kan thei rih lo. The Chin Journal

Ralkap nih Hakha Khuathar ah Inn Pakhat an Bauh. Nihin chun sml. 11:00 hrawng ah ralkap le palik tampi Hakha Khuathar, Ral Er Lam ah inn pakhat an bauh hnu ah a chung ah kawlhawlnak an tuah len, tiah kan theih.

Inn an bauh lio ah inn ngeitu an um lo. Zei ruang ah dah an bauh timi zong theihfian a si lo. A mit in a hmutu khuami pakhat nih, “Ralkap nih plastic anakmi pakhat in thilri an kalpimi a um,” tiah a chim. The Chin Journal

Be the first to comment on "Nihin Hakha lei thawngchia kan thei mi 5 hna. A poi chin lengmang ko"

Leave a comment

Your email address will not be published.


*