=SAC ralhrang ralkap pawl nih phaisa hman dingmi nan ngeih lo i phaisa nan herh i nan kuan zuar nan duh ahcun kan in cawk hna lai, tiah CDF-Mindat nih a thanh. Mindat, Matupi, Kanpalet, Kyaukhtuh, Saw, Gangaw le Htilyn peng chung um mi ralhrang hna nih MA meithal kuan 40 mm, 60 mm pawl nan zuar duh ahcun 09448685594 ah pehtlaih khawh kan si,
tiah CDF-Mindat nih an Facebook Page ah an taar. Cuti CDF-Mindat nih thawng a thanh suimilam 2 a
rauh ah ralhrang 2 nih ‘meithal kuan zuar kan duh’ tiah an kan pehtlaih colh hna, tiah CDF Mindat nih an
chim. “An dik ko ahcun anmah he a man kan i ceihhmai hnu ah kan cawk ko hna lai, kuan a tam ahcun a man rate ai dang lai i a tlawm ahcun a man rate ai dang ve ko lai. Cuticun kan i chawnh biak ning a si. CDM an tuah pek, tuah lo pek ah aho an va si poh ah a zuar mi sin poh in kan cawk ko lai. “Cawkzuarhnak ah zulhphung a ngei
mi he cawkzuarhnak ngeih zong kan duh,” tiah CDF Mindat in biachimnak nawlngeitu pakhat nih a chim.
Cun, ”Ralram cu ralram a si i, cawkzuarnak cu cawkzuarnak a si ve ko. Cuticun kan kalpi ko lai,
Mipi phaisa in cawk mi hriamnam in mipi lila thah nakcun mipi nih mipi venhimnak ca i hman ding ah an kan bawmh bantuk zong a si ko caah, atutan kuan le bomb cawkzuahnak ah lungthiang tein i tel cio uh tiah sawm kan duh hna,” tiah a chim chih fawn.
= Sagaing ramṭhen, Kalay peng ah nizan February 6 ahkhan ralhrang le mizapi ralkap karlak kahdohnak
a chuak i, cu kahdohnak ah cun ralhrang lei tamlak an thih leng ah hliamtuar zong an tam, tiah theih a si.
Kalay peng, Tatta khua cu ralhrang nih a langhlat in hriamngan he an kah hna. Ralhrang phu hna nih an thiltuah mi lehrulhchamnak ah Kalay mizapi vengtu ralkap phu nih ralhrang phu hna cu February 6 ah bomb puahhnawh in an doh hna. Hi kahdohnak ah hin ralhrang phu minung 20 hrawng an thi, tiah Kalay-PDF nih cathanh an chuah.
Kalaymyo peng chaklei Gyanta khua le Hantawady khua ah umhmun a khuar mi ralhrang phu hna nih
February 6, zinglei suimilam 9:00 in suimilam 11:00 hrawng tiang Tatta khua cu hriamngan he a pehpeh
in an kah, tiah theih a si. Ralhrang phu lei hriamngan kahnak ruangah Tatta khua mi kum-9 ngakchia pakhat le sualnak ngeilo khuachung minung 10 nih hliamhma an tuar i, cu chung ah cun minung 4 hliamhma cu a faak ngai, tiah theih a si. Hriamngan kahnak ruangah khuachung mipi umnak inn 5 cu a kaang i Tatta, Awngmingalar, Hmandaw, Shaphu, Kyautphu, khua hna cu a himnak hmun lei ah an zaam hna, tiah theih a si.
Ralhrang phu hna nih sualnak ngeilo mipi hna cung ah hriamngan an kah mi ruangah lehrulhcham in
Kalay-PDF nih bomb lunghnih puahhnawh in kan doh hna hi a si, tiah Kalay-PDF nih an cathanh ah an langhter.
February 6, zanlei ah zong ah Kalay Technology university in Kalaymyo lei ah a kalmi ralhrang phu minung thazaang 60 hrawng cu Zinkalyin khua le Chinsai khua karlak ah bomb puahhnawh in doh an tong i ralhrang minung 15 hrawng an thi, tiah theih a si. Bomb puahhnawh ruangah hliamtuar mi ralhrang phu hna cu Kalaymyo ralhrang siizung ah chiah an si i, cu chung ah cun minung 5 an thi ṭhan, tiah theih a si
= Rakhine ramkulh, Muang Taw peng ah February 4 in February 6 tiang kahdohnak a chuahnak a ruang
cu AA ram chung ah ralhrang pawl an rak luh ruangah a si, tiah AA chimphuan tuanvongeitu Khine Thu Kha nih a chim. Nizan February 6 ahzong ah ralhrang an rak ra i kahdohnak a chuak. Ralhrang phu hna nih AA nih a uk mi hmun Latpan tlangthluan ah lut ding in an i timtuah, tiah Khine Thu Khah nih a chim.
“February 6 zanlei Sml 3:00 hrawng in 6:15 tiang kahdohnak a chuak. Kahdohnak a chuahnak hmun cu Muangtaw peng,
Mi Than khua, Latpan tlangthluan ah ralhrang pawl cu an rak lut i, AA theihpinak loin an luh caah kahdohnak a chuak. Cu kahdohnak a thi mi le hliam a tuar mi an um theih a si rih lo. Ralhrang lei in a thi mi a um kho,” tiah Khine Thu Kha nih Yangon khit thit ah a chim. Rakhine thawnnglatu hna nih an chim ning ah cun Muangtaw sii-inn ah palik 2 ruak le ralkap 7 ruak cu february 6 ni zanlei ah an phan, tiah theih a si. Cre-TCP