Lai ramkulh ah ralhrang motor 30 hrawng le thazaang 200 leng cu 30 Chiapa 2022 ah Kalay in an rak kai i Falam peng, Tuphe khua ah thazaang 50 hrawng nih riahbuk an chiah, khuachung inn zuat sațil arva, cinthlak tisik-anhnah hna cu an fir piak hna. Cun ralhrang nih Falam peng, Valung khua ah kum 63 mi mitlamtling lo nu pakhat le 2 Pur ah Hlanzawl khuami mitlamtling lo pa pakhat an thah hna.
Falam lei hoih in a thawhmi ralhrang motor cu 4-5-7 Chiapa ah CNDF nih an kah hna i, voithum
kahdohnak ah ralhrang a tlawmbik 5 an thi hliammi zong an tam caah hliammi zat fianghlang
in theih a si lo. CNDF lei in minung pakhat ( thinphan awk si lo) hliam a țuar. 7 Chiapa ah Falam in Hakha lei ah a thawhmi ralhrang motor 27 le thazaang 200 hrawng cu Falam-Hakha lamcung mengtung (10)(13)(24) ah CNDF telh in CNA, CDF Thantlang, CDF Hakha le CJDF Special ralkap nih 8 – 11 Chiapa nili chung kahdohnak ah ralhrang 40 hrawng an thi i hliammi zong an tam, CJDC Special ralkap nih 16 Chiapa tiang pehzulh in an kah hna.
Kahdohnak ah CJDC chungtel pakhat nih miphun le ram caah a nunnak a pek i, minung 14 hliam
an tuar tiah Chin National Organization nih cathanh an chuah. CNF nih cun 8-16 Chiapa ah ralhrang
le CNA, CJDC (Special Force) CDF Thantlang, CDF Hakha, CNDF fonh hna he kahdohnak voi 8 a chuak i ralhrang 60 nak tlawmlo an thi 17 hrawng nih hliam an tuar. CJDC ralkap in minung 2 nih miphun le ram caah an nunnak an pek tiah Chin National Fornt nih cathanh an chuah. Cre-The Lairam Time
Thawngpang dang..Monywa University of Economic Ah Umhmun A Khuar Mi SAC Ralkap Cu PDF
Phufonh Nih An Kah Hna: Sagaing ramṭhen, Monywa University of Economic ah umhmun a khuarmi
SAC ralkap hna cu PDF phufonh nih nihin (July 19) zing Sml 1:30 ah hriamngan le hrimhme he an kah hna i ralkap 6 an thi, tiah Northwest Regional PDF Allies nih an thanh. SAC ralkap lei in ralkap 6 an thi i, hliam tuar zong an tam. Ṭangrual phu hna cu him tein hnu an tolh kho, tiah PDF phufonh nih teihternak an tuah. Kahdohnak kong he pehtlai in Northwest Regional PDF Allies in ṭuanvo ngeitu pakhat nih,
“SAC ralkap lei zong nih RPG, 60mm le hriamhme he an kan kah ve nain hliam tuar kan um lo.
Thawng kan theih ning ah zanlei tiang ah SAC ralkap 6 an thi i hliam tuar zong an tam ngai, hliam tuar zat tu cu fiang in kan theih kho deuh rih lo,” tiah a chim. Cu kahdohnak ah cun Monywa tualchung hriamtlai phufonh hna an i bawm, tiah theih a si.
=Yey Nant Thar-Gwa Lampi Ah Mawṭaw Ngan Pakhat Cheng Ah A Tla I, Minung 2 An Thi,
10 Hliam An Pu!: Ayayawady ramṭhen Yeygyi peng, Nga Thine ChaungMihthalin khuakomh,
Meitha khua pawng Yey Nant Thar-Gwa mawṭaw lampi ah July 19 zaan Sml 8 hrawng ahkhan mawṭaw ngan pakhat cu cheng ah a tla i, mawṭaw aa cit mi 2 an thih lengah midang 10 hliam an tuar, tiah mibawmchantu hna nih an chim. Lamsernak ding ah vawlei a phortu SKAT mawṭaw cu Yey Nant Thar-Gwa lei an kal lio ah mawṭaw a khaltu pa nih cun Methalin khua pawng an phanh ah a veng kho ti lo i, chengpalang ah a tla, tiah theih a si.
“Chengpalang ah a tla mi mawṭaw aa cit mi pa pakhat le nu pakhat cu an thi i, midang nu 4 le pa 6 zong hliam an pu,
mawṭaw aa cit mi hi an dihlak ah minung 12 an si,” tiah tualchung mi bawmchantu chungtel pakhat nih a chim. Mawṭaw accident ruangah a thi mi 2 hna cu U Tawng Htun kum 63 le Yeygyi peng, Kyauk Khaung khuami Daw Pauk Sa kum 54 an si, tiah theih a si. Hliam tuar mi mizaw hna cu Nga Thine Chaung mibawmchantu hna nih Yeygyi peng siizung ah an kalpi hna, tiah theih a si. Cu boruak he pehtlai in hlathlainak tuah ding in mawṭaw khaltu pa cu Yegyi peng palek nih an tlaih, tiah theih a si. Cre-TCP