Ti lawng hna hi ti ah um ding in serhmi a si. Natein ti lawng cu ti chungah a tla sual ahcun a lengah ummi ti ruangah si lo in a chungah ti a lutmi ruangah a si. Cu ve bantuk in, Minung zong hi vawlei ah um ding in Pathian nih a serhmi kan si bantuk in le vawlei ah kan tlawngleng lio ah, vawlei thil, chawva, rumanak, i nuamnak nih kan lungthing/chungril ah a kan lut hnawh sual cik cek ah cun, ti lawng ti chungah a pil
bantuk in minung zong hi mah vawlei chungah a pik dingmi lawng te kan si ti kha philh lo ding.
Cucaah mah vawlei ah a kan hrawhtu dingmi hna hi vawlei thil a si ti kha philh lo tin vawlei chawva,
rumnak, nuamnak kawl zia thiam hna u sih. Mi tampi cu vawlei thil nih kan chungah a kan lut hnawh cang caah i pum zong thei lo in rian kan tuan i, thatein it caan zong ngei lo in le chungkhar tlingtein rawl zong ei ti kho lo tiang kan um cang. Zeitik poah ah Tilawng ti ah a um bantuk kan si ti kha philh lo in, Tilawng a chungah a lutmi ti nih tilawng a hrawh bantuk in
vawlei thil nih a kan hrawh lo nak ding caah ralrin tein um peng hna u sih. From-Chinpage Editor
Kawlram thawngpang..Rakhine Ram Ah, Ni 4 Chung Ah Bomb Voi 3 A Puak I, Tualchung Mi 2 An Thi!:
Rakhine ramkulh SAC ralkap kuttang um battalion umnak pawng ah, ni 4 chung ah bomb voi 3 a puak i, tualchung mi 2 nunnak a liam pinah pakhat faak ngai in hliam a tuar tiah theih a si. Bomb hi July 1 in 4 chung ah a puak i, nihin July 4 ah Kyaukṭaw peng SAC ralkap battalion umnak pawng ah caw zohkhenhtu pa pakhat nih chunhnu suimilam 1:00 luan hrawng ah bomb aa lamhsual i, faak ngai in hliam a tuar hnu ah a nunnak liam, tiah theih a si.
Cun, July 1 ah khan Kyaukṭaw khuachung khah-mah-yiah 375 battalion pawng Leikuang ah caw
zohkhenhtu WatHmai khuami U Tan Sein Mawng cu bomb i lamhsualnak in a ke khatlei a bul i,
Siṭṭwe siizung ah a nunnak a rak liam. Minpia peng AhṭatKhaChiMyaung khuami Ko Mawng Hlah Htun cu Minpia peng SAC ralkap camp hmunkhat pawng ah, rua sam ding in a kal lio ah bomb i lamhsualnak in a ke khatlei a bul caah thlopbul cuahmah lio a si, tiah theih a si. Kum 2022 chung ah Rakhin ramkulh in bomb ruang ah nunnak a liammi le hliamhma tuarmi 20 leng an um cang, tiah REC nih an thanh.
==Chaung U Peng Ah SAC Ralkap Bomb Puahhnawh An Si I Ralkap 5 An Thi: Sagaing ramṭhen
Chaung U peng ah ke in rallam a sial mi SAC ralkap hna cu bomb puahhnawh an si i ralkap 5 an thi,
tiah Chaung U Local Defense Force nih nihin ah thawng an thanh. Chaung U nichuah lei Natyekaan khua le Koipyintaw khua karlak lam hmunkhat ah i dup in, a kir mi SAC ralkap 15 cu nihin(July 4) zing Sml 5:30 ah timhtuah cia mi bomb in puahhnawh an si, tiah theih a si. Bomb puahhnawh an si hnu in bomb nih a khen lo mi SAC ralkap hna nih Chaung U Local PDF (CHU LDF) pawl an um lai an tiah an ruahnak hmun poh cu ruahdamh in an kah nain
CHU PDF lei hliam tuar um lo tein hnu an tolh kho tiah theih a si. Cu kahdohnak cu T.G.R (Myaung),
Farmer Revolution Force(Chaung U) le Monywa Lightning PDF an i bawm in tuah mi a si tiah theih a si.
==Shwepyitha Ah Tlakrawh Inn A Cimh Ruangah Rianṭuantu Minung 7 Hliam An Tuar! Yangon, Shwepyitha peng No.5 sang, Patamya lam ah sak cuahmah lio mi tlakrawh inn dot 2 cu nihin (July 4) zinglei ah a cim i rianṭuantu minung 7 hliam an tuar tiah mibawmchantu phu in rianngeitu pakhat nih Voice of Myanmar ah a chim. Hliam a tuar mi hna cu nu pakhat le pa 6 an si. A cimhnak hmun ah Fire Department in rianṭuantu hna le
mibawmchantu phu hna kal in, hliamtuar mi hna cu Innsein siizung le Yangon siizung ah an kalpi hna,
sinain an hliamhma kongah lungrethei tuk cu an si lo,” tiah bawmchantu hna in rianngeitu nih a chim. Bawmchamtu hna nih inn a cimhnak hmun ah a taang mi minung an um le um lo an kawl hna, tiah sangchung mi hna sin in theih a si. 2021 October 15 ahkhan Dagon nichuah lei No. 6 sang Mayyu lam ah inn pakhat a rak cimh ruangah minung 3 an thi i, midang 8 hliam an rak tuar. Cre-TCP