Tu ni thawngpang chia tuk mi Pali (4). A poi tak tak tu ni thawngpang kan thei mi hna cu

April nikhat kan phan cang. Tu ni hi April fools ti a si, Natein kawlram ahcun April fools cu an lungthin ah a um lo, kawlram a buai tuk ruangah. Tu ni hi CRPH nih thawngthannak a tuah ning ahcun 2008 phunghrampi a thih ni a si

CRPH nih tu ni thawk in 2008 Phunghrampi cu kawlram mipi caah zeihman a si lo caah hmang a si ti lai lo, a thar april thla chungah ser a si lai tiah a chim hnua nikhat ni a si

Tu ni ah thawngpang chia ngai mi Chinmi caah a chuak.  Kalaymyo peng, Chaungkhuah khua i Church of Jesus Christ ah missionary a ttuan liomi Pastor Mal Sawm cu nihin zanlei ah ralkap nih an tlaih i an kalpi, tiah chungkhar hna sin in thawng kan theih. Pastor Mal Sawm hi naite ah nupi a ngeimi a si.

Cun, Pu Ram Hlur nihin Raldohnak ah a nunnak a liam, Nihin Kalaymyo, pengkulh chung ah a cang mi Kawl Ralhrang le Khuami mipi karlak raldohnak cu a fak tuk ngamsam. A tu tiang zong ah Ralkap lei nih an thazaang an chap, Meithal ngan, hriam ngan in an kah cuahmah rih hna.

Nihin a i kahnak hi a bik in Chawngkuah hrawng ah a si, cu ahcun Pu Ram Hlur (Nai Mengpa) le Pu Aung San Win an nunnak a liam tiah zaanlei suimilam 4:00pm hrawng ah kan theih.

Kalaymyo peng chung i Lai khua pakhat a simi Tanphu khua ah nihin zanlei ah ralkap 30 hrawng nih an luh hnawh hna i khuami tangka an lakpiak hna pin ah Khrihfabu tangka zong an lakpiak hna, tiah tangka lakpiak a tongmi hna nih The Chin Journal ah an chim.

Ralkap nih an lakmi tangka 70,000 MMK chung ah hin 20,000 MMK hi Chin Baptist Association (CBA, Kalay) Magazine an zuarmi man a si.

Chin Ralzam Bawmhnak ah Biatak in Thazaang a Chuahtu Champhai MZP President Motor Accident in a Nunnak a Liam. Atulio Chin ralzam pawl bawmhnak ah biatak tein thazaang a chuahtu Mizo Zirlai Pawl, Champhai i an President a simi Pu H. Lalramhluna (Valpuia) cu nihin zinglei sml. 2:00 ah Champhai le Aizawl karlak ah motor accident in a nunnak a liam, tiah kan theih.

Champhai in Aizawl lei an kalnak lampi ah minung pathum an i citmi motor accident a tong i Pu H. Lalramhluna le a hawipa Zirsangliana hi a hmun ah an nunnak a liam. A dang an hawipa Lalthanfela cu sizung ah an kalpi i nunhim in a um. Credit-The Chin Journal

Thawngpang ka tial mi hi source zumtlak mi nih an tial mi lawng ka post tawn. Cu caah thawngpang a hman lo mi le a dik lo mi, mipi sin ah thanh le tial hi kan chin miphun caah thil thalo a si caah tial ka tim lo. Chinpage thazang a ka pe tu vialte nan sin ah lunglawm bia ka chim. Chinpage hi like le follow vun tuah ve law, US thawngpang le vulei cung thawngpang a hman mi ka post mi na rel khawh peng lai. By-ChiefEditor

Be the first to comment on "Tu ni thawngpang chia tuk mi Pali (4). A poi tak tak tu ni thawngpang kan thei mi hna cu"

Leave a comment

Your email address will not be published.


*