Thla Khat Fai ah KIA nih Myanmar Ralkap Sakhaan 10 Hrawng an Lak

Kachin miphun hriamtlai KIA nih thla khat fai chung ah Myanmar ralkap sakhaan 10 hrawng an lak khawh, tiah theih a si.

March 25 ah KIA nih abiapi ngaimi Myanmr ralkap sakhaan Alaw Bum an rak lak i cu caan thawk cun hmun kip ah kahdohnak fak ngaiin a chuak.

Abikin, Phakanh peng, Moekaung peng, Waingmaw peng, Putao le Tanaing peng pawl KIA nih Myanmar ralkap sakhaan an doh hna.

Phakanh ah cun Myanmar ralkap 30 hrawng nih KIA sin ah hriam an chiah timi thawngpang zong a thang.

“KIA nih an lakmi pawl hi sakhaan fa tete he fonh in cun 10 leng a si lai. Acheukhat hmun ah cun Myanmar ralkap nih sakhaan lak tthan ding in an rak doh hna.

Cun, KIA nih an lak hnu ah anmah KIA le Myanmar ralkap nih hmunkhuarnak ah hman ti loin kaltakmi sakhaan pawl zong an um,” tiah Kachin upa pakhat nih a chim.
Alaw Bum tlaang sakhaan zong Myanmar ralkap nih lak tthan ding in vanlawng in an kah peng nain atu tiang an la kho thai ti lo.

KIA le Myanmar ralkap karlak kahdohnak hi Kachin ramkulh chung lawng ah si loin Shanram nichaklei zong pehzul in kahdohnak a um.Credit-TCJ

Be the first to comment on "Thla Khat Fai ah KIA nih Myanmar Ralkap Sakhaan 10 Hrawng an Lak"

Leave a comment

Your email address will not be published.


*