Hledan Ah Lamkam Dawrhme Tete Pawl Cu SAC Ralkap Nih An Khanghpiak Hna!: Yangon, Hledan (လှည်းတန်း) lam ah SAC ralkap nih tuzaan(June 30) Sml 8:30 ah lamkam dawrhme tete hna cu an khanghpiak hna i, an tlaih khawh mi dawrngeitu pawl cu an tukvelh hna, tiah tualchung mi nih Yangon Khit Thit ah an chim. “Mawṭaw 5 in SAC ralkap 40 an ra i, dawr cu an khangh. A zaam mi zong an um i,
thilri a fimmi zong an an um. Cheukhat cu an ṭap hna. Tlaih a tong mi pawl cu tukvelh pah
in an kalpi hna,” tiah cuka lam pawng um mi pakhat nih a chim. SAC ralkap pawl cawlcanghnak
cu video thlak a si nain cuka i ummi mipi humhimnak caah langhter ngam a si rih lo. A tang bik dot i dawr cheukhat cu SAC ralkap nih an boh i, dawr thil an i laak. Cun ralkap 20 nih lam an phih i ningcang lo ngai in an um tiah theih a si. A luancia ni 2 ah khan Hledan lam ah mino cheukhat nih ralkap uk duh lo langhternak lam an zawh i, dawrngeitu hna nih kut bengh in tha an pek hna lengah SAC uk duh lo
langhternak hmelchunhnak ah kutdong zungthum zong an thlir caah SAC ralkap pawl an thinhung i,
atu bantuk in an cawlcanghnak hi a si lai, tiah thawnglatu hna chim ning in theih a si.
Thawngpang dang..Myaung Le Minkin Um SAC Ralkap Kahdohnak Ah SAC Ralkap 6 An Thi!: Sagaing ramṭhen Myaung peng, ShwePan (ရွှေပန်း) khua ah umhmun khuarmi SAC ralkap 70 hrawng cu Chaung U Local Defense Force (CHULDF) nih June 29, zinglei suimilam 9:58 ah an kah hna. Cu kahdohnak ah cun SAC ralkap le pyusawhṭi chungtel 2 an thi, tiah Chaung U Local Defense Force nih an thanh.
Cu kahdohnak ah cun Chaung U Local Defense Force (CHU LDF) in ralkap 15 nih
kutser meithal in ShwePan(ရွှေပန်း) khuachung um SAC ralkap cu an kah hna.
SAC ralkap nih hriamngan le hriamhme in an kah ve hna nain LDF lei hliam tuar um loin hnu an tolh, tiah theih a si. Cu hnu ah SAC ralkap pakhat cu sniper kahnak in a thi i, bomb puahnak in pyusawhṭi chungtel 3 zong an thi, tiah media nih an langhter.
=Bhamo Ah Tlaih A Tong Mi Minung 9 Lak Ah 4 Cu Taza Cuai An Si!:
Kachin ramkulh Bhamo(ဗန်းမော်) Thasi(သာစည်) sang trafic point ah palek 2 kah an si
hnu in tlaih a tong mi civil mi 9 lak ah 5 cu an luat i, a dang 4 cu taza cuai an si, tiah tualchung mi hna sin in theih a si. Cupinah nizaan (June 29) zing Sml 11 hrawng ah civil mi hna a tlaitu palek bawi Kyaw Ko Ko Tanh(ကျော်ကိုကိုသန့်) hruai mi palek hna nih dawr pakhat an boh i, thil man sung le computer pawl zong an laak tiah theih a si. Uknak laak a si hnu in Bhamo khuachung ah atu le tu ti awk in bomb a puak i,
SAC ralkap nih civil mi 20 hrawng an tlaih cang hna, tiah theih a si.
==Kyaikhṭu Tualchung Hriamtlai Phufonh le SAC Ralkap Nithum Chung Kahdohnak Ah
SAC Ralkal 5 An Thi: SAC ralkap nih umhmun an khuarnak camp le chekhlatnak an tuahnak gate cu Kyaikhṭu Revolutionary Force(KRF), Kyaikhṭu tualchung hriamtlai phufonh le KNLA nih an kah hna i, nithum chung kahdohnak ah SAC ralkap 5 an thi, 6 hliamhma an tuar tiah KRF nih cathanh an chuah.
KNU brigade 1 hmunram, Bilin peng NatGyi(နတ်ကြီး) le Zikung(ဇီးကုန်း) SAC ralkap
camp cu June 22 le 23 ahkhan kah an rak si. Cun, June 24 ah HṭiWakhaLuh(ထီးဝါခလု) khua pawng i
SAC ralkap umhmun an khuarnak inn pakhat cu kah ṭhan a si tiah an langhter. Nithum chung kahdohnak ah SAC ralkap lei in minung 5 an thi i, minung 6 nak tam nih hliamhma an tuar, tiah KRF nih an thanh. SAC ralkap an hramcah tiang kahdohnak ah kan i tel lai i, mizapi nunnak le innlo kan runven lai, SAC ralkap kuttang um thawngpetu dalan le SAC ralkap bawmchantu hna pohpoh cu kan doh hna lai, tiah KRF nih an cathanh ah an langhter.
==Okarihṭa Camp Chanh Ding In A Kalmi SAC Ralkap Zeimawzat Cu Kahdohnak Ah An Thi!:
Kayin ramkulh Myawady peng, Okarihṭa (ဥကရစ်ထ) camp lei ah an hawile bawm ding in a kalmi SAC ralkap hna cu nihin June 30 ah PDF nih an kah hna caah zeimawzat an thi, tiah Southern Regional Military Headquarters in PDF nih an thanh. SAC ralkap nih Okarihṭa(ဥကရစ်ထ) camp cu sungh an duh lo caah vanlei in runvennak an tuah i, tanglei in an hawile nih bawmh an timh hna lio ah PDF nih tamlak an rak thah hna. Kahdohnak ah cun PDF lei in thi le hliam an um lo, tiah PDF nih an thanh. Cre-TCP