FAHLAM LE HALKHA DOAWK THUKum 1650-1700 karlak hrawngah Fahlam pawlin Hakha an va sîm ih, hi laiah Fahlam pawl cu Tlaisun lal an sinan Zahau @ Mangkheng lal thawn an kop aw. Tlaisun vanglai a siih, Mangkheng val a rak um ve thawn ralkap an ngah tukih, Halkha an va do ah hin Fahlam ralkap cu dawrawn ihsi fang sûn bangin a bungin an bung an ti.
Cu tluk tam nafam cun an neh tukih, Halkha khawlak le kawmkar tiang thisen a luang zeih zeih. Ticun, Halkhapawlin an neh si loih Fahhlam in a uk. Ni, thla le kum tampi a liam hnu cun Halkhapawlin Fahlam ih siah (ngunkhuai) pek ring ring cu an khop tukih, êk thing ninih an nin ruangah ral an tho.
A thup thiar zawngin Fahlam cu an va do thut mai ih, Fahlam lam ihsin theih cianak le ralrinak um si lo cu an tanhmun a hnget lo, ziang le ziangtin simaw rei loah ah cangvaitu ding khal an um nawn lo. Ticun, remawknak thu an kam ta.Asinan, remawknak thukam cu thlun tum loin Halkha parih ningnatnak le thinhengnak hlirin an khat.
A netnakah doawknak a suak la la theu ih, me le ui hren rawi bangin a remin an rem aw thei lo. An doawk tinten Fahlam lamin an neh leu leu theu. Halkha pawlin Fahlam pawl an neh theu ruangah a netnakah Fahlam lam ihsin hmar ngai zetih ral do hnakin mai sahimnak hawlih khui maw kawmkar ih relh an um thok hnuaihni ih, Zahau @,Mangkheng pawlin an rem thei nawn lo.
Tlaisunpawl cu ral do hnakin mai suahsemnak khua le ti tlansan ih relh thup nan hmang tuk an tiih, a netnakah hitin lairelnak an nei. Halkha ralpi an ra pawk sal asile mipa pitling cin cu Halkha ral hmaiih an tlan siat lonak dingah an kawngpi cin cu leiah phumsak ding an ti. Ticun, umhmunah ral an thih cilh ding a si mai.
Zum cia vekin Halkha ralpi a hung tho la la ih, ke khatlam cu leiah phumin Halkhapawl cu an rak do ciamco. An vun do aw tak tak cu zo hman tlansia an um nawn loih, Halkhapawlin mak an tiin an mang bang. an zum vek an rak si nawn ta lo, eleheu tiin lungfim deuhin an vun zoh cu Fahlam ralkap pawlin an ke khatlam cu leiah an phum ih, an tlan siat thei lo ruangah an herro tuk ti an thei.
Ticun, va naih tuk duh loin an that vivo ih, a netnak ah Fahlam pawl an sung la la. Fahlam pawl mangbang cun hrokhrawl cuhin Halkhapawl cu hnam dang dopi dingah a va sawm daih maiih, cui cinin an doawknak a cem.
An doawk sung hi kum zakhat hlei a siih, 1850 kum hnulam cun rel tlakin doawknak an nei nawn lo. An doawk lai ihsin an doawk hnu tiang Halkha lamin nehnak an co tamin nuam te ten an ropi hrethro-, ti a si.Hi thu hi Lianthang Puia (Mizoram singer) in Mizo tongih a nganmi a si.Crd.Salai Medal- Pui Tuallawt Emem