Kawlram caah thawngpang tha bak si cang, United States, United Kingdom le Canada nih zahan ah Myanmar ralkap pawl/senior official hna dantat si seh tiin biakhianak an tuah cang. US Department of the Treasury nih Attorney General Thida Oo, Supreme Court chief justice Tun Tun Oo le Anti-Corruption Commission chairman U Tin Oo hna cu politics he pehtlaihin Aung San Suu Kyi cu dih lo ngaiin tazacuai a si nak kong he pehtlaih in an cungah dantatnak kalpi a si cang lai.
UK zong nih Thida Oo, Tin Oo le ralkap in a din cangn mi mipi cozah hrawh a si hnuah election commission chairman
caah thim mi U Thein Soe hna cu dantat an si lai tiah thawngthanhnak a tuah ve. Cre-RTK
Kawlram Thawngpang dang…Karen National Union(KNU) Brigade 5 Phapone Pengkomh chung ah KNU Brigade 5 le ralhrang cu thlakhat/January chung ah voi 322 an i kap i ralhrang 194 an thi; 200 hrawng hliam an tuar, tiah ‘Moe-Aw’ ti mi thawngzamh nih a thanh. Ralhrang lei a thi mi ah Duh-tatzinhmu rank pakhat ai tel, hliamtuar lakah Tatzinhmu rank pahnih an i tel. Ralhrang mawṭaw 20 an hrawhpiak hna i an hmanrua Rang 4 zong fimtawl an si.
Hi thlakhat chung kahdohnak ah KNU/KNLA in minung 3 nunnak a liam i, 12 hliamhma an tuar. Ralhrang nih hriamnam kah thlorh in an kah caah
minung(civil) 5 an thi i 18 hliam an tuar. Kahdohnak thlakhat chung ah ralhrang nih Vanlawng a hman peng i vanlawng in bomb voi 14 an thlak, tiah theih a si. Cre-TCP
= Myanmar ramchung ah ralhrang nih nawlngeihnak an laak hnu ah ramchung buaibainak le harsatnak a karh tuk mi hna cu ramkip cio nih tuaktan piak cio ding in UN nuhrin covo Special Rapporteur, Tom H. Andrews nih ramdang hna sin ah sawmnak bia a chim. “Caan a tlai hlan ah a fek deuh mi le a ṭha deuh mi lam cu kawl in, faak deuh i khuaruat ding in kan sawm hna,”
tiah Myanmar ram kong ah he pehtlai in ralhrang nih nawlngeihnak an laak kumkhat a tlin hnu ah a chim.
Ralhrang phu nih nawlngeihnak an laak kumkhat a tlin tiang ah UN security council nih Myanmar ramchung i
hriamthil luhnak kong ah faak deuh in renghnak a tuah khawh lo caah sualnak ngei lo mipi nunnak tam tuk a liam, tiah a chim fawn. Cun, Myanmar ramchung ralhrang phu sin ah hriamthil a luh lo i, phaisa le an duh ning in rian an ṭuan khawh lo nakding ah ramkip pawl cu i zuam cio ding in a sawm hna. UN American ambassador Linda Thomas-Greenfield zong nih Myanmar ram kong ah ramkip nih faak deuh i tuaktan ding in nizan February 1 ah forhfialnak bia a chim ve.
Myanmar ram hriamthil bawmhchanhnak cu ngol ding in UN chungtel ram hna cu nawl an rak si. Myanmar ram ah hriamthil bawmhchanhnak ngol ding,
ramkhel lei thongtla mi vialte thlah dih ding le Myanmar nih democracy lamthluan a zawh khawh ṭhan nakding ah UN security council cu faak deuh i cawlcang ding in nawlnak a tuah, tiah VOA nih a ṭial. =Putaoo-PDF Nih Ralhrang Sakhan An Laak Khawh; Ralhrang nih nawlngeihnak an laak kumkhat a tlin ni nizan February 1, zinglei suimilam 10:30 hrawng ah Kachin ramkulh, Putaoo pengchung ah um mi ralhrang phu sakhan pakhat cu
Putaoo-PDF nih an laak khawh, tiah theih a si. Kachin ramkulh, Putaoo pengchung ralhrang phu hna sakhan
Suampiyan cu KIA le Putaoo-PDF phufonh nih an kahdoh hna i, an laak khawh, tiah cathanh an chuah fawn. Putaoo-PDF nih cathanh an chuah ning ah cun, Suampiyan ralhrang sakhan laak a si lio ah, cu sakhan chung in hriamthil tampi le ralhrang phu kuttang rianṭuantu chungtel pakhat cu a nun bu in tlaih a si, tiah an thawng thanh. Than Lwin Khet. Cre-TCP