Kawlram a buai chin lengmang ti kan thei, atu cu kawlram chungah ramdang company pawl nih Min Aung Hlaing cozah he pehtlaihnak ngei an duh ti lo, Kawlram chungah rian tuan an duh ti lo caah kawlram chuahtak ding in lam an kawl cuamah cang. NUG caah thawngpang sunglawi tuk mi pakhat kan thei mi cu,
Zahan nai ah ka rak tial cang mi thawngpang he pehtlaih in, Myanmar ram chungah Company ngantuk mi,
Investment Company ngan pahnih TOTAL le CHEVRON company nih cun NUG cozah account ah tangka tampi an hlut lai ti thawngthanhnak an tuah
Mah bantuk thawngpang thei cu a nuam tak tak mi si cang. NUG cungah zumnak fakpi an ngei cang tinak a si, Min Aung Hlaing cozah he rian kan tuan ti duh ti lo tiah mah company ngan pahnih TOTAL le CHEVRON nih kawlram chuahtak ding in timtuahnak an ngeinak ruang a thli in an chim ning ahcun, atu kawlram dirhmun an zoh tikah, Min Aung Hlaing cozah hi a sung hrim lai ti an zum caah a si tiin expert pawl nih an chim.
NUG nih timtuahnak angei mi cu a tlamtling cuamah tinak a si. Atu kawlram chungah Oil le Gas companies pawl
nih NUG cozah nih natural energy tax kalpi a tim ning tein an zulh ve cang lai tiah thei a si. Cred-RTK
Thawngpang dang…Sagaing ramṭhen, Kani pengchung ah Chindwin tiva hrawn in tilawng he a kaimi ralhrang phu hna nih mipi umnak inn 42 an khangh, tiah Kani-People’s Defense Force(PDF) nih cathanh an chuah. Cu ralhrang phu hna nih cun nizan January 22 zanlei suimilam 3:00 hrawng ah Kani peng Muhnaw nichuahlei khua minung umnak inn 11 cu mei in an khangh i, an hrawhpiak hna.
Cun, nihin January 23, zinglei suimilam 9:30 hrawng ah Kani peng Natgyi khua minung umnak inn 31 cu
meikhangh in an hrawh ṭhan, tiah Kani-People’s Defense Force(PDF) nih cathanh an chuah. Than Lwin Khet
THAWNGPANG DANG: Katha peng, Naungcho Ramchungah KIA le Ralhrang An I Kap; KIA battalion 8 hmunhma Sagaing ramṭhen, Katha peng chung ah nihin zingka ah KIA le Ralhrang an i kap tiah theih a si. Katha peng, Naungcho ramchung ah a um mi KIA hmunhma ah a rak lut mi ralhrang Brigade 99 in Ralhrang 100 hrawng cu KIA nih an kah hna i suimilam cheu chung an i kap, tiah Kachin thawngthanhnak in theih a si.
Kahdohnak ah kaphnih in a thi mi an um le um lo theih a si rih lo. Nizan January 22 zingka ah Katha peng,
Nathlaing khua pawng ah ABSDF le Katha-PDF i bawm nih ralhrang an kah hna, Suimilam pahnih hrawng an i kap tiah theih a si. Cu kahdohnak ah cun ralhrang 7 an thi, tiah Katha-PDF nih cathanh an chuah. Sagaing ramṭhen nichuahlei le Kachin ramkulh chung zong ah KIA, ABSDF, PDF i bawm in ralhrang an kah hna tiah theih a si. Cre-TCP