A poi tuk ee!! Ralhrang an zia cu a mak chin lengmang ko

Yagyitaw Khua Ah SAC Ralkap Nih Inn 20 An Khangh!: Sagaing ramṭhen, Chaung U peng Yagyitaw khua cu SAC ralkap le pyosawtee nih hriamngan le hriamhme in an kah i, inn 20 an khangh tiah tualchung mi nih an chim. Khuami pakhat nih cun, “Kahdohnak a chuak lo nain khua ah minung an um lo caah inn cu an khangh hram mi a si. Ralkap pawl nih khua an luhhnawh lengmang caah khua kan chuahtaknak hi thla 5 a si cang,” tiah a chim.

Kangyigone khua cu pyosawtee an thazaang an ṭhawnnak khua a si i SAC ralkap umhmun

khuar tawnnak zong a si. Yagyitaw khua he naih tein a um caah Yagyitaw khuami hna cu an

himnak caah tiin khua an chuahtaknak thla 5 a si cang, tiah theih a si. Yagyitaw khua ah cun inn 200 tluk a um i atu le tu SAC ralkap nih an luhhnawh lengmang hna pinah inn an khangh lengmang ruangah atu ah cun inn 60 hrawng lawng a taang cang tiah tualchung mi sin in theih a si. June 28 zaan zong ah khan Chaung U le Myaung peng aa tonnak khua pawl ah SAC ralkap 70 leng rallam an sial caah ah Chaung U peng in Tungpanhla, Ywahtin,

Tawcaunggyi khua le Myaung peng in Magyibauk khua mizapi cu an zaam hna, tiah theih a si.

Thawngpang dang….Manipur Ramkulh, Churachanpur Peng Ah Myanmar Mi Minung 80 Tlaih

An Si!: India ram, Manipur ramkulh, Churachanpur peng, Lamka khua ah Myanmar mi minung 80 tlaih an si, tiah tualchung media pakhat a si mi Zokam Daily nih June 28 ah a langhter. Churachanpur palek nih zing Sml 5 in 8:30 tiang innkhat hnu innkhat in an kawl hna i pa 25, nu 35 le ngakchia 20, an dihlak minung 80 an tlaih hna. “Myanmar mi tlaih an ton kong hi bia dik a si. Kei tu cu ka zaam manh.

Tlaih a tong mi hna cu zei tin an tuah hna ka thei lo, atu ah cun pehtlaih khawh an si rih lo,”

tiah cuka hmun in a zaam mi pakhat nih a chim. Tlaih a tong mi hna cu First Information Report(FIR) he

palik zung ah up an si. Siibawi le nurse pawl an auh hna i an ngandamnak zohfel a si hnu ah an herh mi eidin tirawl zong pek an si, tiah theih a si. Cuka hmun cu a luancia kum 10 hrawng in Myanmar mi hna rian an rak ṭuan tawnnak hmun a si. Tlaih a tong mi hna cu an dihlak in a ra lai mi July 15 ah biaceihzung ah an biaceih an si lai, tiah theih a si. Cuka hmun ah cun Myanmar mi hlawhfa in a ummi minung 500 tluk an um i, tlaih ṭih ah a zaam mi zong an um hna, tiah theih a si.

Banmauk Kahdohnak Ah SAC Ralkap 5 An Thi I, A Nung 5 Tlaih An Si!: Sagaing ramṭhen,

Banmauk peng ah KIA, PDF phufonh le SAC ralkap kar kahdohnak ah SAC ralkap 5 an thi i, a nung in 5 tlaih an a si pinah hliamthil zong laak a si tiah Banmauk Revolution- BR nih an thanh. June 28 zaanlei le June 29 zinglei ah Semaw Tawnggyi pawng ah SAC ralkap hna cu KIA, Kata batallion 2(Banmauk PDF) le tualcung PDF ṭangṭi hna nih an kah hna. An tlaih mi ralkap hna cu ṭha tein zohkhenh an si i anmah pumpak himnak ca ah an hmanthlak cu langhter a si rih lo, tiah an thanh. Cre -TCP