China nih a duh lo ning heh tiah a chim hnu zongah US House Speaker Nancy Pelosi cu Taiwzin ah a kal lai ti a fiang cang caah Taiwan Strait boruak cu a linsa tak tak cang, Russia le Ukraine heh tiah an nih tuk cuamah lio ah, Taiwan kongah China zong nih zeimawh tuah a tim caah tu hi boruak a linsa bik caan a si. UK National Security Adviser Stephen Lovegrove nih a chim ning ahcun ‘Security Order thar a um kho
tiah a chim i, China le Russia nih hriamnam tih nung tukmi an serh than lengmang caah
West ram pawl heh an nih tuk te ko lai, China, Russia le Werst pawl an nih tuk ahcun
Nuclear Weapons war a chuak cawlh ko lai” tiin ralrinnak bia a chim. Nuclear Weapons hmangin an nih tuk lai tiah tih nung nak ruang bik cu, Super powers pawl nih power chin lengmang an duh caah atu hi super power ram pawl zong an nih chawn duh ti lo tiin Center for Strategic and International Studies Washington DC ah , Mr Lovegrove nih a chim chap. Cre-RTK
Kawlram thawngpang…Pauk Peng Ah SAC Ralkap Hriamngan Kuan Nih Kum 6 Ngakchia
A Khen Caah A Nunnak Liam+Ralkap Nih Ngakchia Pahnih An Kaa Chungah Meithal An
Hrolh Hna I An Kah Thah Hna. Magway ramṭhen, Pauk peng Kyiapitkan(ကျားပစ်ကန်) khua ah SAC ralkap cu nizan July 27 ah an lut i, hriamngan in an kah caah kum tling lo ngakchia kum 6 Thein Thein Phyo cu hriamngan kuan nih a khen caah a nunnak liam, tiah tualchung mi hna nih an chim. July 27 ah SAC ralkap nih Kyiapitkan khua cu kahdohnak um loin hriamngan in an
kah caah khua mi hliamhma an pu. Zaw Naing le Tin Shwe Oo hna i an fanu kum 6, Thein Thein Phyo
cu hriamngan nih a khen caah a nunnak liam. “Uico ralkap pawl nih hriamngan an kah
caah Kyiapitkan khua inn pakhat cungah a tlak caah kum 6 ngakchia nu a nunnak liam. Cu hnu ah khua cu mei in an khangh. Uico ralkap nih hriamngan an kah ruangah khua mi ngakchia he upa he hliamhma an pu,” tiah tualchung mi pakhat nih a chim.
=Magway ramṭhen, Myaing peng Kyauksauk(ကျောက်ဆောက်) khua ah kum tling lo ngakchia
kum 16, La Min Maung Maung le Moe Yan Htet hna cu July 27 ah SAC ralkap nih an kaa chungah
meithal piang an hrolh hna i an kah thah hna, tiah tualchung mi hna nih an chim. “An kaa chungah meithal piang an hrolh hna hnuah an kah thah hna. An ruak cu mei in an khangh hna. Cu cu khua mi pakhat nih aa thupnak in a hmuh hna. Ralkap nih siangngakchia pawl cu PDF an si tiah an ti hna i an thah hna,” tiah Kyauksauk khua mi pakhat nih Khit Thit Media ah a chim. Nihin July 28 zinglei tiang ah SAC ralkap nih
Magway le Sagaing ramṭhen ah kahdohnak a um lo nain inn le lo an khangh i, hriamngan in an kah hna, tiah theih a si.
=Rihkhawdar Camp Cu CDF-Hualngoram Nih Nihnih Chung An Kah. Chin ramkulh, India-Myanmar ramri Rihkhawdar SAC ralkap camp cu CDF-Hualngoram nih July 25-26 tiang an kah, tiah theih a si. CDF-Hualngoram nih khuachung kahdohnak an tuah i, Rihkhawdar ralkap camp cu kan kah. SAC ralkap nih a dik lo ning in minung pali thihdan an pekmi hna ca ah teirul kan chammi a si, tiah CDF-Hualngoram nih cathanh an chuah. A voikhatnak i kahdohnak cu minutes 40 hrawng a rau, a voihnihnak kahdohnak cu
minutes 20 hrawng a rau. Cu kahdohnak ah CDF-Hualngoram nih hriamngan he hriamhme he kan kah hna caah
SAC ralkap a thimi le aa hliammi kan thei rih lo. Kanmah leiin a thimi le aa hliammi kan um lo, tiah an langhter.
==Sagaing ramṭhen, Khin Oo peng ah SAC ralkap nih kum 13 ngakchia pa, Khant Khant Ngein cu an kah caah hliamhma a pu i, sii-inn ah an kalpi lioah motor cungin luti hor ah an hlonh i an thah. Amah phortu PDF hruaitu pa zong SAC ralkap nih an thah, tiah tualchung mi hna nih an chim. Sagaing ramṭhen, Khin Oo peng Makyioh(မကျီးအုပ်) khua ah SAC ralkap pawl nih July 26 zing sml 8:00 hrawng ah meithal an puah i, an lut. Cun, Kum 13 ngakchia pa Khant Khant Ngein a ban ah an kah, tiah Khin Oo peng thawngpang fianternak phu sinin theih a si.
Hliamhma pumi ngakchia pa cu LPDF hruaitu nih sii-inn a kalpi lioah lam tanṭim ah
SAC ralkap he an i tong. LPDF hruaitu cu meithal in an kah i a thi. Ngakchia pa cu luti hor ah an hlonh i a thi chuakmi a tam tuk caah a nunnak liam, tiah theih a si. Ngakchia pa ruak va char awk ah a nule pa cu motor in an kal i, SAC ralkap he an i ton tikah ralkap nih ngakchia pa a nu a sui hna cu an chuh pinah an tuk an velh i, an motor zong an lakpiak hna. “SAC ralkap rallam an sial caan paoh ah mizapi nih lengchuah i nan i ralrin a hau. Ralkap he aa hlatnak ah nan um lai. A nunnak liammi LPDF hruaitu zong ralṭha tein mi a khamh caah upatnak salaam kan pek,” tiah KURDAF ṭuanvo ngeitu nih Khit Thit Media ah a chim. Cre-TCP