Khuapau dohthlennak kumkhat leng chung ah Sagaing ramṭhen le Magwe ramṭhen a biapit biknak lam, 90% cu PDF nih an control khawh cang tiah NUG nih an thanh. Cu bia cu nihin June 21 ah media he tonbiaruahnak an ngeih ah NUG nih an chim mi a si. A thlithup kahdohnak lawng si ti lo in hmaitonh kahdohnak zong kan tuah khawh cang, tiah Press Secretary in U Nay Phone Lett nih a chim. Cu bantuk ṭhiam cun Yangon, Mandalay, Pago ramṭhen zong ah SAC ralkap hna cu
a thlithup in kah an si. Cun, ṭangrual hawi a si mi tlangchung hriamtlai KNU, KA, CNF le KIA zong nih
ramkulh hmunkip cio ah a hlan nakin hmunram an control khawh cang, tiah U Nay Phone Lett nih a chim.
Thawngpang dang…Sagaing ramṭhen Salingyi peng, Moe Kyoe Pyin nitlaklei khua cu nihin June 21 zinglei Sml 11:30 ah SAC ralkap nih a khua ning in an khangh, tiah tualchung mi nih Yangon Khit Thit media ah an chim. Wanbao campany ah umhmun a khuar mi SAC ralkap nih an khangh mi a si i, zing Sml 8 tluk ah Phaungka thlanglei khuami 2 an tlaih fawn hna, tiah theih a si.
“Tuzing Sml 8 in Wanbao ah umhmun khuar mi SAC ralkap cu thazaang tampi he an ra.
Phaungka khuami 2 an tlaih hna i, Moe Kyoe Pyin khua lam hmuhsaktu ding ah an kalpi hna.
Moe Kyoe Pyin nitlak lei khua an luh ah mizapi innlo cu an khangh. Zing Sml 11:30 tluk in an thok i, a rawk mi zat hi fiang in kan thei kho rih lo,” tiah tualchung mi pakhat nih a chim. Tualchung mizapi hna cu a himnak hmun ah an zaam i, an pawngkam mipi hna zong an zaam ve. SAC ralkap nih hrimngan in an duhnak hmun poh ruahdamh in an kah tiah tualchung mi sin in theih a si.
Cun, Sagaing ramṭhen Watlet peng Mingalar Yesin khua cu nihin June 21 chun Sml 1 tluk ah
SAC ralkap nih mipi innlo an hrawhpiak hna, tiah tualchung mi nih an chim.
SAC ralkap hna cu khuachung ah civil thuam i hruk in, a hmai bik ah minung 4 an kalter hna. Cu hnu ah ralkap 30 nih an hnu lei in an zulh hna. Cupinah a dang ralkap 40 zong an kal chap, tiah theih a si. SAC ralkap hna cu phuhnih ah i ṭhen in khuachung inn an boh i an hawh piak hna, tiah theih a si.
== Sagaing ramṭhen Indaw peng ah, a luancia nithum chung ahkhan SAC ralkap le tualchung
hriamtlai phufonh kar kahdohnak voihnih a chuak i, cu kahdohnak ah cun SAC ralkap 20 leng an thi,
tiah Indaw Revolution nih an thanh. Indaw peng Aung Kung khua le Maw Ṭaith khua pawng hrawng ah June 18 in June 20 tiang kahdohnak voihnih a chuak. SAC ralkap hna cu KIA le Kata pengkomh battalion 2 Indaw tualchung hriamtlai phufonh nih an kah hna. June 18 ni kahdohnak ah SAC ralkap lei 20 hrawng an thi i, hliamhma tuar zong an zeimawzat an um. June 20 kahdohnak ah SAC ralkap 3 nak tlawm lo an thi ṭhan i,
minung 10 hrawng nih hliam an tuar, tiah Indaw Revolution nih an thanh.
June 18 kahdohnak ah SAC ralkap lei nih hriamngan an hman tuk caah kahdohnak a chuahnak hmun pawng ah a ummi ngakchia 4 le upa pakhat cu hriamngan nih a tlak hna caah hliamhma an tuar. June 20 kahdohnak ah tualchung hriamtlai phufonh lei in minung pakhat nih hliamhma a tuar ve, tiah an langhter. Kaphnih kahdohnak ah hliamhma tuar mi SAC ralkap hna cu Indaw palik sakhan ah thlopbul an si, tiah Indaw Revolution nih an langhter chih. Cre-TCP