President Trump thawngthangnak a tuah ruangah Khrihfa pawl an nih lawm i zum lotu nih fakpi in an soisel

President Trump hi Pathian zumtuk mi le a bochantuk mi a si caah mah bantuk in mipi sin ah thawngthangnak a tuah mi kong ah zum lotu nih fakpi in an soisel mi hi cu zumlotu an si caah fakpi in lak ding a si lo. President Trump hi Pathian aa bochanmi hruaitu pakhat a si ti fiang tein hmuh khawh asi. President nih zeiruangah dah Pathian sinah thla kan cam lai ti ah cun COVID-19 zawtnak in Americans mipi cu a kan kal tak khawhnak  hnga caah a si. Thaizing Sunday March 15,2020 cu American mipi nih Pathian sinah thla kan cam hna lai. Pathian sinah umpi nak le runvennak, thawnnak thazaang kan hmuh than khawhnak lai kan umnak hmun cio in thla kan cam hna lai tiah US ramchung ah thawngthanhnak a tuah cang.

President Trump nih hin minung fimnak cu zeihmanh santlaihnak a ngei ti lo ti fiang tein a hngalh cang. Coronavirus cu fawi tukin US nih cun tei khawh ding in an I ruah. Nain nihin tiangah sii an ser kho ti lo. Pathian lawng lawng hi a kan khamh khotu a si ti President nih aa fiang tuk. Cu caah ramchung ah Thlacamnak NI a phuan hi asi. Nihin tiangah zawtnak ruangah minung 40 an thi i minung 1701 nih zawtnak hrik an kai cang. Uar a um kho tak tak. President nih hin a tu lawng hi Pathian sinah thlacamnak NI timi a phuang lo. May 3, 2018 zong kha Rampi thlacamnak NI ah a rak phuang cang.

Cu lio ah President nih zeiruangah dah Pathian sinah thla kan cam lai timi cu hitihin a rak chim, Thlacamnak cu kannun lam a kan hruaitu, kan thazaang le fimnak hrampi a si. Thlacamnak nih cun hnangamnak, ruahchannak le daihnak a kan pek. Cu nih cun America minung ngakchia bikin upa bik tiang a kan huhphen. Cu caah kan ram nih hmailei ding tein a kal khawhnak hnga Bawipa hmai kawl ko hna u sih. Cu kan Pathian cu sifahnak, lungretheihnak le ral kutchungin luatnak a kan petu le a kan cawisang tu a si. Kan ram le miphun nih Pathian dawtnak, a vel le kan cungah a thatnak hi philh hrim hrim hlah u si.

Vawleicung ram hna lakah cungcuangin a kan cawisangtu kan biakmi Pathian cungah lunglawmhnak biachim dingin ramchung mipi kan dihlak thlacam hna u sih. May 3 cu National Day of Prayer hi upat hna u sihlaw, Zeitik caan poh ah America caah thlacam hna u sih. Donald Trump US President a si hnu in a tuahmi thil vialte lakah a tha bikmi cu America nih thluachuahnak a hmuhnak hnga ding caah Pathian sin thlacamnak le lawmhnak bia chimnak Ni a sermi hi a si.

COVID-19 zawtnak ruang ah Carson siangbawinu Laura ruh Hakha ah tlunpi khawh a si rih lo:- Chinram ah Missionary hmasa bik Carson nupi siangbawinu Laura ruh cu an pa Carson thlaan pawng ah vui ve ding in timhtuah a si nain COVID-19 ruang ah a nicaan thawn a si, tiah tuanvo ngeitu sin in March 11 ah kan theih.

“Siangbawinu Laura ruh Hakha ah vui ve ding hi kan hnulei an tuufale Hakha an rak tlawn ah khua an khaan mi a si. A ruah awk hmanh kan hngalh lo mi an tuufale nih an ruah khawh tik ah kan i lawm i a herh ning in tuanvo laakpi ding kan lungtling. US Cozah sin ah ca zong tial in nawlpek zong a si cang. A ruh zong phurh ding ah ready a si cang. Kanmah ruahnak ahcun April le May thla chung ah hin kan rak timhtuah nain COVID-19 ruang ah leet a si than. Thil sining zohchun in i pehtlaih le a nicaan suaisam than a si te lai,” tiah HBA GS Rev. Joel Nawl Cung Lian nih The Hakha Post ah a chim.

Carson siangbawi te nupa hi Chinram ah 1899 March 15 ah Hakha an rak phan. Carson siangbawipa hi 1908 April 1 ah a thi. Cu hnu ah Carson siangbawinu nih a rian cu kum 12 chung a tuan hnu 1920 ah America ah a tlung. An tuufale nih an pilepu hmun khat ah vui ding in an timhtuah nain COVID-19 ruang ah a nicaan thawn a si i zeitik ah ti belte a fiang rih lo.

Be the first to comment on "President Trump thawngthangnak a tuah ruangah Khrihfa pawl an nih lawm i zum lotu nih fakpi in an soisel"

Leave a comment

Your email address will not be published.


*