Thawngtha bak si: Japan cozah zawng nih a thatnak a thei caah a cohlan ve cang

China le WHO lih chim ruangah vawlei cung ramkip nih buainak chim cawlh lo kan ton. China cu lih a chim zong ah thei thiam a si ko, a ruang cu China cozah cu communist a si caah thil a si ning te in a rak chim bal lo, lih le hrawkhrawl lawngtein bia a chim tawn caah vawlei ramkip nih an zum duh lo mi ram kha a si.

Natein vawlei cung ramkip ngandamnak lei ah rian ttuantu nih China lih a chim bantuk in lih a chim ve caah vawleicung ramkip cu coronavirus ruangah muinak khur a lut pi dih  cang.  Coronavirus ruangah vawlei cung ramkip buainak cu thlathum a tling cang lai. Atu tiang sii ser khawh a si lo caah hmailei ruachannak ngei a har ngai.

Natein US mifim pawl nih ngawl loin mah zawtnak sii an kawl lio ah, zeitin dah emergency thil in a zawtmi hna kan zohkhen lai tiah fakpi in sii dang dang an kawl chap lio ah Ramdesivir cu coronavirus sii caah a tha ti an hmuh. Zarhnih chung coronavirus damlo an zohkhen hnuah minung chungah rian thatein attuan i, damlo tampi a damter ti an thei hnuah USA cozah nih damlo zohkhennak sii caah a pawm

Mah bantuk in thawngpang a si lio ah Japan cozah zawng nih Coronavirus damlo zohkhennak caah rianrang in May 7 ah cohlan ve cang. Remdesivir a sertu USA ah um Company Gilead Science nih application a file hnu tlawmpal ni 3 ah a cohlan cawlh

Tu dirhmun zoh ah cun Gilead science nih mah sii zuar ding mi a ngei tuk lo i, sii hi duh poah in hmangkhawh a si lai lo caah emergercy le a zawttukmi caah lawng hmang a si lai. Coronavirus ruangah a damlo mi poah nih an hmang khawhnak ding caah Japan cozah nih hma a lak pi lai tiah a chim. Credit: VOA, Kyodonews.

Note: Ka thawngpang (tadin) ttial a rel mi vialte cungah lunglawmnak tampi ka ngei. Ka thawngpang ttialmi nan kan rel piak ruangah keimah zong tangka ka hmuh ve i, chungkhar zong ka zohkhen kho ve hna. Nangmah nih thawngin chungkhar ka zohkhen khawh ve ti ka thei caah thawngpang a dik lo mi ttial ka duh lo i ka tim lo. Hoax/Rumor/Fake ti bantuk hi ttial duh lo bik a si.

English ka rel mi le mi dang nih an ttial mi credit ka pek mi hna hi source a hman mi a si maw ti ka zoh hnuah mah hi cu a hman mi a si lai tiah ka ti mi hna hi ka miphun a si mi “Chinmi” caah ka ttial tawn i ka credit tawn. Natein vawlei cung cu tlamtlinglonak ram a si caah ralrin tein ka ttial zong ah Source ka lak mi ah a hman lo mi a um kho mi a si. Source ka lak mi a hman lo ti nan theih ah cun zeitik caan poah ka theihterh kho ulawm cun keimah ca zong ah ralrinnak a ka pektuk a si hlei ah ka source kha thatein ka zoh nak ding a si lai caah  le  thawngpang a hman mi le dik mi lawng ka thla peng khawhnak ding caah tiin zaangfah kan nih hal hna-Chingpage Editor