SAC Ralkap Nih Myine Peng HṭayAung Khua An Duah I, Inn 100 Leng An Kaang!: Magwe ramṭhen, Myine peng HṭayAung(ဌေးအောင်) khua cu SAC ralkap nih July 12, ah luhhnawh in an duah caah khuachung inn 100 leng an kaang, tiah tualchung mi nih an chim. Khuami pakhat nih cun, “SAC ralkap an phan ti thawng kan theih cangka in khuami vialte cu kan zaam dih, khuachung ah zankhat an riak i,
zinglei an chuahpah ah khua cu an duah,” tiah a chim. SAC ralkap nih an duahmi HṭayAung (ဌေးအောင်)
khua cu Sagaing ramṭhen le Magwe ramṭhen ramri ah a ummi a si i, inn 150 hrawng umnak khua
pakhat a si. Khuami hna cu a himnak hmun ah an zaam dih hna, tiah theih a si. Cu kong he pehtlai in SAC ralkap lei nih cathanh an chuahmi a um rih lo. SAC ralkap lei in chim phuannak nawlngeitu general Zaw Min Hṭun nih cun, raltuk an kal tikah khuachung ah luhpah le inn khangh ti bantuk cu kan tuah lo, tiah a rak chim bal. Nihin July 13, zaanlei ah KyaukSawng(ကျောက်စောင်း) khua pawng ah tualchung hriamtlai phu le
HṭayAung(ဌေးအေင်) khua in a chuakmi SAC ralkap kar kahdohnak a chuak, tiah tualchung mi nih an chim.
Thawngpang dang…Phaekhung Peng Kahdohnak Ah SAC Ralkap 5 An Thi:
Phaekhung peng, SawngNanKhae(ဆောင်နန်ခဲ) khua nichuah lei ah umhmun a khuarmi SAC ralkap sakhan cu Phaekhung PDF battalion 2 nih nihin July 13, chun suimilam 12:00 ah an kah hna. Cu kahdohnak ah cun SAC ralkap 5 an thi i, hliamhma tuar zong an tam, tiah Phaekhung PDF battalion 2 nih cathanh an chuah. SAC ralkap nih umhmun an khuarnak SawngNanKhae(ဆောင်နန်ခဲ) sakhan cu
Phaekhung PDF nih a thli in an kah hna hnu ah kaphnih kahdohnak cu suimilam
pakhat hrawng a chuak tiah theih a si. Kahdohnak chung ah Phaekhung um
SAC ralkap hna nih hriamngan in an kahbawmh hna nain PDF lei hliamhma tuar an um lo, tiah theih a si. Phaekhung pengchung LoiMaKu(လွယ်မကူး) tlangcung ah a ummi SAC ralkap sakhan zong Phaekhung PDF battalion 2 nih hriamngan in kan kah hna caah kahdohnak a chuak, tiah Phaekhung PDF battalion 2 nih cathanh an chuah.
==Cycle In Aa Chokmi SAC Ralkap Le Lyusawhṭi Bomb Puahhnawh An Tong I, 6 An Thi!
Sagaing ramṭhen Ayadaw peng, NgwayDwin (ငွေတွင်း) khua ah July 12 zaanlei suimilan 4:00 hrawng
ahkhan cycle 8 in a chuakmi SAC ralkap le pyusawhṭi hna cu bomb puahhnawh an ton caah minung 6 an thi, tiah theih a si. “SAC ralkal hna cu cycle he ral veng ding in an chuak i, an kal tawnnak lam ah bomb kan hmanh. Cycle pakhat ah minung pahnih an cuang. Bomb kan hmanhmi cu a puah caah SAC ralkap le pyusawhṭi 6 an thi, tiah kan theih. Bomb a puah hnu in SAC ralkap hna cu cycle 5 he lawng NgwayDwin(ငွေတွင်း) khua ah an kir,”
tiah TaManDaw(တမန်တော်) hriamtlai phu APOSTLE in ṭuanvo ngeitu nih a chim.
==Kokek Harnak Ruangah Ayeyawady Ramṭhen In Thlakhat Chung ah Minung 3 An Thi!:
Ayeyawady ramthen in thlakhat chung lawng ah kokkek harnak voi 23 a chuak i, minung 3 an thih pinah 3 hliam an tuar, tiah Ayeyawady ramṭhen Natural Disastor Management rianṭuantu hna sin in theih a si. June 2 in July 12 tiang ah kokkek harnak voi 23 a chuak. Cu harnak hna cu meikanghnak, thlichia hrang, Ṭektla, vawlei mincimhnak ti bantuk pin ah sahrang sehnak le tisartlam sehnak tibantuk hna an si, tiah theih a si.
Ṭektlaknak in minung 3 an thi i pakhat hliam a tuar. Meikanghnak in mi pakhat hliam a tuar i
tisartlam sehnak in mi pakhat a thi. Kokek harnak ruangah thilri sungh mi cu phaisa in Kyats 11.66 million man hrawng a si, tiah theih a si. Kokek harnak ruangah umnaktlak lo tiang in a rawk mi inn 15, a cheu a rawk mi Inn 150 le ṭhialtak a hau mi inn 14 a um, tiah theih a si. Hi kokkek harnak ruangah hin chungkhar 179 cu harnak an tong, tiah theih a si. Cre-TCP