=Nihin February 1, 2022 ah CDF Thantlang/CNA le ralhrang karlak kahdohnak Thantlang khuachung ah a chuak i ralhrang lei in 5 an thi, 1 hliam a tuar. Mizapi Ralkap lei hliamtuar um lo tein hnu an tolh kho, tiah theih a si. Hi Kahdohnak ah ralhrang lei nih hriamngan le hriamhme in an duhnak poh an kah caah Thantlang khuachung inn zeimawzat a kang,
CDF Thantlang nih ralhrang cu an hramphuk tiang kan doh lai, tiah an cathanh chung ah an langhter.
=Min Aung Hlaing hruai mi ralkap bu nih nawlngeihnak an laknak cu nihin February 1 in kumkhat a tling cang.
Cu kumkhat chung ah cun ralhrang uk duhlonak cu a lamkip in langhter an si. CDF-Thantlang zong nih ralhrang uknak an hram chah ding le Chin miphun hna nih mah tein i tawlrel khawh nakding ah ralhrang phu cu doh a si. CDF-Thantlang peng chung in khua 51 ah khuabawi thim an si cang. Thantlang pengchung mipi uknak lei bu cu a luancia November 2021 ah rak dirh a si.
Thantlang peng palik, ngandamnak, fimcawnnak, lamsul lei, biaceihnak le cinthlaknak lei department pawl
zong ser an si cang, tiah nihin February 1 ah Thantlang peng mipi uknak lei bu nih cathanh an chuah.
Thantlang peng uknak lei bu sernak tang ah ngandamnak lei department in sii-inn zong hon an si i mizapi ngandamnak ca ah rian an ṭuan, fimcawnnak lei department in khua 51 ah primary le middle sianginn 51 zong hon an si cang. Palik lei department in Thantlang pengchung phungning tein phungphai(law and enforcement) a kal khawh nakding ah
rianṭuannak an ngei. Biaceihnak lei department in mipi hna nih an langhter mi; thilsual a cang mi dihlak
cu phungning tein, aa tlakning in le Lai phung he aa tlak ning in tawlrel an si. Cun, Lamsul lei department in khuakhat le
khuakhat pehtlaihnak lamsernak le lam rawk remhnak rian hna cu ṭuan an si cang. 2022 kum chung ah Thantlang peng uknak lei bu sernak in mipi hna nih himnak an hmuh i, uknak lei ah tlamtling tein an cawlcangh khawh nakding le ngandamnak lei fimcawnnak lei kong ah pehzulh tein rianṭuan a si khawh nakding caah timhtuah a si.
Ralhrang uknak an hram chah ding, mah tein i tawlrel khawh nakding le federal democracy hmuh
khawh nakding ah mizapi nih hnu tolh lo i ṭanpi ding in Thantlang peng uknak lei bu nih cathanh an chuah.
=Mi Sawhsawh Thuam He Falam khuachung Ralhrang Ah An Vaak!; Nihin Febuary 1 ah Chin ramkulh Falam khuachung ah ralhrang pawl cu mi sawhsawh thuam he meithal i put in, cycle he zanlei suimilam 4 hrawng in 6:40 luan tiang an i chawk, tiah thawng kan theih.
Palik cu an uniform an i hruk i ralkap cu mi sawhsawh thuam an i hruk. Cycle pakhat ah minung pahnih an cuang i a hnu lei ṭhu mi nih G-3 meithal aa put. A bik in mi chawklet an tamnak hmun le dawr umnak hmun pawl ah an i chawk, cuhlan deuh ni hna ah cun zaan ah ralkap thuam he minung 10/20 fonh in an hriam tling te i put in khua chung ah ke in an i chawk tawn. Cre-TCP