Myaung Le Yesgyo Aa Tonnak Ah Kahdohnak A Chuak I, SAC Ralkap 20 An Thi: Sagaing ramṭhen, Myaung peng le Magwe ramṭhen, Yesagyo peng aa tonnak ah SAC ralkap le tualchung PDF cu nihin July 6 zing 7:30 ah an i kap i, SAC ralkap 20 an thi tiah theih a si. “Kahdohnak cu Sml 2 tluk a rau i SAC ralkap lei nih vanlawng in an kan kah.
Tualchung PDF lei hliam tuar um lo tein hnu kan tolh kho,” tiah PDF Myin Chin pengkomh nih an thanh.
SAC ralkap hna cu Myin Chin pengkomh batallion 1,2,3, PDF-Nuahtoogyi, Myaung Special People
Defense Force le Phoenix(Yelaygon)(ရေလယ်ကျွန်း) ṭangrual phu i bawm in an doh hna tiah theih a si. Magwe ramṭhen Gangaw peng Yesein(ရေရှင်) khua ah rallam a sial mi SAC ralkap hna zong nihin zinglei suimilam 9 ah Magwe hriamtlai phu le PDF-Gangaw nih bomb an puahhnawh hna i mawṭaw 2 an rawh lengah a thi mi le hliam tuar an tam lai, tiah Gangaw PDF nih an thanh.
=Natogyi PDF Camp Luhhnawh A Tong I, Rawl Chuangtu Pakhat SAC Ralkap Nih An Tlaih!:
Mandalay ramṭhen, Natogyi People Defense Force (နွားထိုးကြီး) camp pakhat cu
SAC ralkap nih an luhhnawh tiah Natogyi-PDF nih July 6 ah an Facebook cahmai in thawng an thanh. July 3 ahkhan SAC ralkap nih camp cu luhhnawh in an doh i hriamthil zeimawzat kan sung, rawl chuangtu pakhat zong tlaih a tong, tiah Natogyi-PDF in rianngeitu pakhat nih a chim. “Khuami pakhat cu ramlak a kal lio ah SAC ralkap nih an hmuh i,
SAC ralkap nih cun an tlaih i an hrem hnu ah PDF camp umnak a chim.
Camp umnak fiang tein an theih hnu ah SAC ralkap 50 tluk nih PDF camp cu an luhhnawh,”
tiah NPDF in rianngeitu nih a chim. SAC ralkap nih an tlaih mi rawl chuangtu cu Wetlu(ဝက်လူး) peng palik camp ah an check lio a si, tiah a chim chap. Mizapi nih an bawmh chom mi hriamthil hna cu an sungh caah NPDF nih mizapi sin nawlnak an tuah i, dohthlennak a dihdongh tiang an ṭuan khawh nakhnga kan bawm rih ko u tiah nawlnak an tuah!
==Sagaing Ramṭhen Chung Sianginn Onnak Thlakhat Chung Ah Cachimtu 8 Thah An Tong Cang!:
2022-2023 cacawn kum sianginn onnak thlakhat chung ah Sagaing ramṭhen chung
SAC Education department in cachimtu 8 nak tlawm lo thah an tong cang, tiah theih a si. Education department rianṭuantu pakhat nih cun, “Sianginn onnak thlakhat chung ah thah a tongmi cachimtu minung 8 nak tlawm lo an si i, pehtlaih khawh lo in a tlaumi cachimtu zong an um rih,” tiah a chim.
Nizaan July 5, chun ah Yee-U pengkomh Depeyin peng Kyunṭaw khua ah cachimtu
pa pakhat le nu pakhat cu Kyunṭaw khua le Innpin khua kar hleidonh ah an kut hnulei hriṭem
buin, an hngawng tan in thah an si, tiah theih a si. July 1 chunhnu zong ahkhan cachimtu pa pakhat cu Mawlaih(မော်လိုက်) pengkomh PhawngPin (ဖောင်းပြင်) peng fimcawnnak zung in a kir lei lampi ah thah a rak tong fawn. Cun, July 3, chunhnu ah KawLin(ကောလင်း) peng TayatKhung(သရက်ခုံ) khua ummi siangniamrun cachimtu
U Zaw Win Thein cu a rianṭuannak MawngKaw(မောင်းကော်) khuachung sianginn
kalnak lam ah thah a tong, tiah theih a si. Cu ni ṭhiam ah cun Cachimtu Zaw Win Thein
a farnu TayatKhung(သရက်ခုံ) siangniamrun i cachimtu sayamah Daw Oungma Win cu innchung a um lio ah thah a tong, tiah theih a si. Tukum cacawn kum sianginn onnak June thla zarhkhatnak ah Monywa peng Sita khua sianginn ah sianguk ṭuanvo latu cachimtu nu(sayamahgyi) cu Monywa in a rianṭuannak hmun a kal lei,
Monywa-Ayardaw motor lampi ṬhaNawngWin(ထနောင်းဝင်း) khua le KyaukKa(ကျောက္ကာ)
khua kar ah thah a tong. Cu ni ṭhiam ah cun Shweboo pengkomh Wetlet peng BuṬae(ဘိုတဲ) khua sianguktu (sayamahgyi) le a nau cu an umnak inn ah thah an rak tong. Sagaing ramṭhen Monywa, Wetlet, KawLin, Depeyin le Phawngpin pengchung ah SAC Education department in cachimtu 8 cu tukum sianginn on thlakhat chung ah thah an tong cang, tiah theih a si. Cre-TCP