Chief Minister cu NLD caah ruahchannak um bak tilo hi?

2020 Ahcun Miphun Party Nih Chief Minister An Ṭuan Cang Lai. Mizapi ruahnak ah NLD long nih ramkomh (Union), ramkulh le ramṭhen (State/Region) kip ah cozah an ser te lai tiah kan chim/ruah tawn. Hihi aa palh taktak mi ruahnak a si. Thuk deuh in khua kan tuaktan lo ruangah le a chunglei pil diklak in thil kan tuaktan lo ruangah a si.

2008 phunghram article 261 long kan zoh. Hihi remh hna seh law fawi deuh in miphun party nih Cozah an ser lai i, CM zong an ṭuan kho lai tiah kan ruat. Hihi a si dih naisai lo. Article 261 remh lo zongah tlangcung miphun kan lungfim cun miphun party nih cozah ser khawh le Chief Minister ṭuan khawh tuk si.

Tlangcungmi nih lungfim bu tein mahle miphun party cio thazang kan pek hna si cun article 261 remh piak lo zongah Cozah kan ser kho i, Chief Minister zong kan ṭuan kho ko. A tanglei ah vun zoh tuah usih. Kawlram Parliament ah ṭhutdan 664 a um. Ralkap nih 166 an i lak cia
Mizapi thim ding cu 498 a si. Hi chungah, Rawn (Region) ah 291 a um. Tlangcung (State) ah 207 a um

Ramkomh cozah serkhawhnak ah 333 hmuh a hau. Kawl/rawn party chungah a tanglei pawl a um. NLD
USDP. NUP. UBP, Thura U Shwe Mann hruaimi. PP, U Ko Ko Kyi hruaimi le e.t.c (mizapi theih deuhmi long ka langhter)

Hi vialte party nih rawn (region) i hmunhma 291 khi an i cuh lai. Cutikah, NLD nih tambik a ngah te lai
USDP nih tlawmpal te a ngah ve te lai. UBP nih zemawzat a ngah ve lai. PP nih zeimawzat a ngah ve fawn lai. Cuti si cun NLD nih 291 chungah a tam bik 250 long a ngah te lai. Cozah sernak caah 333 a haumi chungah 250 long cun cozah a ser kho ti lo.

Tlangcung mi vialte kan lungfim i, Kawl longlong bochannak le Kawl nih fial chukcho le ṭhudir tuah ter long kan duh ti lo ahcun miphun party cio mee (vote) kan pek cio hna ahcuun. Tlangcung hmun i 207 a ummi chung ah 150 tal hmunhma kan lak khawh si cun a ho party hmanh nih anmah longin cozah an ser kho ti lai lo.

Komh cozah (coalition government) tu dirh si cang lai. Cu tikah president cu nanmah nih tlaih u law, Chief Minister le Union minister zeimawzat cu kanmah nih kan tleih ve lai tiah (give and take) in a kal lai.

Cuti kanmah Miphun party cio nih cozah kan ser khawh si cun Nay Pyi Taw leiin (ṭhudir) an kan tuahter tawnmi kha an kan tuahter kho ti lai lo. Chin National Day ah CNF biachimnak nawl pek le pek lo kongah Nay Pyi Taw lei biachahnak hngah a ho ti lai lo.

Chin miphun tonbiaruahnak tuah kan duhmi cungah cunglei (Nay Pyi Taw) lei ah va hal ta tibantuk a um ti lai. Cu bantuk dirhmun cu kan duh, nan duh cio ko lo maw? Cu bantuk dirhmun a duhmi nih Chin Party CNLD mee (Vote) rak pe cio uh. Kawl pawl nih ṭhu an ti paoh ah ṭhut i, dir an ti paoh dir a duhmi nih, NLD le USDP kha mee (vote) rak pe te uh.

Kawl pawl nih ṭhutdir tuahter a duh lomi le mah nawl ngeihnak tein a ṭhu duhmi, a dir duhmi paoh nih CNLD vote rak pe te uh. Pakhat belte cu, a minung zoh chih lo awk cu ttha fawn hlawh kaw, Thantlang cun Dr. Hmuh Thang le Henry Van Thio nan vote mi hna belte cu ka Amen ko lai. Miphun dang (Kawl) pawl nih ’’Ṭhu Dir’’ tuahter lengmang hi duh ti hna hlah usih. By- Salai Biak Tum Lian. 21 June, 2020

Note: Ka thawngpang (tadin) ttial a rel mi vialte cungah lunglawmnak tampi ka ngei. Ka thawngpang ttialmi nan kan rel piak ruangah keimah zong tangka ka hmuh ve i, chungkhar zong ka zohkhen kho ve hna. Nangmah nih thawngin chungkhar ka zohkhen khawh ve ti ka thei caah thawngpang a dik lo mi ttial ka duh lo i ka tim lo. Hoax/Rumor/Fake ti bantuk hi ttial ka tim lo.

Thawngpang ka rel mi le mi dang nih an ttial mi credit ka pek mi hna hi source a hman mi a si maw ti ka zoh hnuah mah hi cu a hman mi a si lai tiah ka ti mi hna hi ka miphun a si mi “Chinmi” caah ka ttial tawn i ka credit tawn. Natein vawlei cung cu tlamtlinglonak ram a si caah ralrin tein ka ttial zong ah Source ka lak mi ah a hman lo mi a um kho mi a si.

Source ka lak mi, a hman lo mi a um ti nan theih ah cun zeitik caan poah ka theihterh kho ulaw, cun keimah ca zong ah ralrinnak a ka pektuk a si hlei ah ka source kha thatein ka zoh nak ding a si lai caah le  thawngpang a hman mi le dik mi lawng ka thla peng khawhnak ding caah tiin zaangfah kan nih hal hna-Chingpage Editor