Chin ramkulh, Matupi peng ah SAC ralkap le CDF- Matupi kar kahdohnak a chuak i SAC ralkap 6 an thi, 7 nak tlawmlo hliam an tuar tiah CDF-Matupi nih nihin April 22 ah an thanh. Nihin April 22, zinglei suimilam 8:20 hrawngah Matupi-Paletwah lamcung ah ummi Thaeboi SAC ralkap sakhan ah thazaang chap ding in a kalmi SAC ralkap le CDF-Matupi cu mengtung 16 ah kan kap i kan nih lei hliamtuar le thilo kan umlo tiah CDF-Matupi nih langhter.
Matupi peng CDF-Matupi hmunhma chungah SAC ralkap hna nih thazaang an chap caah kahdohnak pehtlai in a fak kho tiah an thanh chih. A luancia April 20, Mindat-Matupi lam ah SAC ralkap le CDF- Matupi kar kahdohnak a rak chuak i cu kahdohnak ah cun SAC ralkap bu-gyi telh in 8 an thi, 5 nak tlawmlo hliam an tuar.
Kawlram thawngpang dang…Sagaing ramtthen, Monywa peng Kyauksitpung khuapawng ah SAC ralkap motor nganmi pakhat cu nihin April 22, zinglei suimilam 7:20 ah tualchung hriamtlai phu nih bomb an puahhnawh hna caah motor chung ummi SAC ralkap 10 nak tlawmlo an thi tiah Chindwin Attack Force nih an thanh.
“Kyauksitpung lei ah a kalmi SAC ralkap motor ngan chungah a cuangmi cu an tam ngai, pa-de-ta bomb puahhnawh an si, minung 6 lawng an nung” tiah Chindwin Attack Force in tuanvo ngeitu pakhat nih a chim.
SAC ralkap bomb puahhnawhnak cu Monywa pengkomh battalion 2 Chindwin Attack Force i tat-khuai- 4 Fight For People-FFP le tat-khuai 4 he ttangtti Yan Gyi Aung phufonh nih an tuahmi a si.
SAC ralkap motor bomb puahhnawh an si lio ah an hnu in cycle he a kalmi civil 2 zong hliam an tuar tiah theih a si. “SAC ralkap motor hnulei in cycle he a kalmi civil 2 hliam an tuar, an thawhkhawh cu kan hmuh ko, Hi kongah dikthlir in kan thei rihlo” tiah Chindwin Attack Force in tuanvo ngeitu pakhat nih a chimchap. Civil 2 hliamhma an tuar mi cu kan lung thalo, mizapi hna nih SAC ralkap motor he neihniam in um kallo ding le hrialding ah Chindwin Attack Force nih nawlnak an tuah.
=Kumkhat leng chungah thongtla luatnak a hmutu minung 57,000 leng chungah ramkhel thongtla 8% lawng an i tel tiah theih a si. 2021, February 1 in 2022 April 18 tiang ramchung thonginn ah tazacuai in tlaihkhih le thongthlak a tongmi dihlak minung 57,091 an si i, cu hna cu SAC ralkap nih voi 7 tiang luatnak a pek hna tiah ISP-Myanmar nih a thanh.
Khomhsuat khawhmi cazin ningah luatnak a hmutu hna chung in ramkhel lei he pehtlaihnak a ngeimi minung 4,556 lawng nih luatnak an hmuh i, luatnak a hmuhmi hna dihlak chungin ramkhel lei thongtla zatuak pariat (8%) lawng nih luatnak an hmuh. Luatnak hmu mi zatuak sawmkua (90%) leng cu ramkhel lei he pehtlaihnak a ngeilo mi, sualnak ruang le fir le lainawn ruangah sualphawt mi thongtla an si. Cucaah SAC nih ramkhel thongtla hna cu luatnak a pe ek hnalo ti khawh a si tiah ISP-MYANMAR nih a thanh.
SAC nihcun, 2021, February 21 ah minung 23314, April 17 ah minung 23407, June 30 ah minung 2296, October 12 ah minung 5636, 2022 February 12 ah minung 814, March 2 ah minung 5 le April 17 ah minung 1619 tiin voi 7 tiang thongtla luatnak a pek hna. AAPP nih cazin an langhter ning ah 2021, February 1 in 2022 April 18 tiang ah SAC dohkalh ruangah tlaihkhih a tongmi thongtla dihlak hi minung 13,293 an si. Cre-TCP