Hungary ruang lawng si lo in, Russia natural gas & energy supply ah a hngachanmi European Union members state lakah tampi an um caah an ruahning le lungput a khat kho ti lo. President Putin bia ning bantuk in Ruble payment cu tlam a tling thluamah cang, Russia sanctions nih a dongkhan kho lonak ding caah lam an kawl cuamah ve cang. European Union pawl cu an ruahnak le duh ning a khat lo chin
lengmang cang lengmang cang. Hungary lawng si lo in, EU members state firms 20 leng nih
Russia Ruble payment khawhnak ding caah account an awn thluamah cang. French Energy Giant, Engie zong nih
Russian gas producer Gazprom sin ah payment ruble in an pek khawhnak ding caah May thla dih hlan ah lam a kawl cuamah ve cang, Company tampi nih EU sanctions nak nih an buaiter lo nak ding caah le Russia gas energy pehzul tein an lak peng khawhnak ding caah heh tiah lam an kawl cuamah lio a si. EU President Ursula von der Leyen nih a chim ning ahcun Russian energy resources kongah lung daihtein an
um khonak ding caah, European Commission nih ‘Repower EU plan’ that an ser tiah an chim. Cre-RTK
Kawlram thawngpang….Arakan(Rakhine) ramkulh ah kahdohnak a daih nakhnga biatak tein kan
i zuam i, hiti buin kahdohnak le buainak a chuah ahcun rak kan mawhchiat hlah uh, tiah SAC chimphuannak nawl ngei Zaw Min Htun nih hrocernak bia a chim. Arakan Army (AA) lutlai General Htun Myat Naing nih Online chung in SAC ralrin a pek hna le SAC nih sawm mi tonnak ah kal loin NUG he tonnak tu an ngeih ruangah atu bantuk in SAC nih lehnak an tuah hi a si.
Rakhine ramkulh chung ah AA nih ukhruainak hna an kan hnawh i
Regional Military Headquarters ralrin pek le hrocer kan ton caah hihi raltuk an kan sawm a si ko, tiah SAC nih cun a ti. AA he kan i kahlonak a ruang hi Rakhine mizapi zawn kan ruah caah thinsau tein kan i innak a si tiah an ti fawn. Rakhine ramkulh chung ah SAC nih ralkap thazang tampi a chap caah zeitik poh ah kahdohnak a chuak kho, tiah AA nih May 15 ahkhan mizapi ralrin peknak cathanh an rak chuah ve.
==Minchain pengkomh Nuaṭhuci peng block 3 Nuaṭhuci meekuang hmun a pituhhluattaw
palai(MP) Naing Ṭhu Aung inn cu mei in an khangh, tiah tualchung mi hna sin in theih a si.
Inn a kangh ning hi mizei an si ti theih lo mi nih mawtaw in an ra i an khangh. Inn a kangh lio ah hin meithattu zong an um lo i amah daih in a dai, tiah a chim chap. Meikangh ruang ah hin inn cu cutlukpi cun a rawk lo nain rawlchuannak tlawmpal a kang, Mei zeitin aa thok i a kangh ti cu fiang in theih a si lo. U Naing Ṭhu Aung inn ah hin a hlan ah cun thilzuarmi pawl kan rak hmuh tawn hna, anmah cinglarualchan an um le um lo fiang in theih a si lo.
Naing Ṭhu Aung hi National Unity Government(NUG) ah Defense minister rian a ṭuan lio mi a si.
===Tuluk (China) nih bawmhnak ah a pekchap mi Covid-19 raikhamsii ‘Sinopharm’ dose nuai 10
(millions) tluk cu Basic Education School ah a kai mi Siangngakchia kan chunh hna lai tiah
SAC Ngandamnak zung sin in kan theih, tiah Voice of Myanmar nih a langhter. Atu hi a ṭumkhatnak ah Tuluk nih Covid raikhamsii dose nuai 5 (millions) le sii-ṭhim nuak 2 (millions) an kuat i May 18 ahkhan Yangon Airport a phan cang, tiah theih a si. “Sianginn on a si in Siangngakchia chunh ding an ti, kan hnu lei sianginn on lio zong ah kum 12 cung Siangngakchia pawl cu chunh an rak si cang,” tiah Siangcachim pakhat nih a chim.
Tuluk(China) nihcun “Sinopharm” ti mi Covid raikhamsii dose nuai 10 (millions) le sii-ṭhim nuai 13.056 cu
Myanmar a bawmh i tutan hi a ṭumkhatnak (khohkhatnak) a phanh a si i, a phan cia mi sii cu ‘Central Cold Room(CCR)’ ah ṭha tein an fim i, a dang zong May thla chung ah an van kuat dih lai, tiah theih a si. Kan hnu kum ahkhan Siangcachim le kum 12 cung cu SAC nih Covid raikhamsii an rak chunh cang hna. Tukum zong June 2 ah Sianginn on a si lai i Sianginn kaiman (School Fee) a um lai lo, tiah SAC nih a thanh. Cre-TCP