Tamu In Kalay Lei A Kir Mi SAC Ralkap Mawṭaw Bomb Puah An Si I, Ralkap 30 Tluk An Thi: Tamu peng ah SAC ralkap mawṭaw cu nihin (June 27) zinglei Sml 9 tluk ah bomb puahhnawh an tong i ralkap 30 tluk an thi, tiah PDF(Tamu) batallion 3 in rianngeitu nih a chim. Tamu in Kalay lei ah a kir mi an si i, ralkap 100 tluk a cuang mi mawṭaw run an si tiah theih a si. Bomb puahnak ahcun mawtaw 3 an rawk, tiah tualchung mi nih an chim.
SAC ralkap lei nih Yanlinphai le Witok khua cu hriamngan le hriamhme he ruahdamh in an kah i,
khuami vialte cu an zaam dih hna, tiah theih a si. June 23 zong ah khan Yanlinphai le
Khunmonnun khua pawng ah Tamu PDF batallion 3 nih SAC ralkap mawṭaw 20 cu bomb an puahhnawh hna. Cu tan ah cun mawṭaw 2 an rawk tiah theih a si. Tamu PDF hruainak in PDF phufonh nih Tamu peng Panta khua ah umhmun a khuar mi SAC ralkap le pyosawtee pawl cu June 22 ah khan an kah hna i, ralkap le pyosawtee 25 an thi tiah PDF(Tamu) batallion 3 nih an thanh.
=Palaw Ah Kahdohnak A Zual, SAC Ralkap 6 An Thi: Myait pengkomh, Palaw peng ah
SAC ralkap le tualchung PDF phufonh kar kahdohnak faak ngai in a chuak, tiah Palaw PDF nih nihin (June 27) ah an thanh. Nihin zing Sml 6 hrawng ah Palaw peng Nantaung( khua ah umhmun a khuar mi SAC ralkap cu Palaw PDF le ṭangrual phu nih hriamngan le hriamhme in an kah hna, tiah an cathanh ah an langhter. Kahdohnak cu zing Sml 8 tiang a rau i kaphnih in hriamngan le hriamhme in an i kap.
Kahdohnak ah cun SAC ralkap 6 an thi i, PDF phufonh lei hliam tuar an um lo, tiah theih a si.
Tu lio boruak ah SAC ralkap nih thazaang an hun chap chin lengmang caah zeitik caan paoh ah kahdohnak a chuak kho mi a si tiah mipi sinah theihternak an tuah.
=Rallam A Sialtu SAC Ralkap Bomb Puahhnawh An Ton Caah Ralkap 4 An Thi: Magwe ramṭhen Poah peng NayTat khua pawng ah rallam a sialtu SAC ralkap cu bomb puahhnawh an ton caah ralkap 4 an thi, tiah Myine peng tualchung hriamtlai phu in Bu Latya nih a chim. Nihin June 27 zaanlei suimilam 5:00 hrawng ah Naytat khua tlang lawng lam lei ah ke in rallam a sialtu
SAC ralkap 30 hrawng cu bomb lung 4 puahhnawh in an si, tiah Bu Latya nih cun a chim.
“Cu bombpuahnak ah cun SAC ralkap lei 4 an thi i, minung 4 cu hruai chom in Naytat phungki
sianginn hmun ah an luhpi hna lio kan hmuh. Naite ah helicopter in SAC ralkap an chiah hna i, cu ralkap hna cu ke in rallam an sial,” tiah Bu Latya nih a chimchap. Atu ah cun SAC ralkap hna cu Naytatphungki sianginn chung ah umhmun an khuar i, minung 20 luan hrawng lawng an taang, tiah theih a si.
=US Nih Asia Ah NATO Bantuk Phu Dirh Aa Tim Tiah North Korea Nih US Sual Phawt!:
US nih Asia ramchung ah NATO bantuk phu dirh aa tim cuahmah, North Korea cozah thlak
aa timhnak a si, ti in North Korea nih US cu sual a phawt. North Korea ral kham a herh ahcun US hriamnam hna cu tam deoh le ṭhawng deoh in S. Korea ah chiah ding in US President le South Korea President karlak ah hnatlaknak an tuah tiah North Korea nih a lunghrinh hna. US nih Japan le South Korea ram hna he raltuk cawnnak cu zapi hmuh in a tuahpi hna caah NATO bantuk in Asia ramchung zong ah phu dirh aa timh, tiah North Korea foreign minister nih US le S.
Korea cungah lunghrinnak an ngeih kong a chim. US, Japan le South Korea hna cu nai ah
khan raltuk cawnnak an ngei i, a liamcia Kum 4 chung ah a vawikhat bik vanlawng phortu tilawngpi cu
US nih raltuk cawnnak ah a hman. Aung San Suu Kyi Cu Naypyidaw Thonginn Ah Chiah Lo Ding In ASEAN Special Envoy Nih Nawlnak A Tuah!: Tlaih a tongmi Aung San Suu Kyi cu Naypyidaw thonginn ah chiah lo ding in ASEAN Special Envoy on Burma Prak Sokhon nih June 27 ah nawlnak a tuah. ASEAN Special envoy cu June 29 ah Myanmar ah a vawihnihnak rak tlawng ding a si i, a rat hlan ah atu bantuk in Aung San Suu Kyi kong cu a chim.
Sualphawtnak case 20 leng in tazacuai a tongmi Aung San Suu Kyi cu Naypyidaw thonginn ah an ṭhial a si.
Myanmar rampi a ṭhat ṭhan khawh nakding ah cun Aung San Suu Kyi cu a biapi tukmi a si ti cu vawlei cung ramdang hna le Myanmar mipi tam deoh zong nih an cohlan dih, tiah SAC sin cakuat a tialmi ah cun a langhter, tiah theih a si. Ruahnak lungput khat lei lawng in kal ahcun remdaihnak kong ah zeitik hmanh in a hlawh tling kho lai lo, tiah Prak Sakhon nih cun a chim. Cre-TCP