Tu lio thawngpang a linsa ngai mi, US le Russia cu Ukraine kongah an i thuat men lai tiah mi tampi nih an zum cang mi le mah Chinpage zong ah voih tampi ka rak tial cang mi kongah China nih US cu a vun phomh ve cang. Ukraine Tension ah a hawikom Russia a vun dirpi i, US nih UNSC meeting a au mi ti lo ah khan China hi zeihman a chim lo.
Natein February ni 16 kan phan cang, US nih West Intelligence hmangah Russia nih Ukraine cu 16 ah a
tuk lai tiah a chim mi kongah zeihman Russia nih Ukraine a tuk ti mi thawngpang a um ti lo caah
China nih US a vun thuat than i,lih le hrokhrawl in thawngpang a linsa lo mi, mipi lauter in thawngpang a thanh tawn tu a si tiin a thuat. Chinese foreign ministry spokesman Wang Wenbin nih “Western ram pawl nih a dik lo mi thawngthanhnak an tuah/disinformation an aupi. Mah bantuk thawngthanhnak an tuah ruangah ram tampi an buai.
Ram tampi nih an ram le mipi caah heh tiah rian an tuan i, thancho nak lei lam an kawl cuamah lio ah
ram le ram karlakah i rem lo nak le i huatnak a chuah khawhnak ding in US nih a dik lo mi thawngthanh nak
a tuah tiin US a phomh. Washington, UK le Western dang pawl nih Russia Ukraine a tlung hrim lai tiin heh tiah thawngthanhnak an tuah ruangah an mipi hna cu Ukraine ram chuah tak ding in heh tiah an ti hna i an ram cio ah an kir ter hna. Cred-RTK
Kawlram thawngpang…..Chindwin Yoma ralkap Phu fonh hi National Unity Government (NUG) i
Defense Ministry nih theihpinak in hriamnam nan kan bawmhchanh ahcun Mongwa khuapi kan laak
khawh colh, lai tiah Chindwin Yoma Ralkap phufonh nih NUG sin ah bawmhhalnak ca an pek. Chindwin Yoma ralkap phu fonh hna cu Yinmapin pengkomh, Yinmapin peng tualchung mi chungtel minung 21 nih October 10, 2021 ah rak dirh mi a si. Chindwin Yoma ralkap phu fonh ah hin Battalion 9 tiang an um i ralkap thazang 1935 an um, tiah theih a si. Ralkap phu fonh nih cun, “Ralhrang uknak a hram in bongh ding;
a zalong mi ram ser ding le Federal ramkomh ser ding; Mizapi runven ding le ralhrang dohtu hriamtlai
dang hna he lungrual tein mizapi ca ah a dai mi ramthar serding ti mi hmuitinh he dirh mi a si.
Cucaah NUG nih hngalh pimi ralkap phu sinak ding le hriamnam zong in bawmchan ding in an nawl i “Hriamnam nan kan bawmh ahcun Mongwa khuapi cu kan laak khawh colh” lai tiah an bawmhhalnak ca ah an ṭial. CDM Tuah khawh Lo Ruang Ah Palek Bawi Pakhat Amah Tein Ai Kap: Irrawady ramṭhen, Thapaung peng, Piohphet sehzung
a cawngtu palek bawi Duh- Ye-oh Aung Thein Kyaw timi cu amahte meithal in ai kap,
tiah theih a si. Duh-Ye-Oh Aung Thein Kyaw hi a kumkhua a upa cang i CDM a tuah khawh lo caah pension pekding in cunglei ah a hal hna i, an pek duh lo caah lungrawk ngai in ni 5 chung hrawng a um hnu ah amah tein ai kahnak hi a si, tiah tualchung thawngzamh hna nih an langhter. “Palek bawi pa hi pension a laak nakding
a hlat deuh rih caah cunglei nih an sianh lo, tiah theih a si. CDM tuah ding ah a upa cang
fawn i Pension tu a hal hna hi a si i, an sianh lo tik ah a lungrawh celh loin meithal a ka chung ah i hmuah in aa kap,” tiah tualchung mi pakhat nih a chim. Ralhrang nih uknak an laak hnu in Irrawady ramṭhenn ah palek le ralkap CDM tuahmi 2000 leng an si cang i Department dang cio zong in rian a chuah taak mi an tam, tiah kan theih. Cre-TCP