Idoh a that lo ning cu chim haulo in kan thei dih ko lai, A ram chungah um mi cu chim lo, ramdang ah um mi zong nih ralkap kut in harnak kan tawn lo zong ah economy lei in kan tuar ve thiam tawn caah idoh nih thiltha a chuahpi mi a tlawm ngai. Ukraine president Zelenskiy le Russian President Putin cu Belarus ram khualipi Minsk ah meeting an tuah lai tiah media tampi nih an tial. Natein Ukraine lei nih Poland khualipi Warsaw ah i chawn an duh tiin an langter.
Natein a hnuah Russia nih, “Special Military Operation’ kan ngei mi a dih hlan cu remnak le
daihnak kawl an nih tim lo tiin Kremlin biachimnak nawlngeitu Dmitry Peskov nih a chim. Cre-CT
Thawngpang dang….. US nih Ukraine President Zelensky cu hmunhimnak ah kan in chiah lai tiah a nawl nain President Zelensky nih a al hna, tiah US Media pawl nih an langhter. Ukraine President Zelensky nihcun US nih hmunhimnak ah kan in chiah lai an timi cu, “Raltuknak cu meithal kah in a si, Kei ka herh mi cu zenkuan le hriamnam lawng si, tiah a leh hna,” ti in a biachim theitu pakhat chirhchan in an thlenglei ram media hna nih ṭial.
Washington Post nihcun, “US nih Ukraine bawmh ding ah ai tim,” tiah kaphnih cozah lutlai pawl
chirhchan in a ṭial ve. Russia ral ralṭha tein a dir onhtu Ukraine President Zelensky cu Social Media ah
thangṭhat a tong taktak, tuan deuh i bia a rak chim zong ah, “Nan kan tuk ahcun kan hmaifang/hmailei lawng nan hmuh peng lai, zeitik hmanh ah kan keng/hnulei nan hmu lai lo,” tiah an rak chim bal. A chim duhnak cu kan in ṭih hna lo i “hnu kan pil in ka in surrender lai lo” a ti duhnak si. Ukraine President Zelensky a zaam cang ti mi thawngpang a leng nain zahan zaan ahcun Zelensky le a kuttang hna nih Ukraine khualipi Kyiv kan chuahtak lo tiah video file in an chim.
Ukraine President Zelensky hi pesident a si hlan ah cun lemcang thiam tiah theihhngalh hmasa mi si. Cre-TCP
= Russia nih Ukraine a tuk nihnih hnu ah Russia President Vladimir Putin nih cun amah facebook ca
hmai ah Ukraine a tuknak cu huatnak siloin remdaihnak an duh ruang ah a tuknak kong a ṭial. President Putin nih cun, “Bia i ruah in ceihkhannak ngeih kan duh ko. Minsk agreement bantuk in, Ukraine cu Russia nih Cozah ah a cohlan mi Donbass Cozah kuttang ah i peknak caan ṭha kan pek. Ukraine nih a tuah ding mi cu a hraimnam kaltak in Donbass mizapi duh mi zulh lawng hi a si. Europe ram hna le US cozah he biaruahnak
zong kan rak ngei cang nain anmah lak in kan hmuh mi cu – kan biahalnak zeirelpiak loin hnulei chit lawng a si.
“Kha kum le caan vialte ah khan Thlanglei ram hna nih Ukraine an dirhkamh i Russian he ral tho ding in
an forh peng. Kum saupi chung cu kan ram innpa(Donbass ram) lak ah hriamthil a hman ca ah civil mi lak ah hriamthil hmang lo ding in kan rak nawl peng. Kan nawlnak cu hnulei chittak in kan ramri ah NATO hleipi an donh i Russia ram an kan kulh. Russia nih a tuah ve lo mi phihkharnak cu an hawikom ram hna nih an tuah fawn.” tiah a chim. President Putin nih cun kum 2014 kum ah Ukraine in a rak laak cang mi
Crimea kong a chim leng ah Cozah thar ah a cohlan mi Donbass ram ca ah ral an thawh lo kong a chim rih.
“Crimea zong kan chuh mi hna siloin anmah duhthimnak tein kan sin ah a hung kir mi an si. Donbass Cozah ca zong ah ral kan tho lo; Ukraine ram ah civil war a chuak. Cozah fek ah Russia nih kan cohlan mi Donbass cu Ukraine nih a kah leng ah, vawleicung ram dang hna sin ah Nuclear ralthuam ngeih a duhnak kong a langhter, cucu Russia ṭhihphaihnak a si. “Ukraine mizapi hna hi Russia mizapi hna he unau hrinkhat kan si nain an hruaitu pa le US nih ral ah an kan chuah; kanmah Russia huatnak thlaici an tuh.
Kan unau Ukraine mizapi nih zalonnak an hmuh khawh nakhnga kan bawmh hna lai. Ukraine cu a zalong mi ram le amah tein a dirmi ram a si lai i, Russia hawikom ṭha a si lai.
Ukraine cozah hi lentecelhnak bantuk men ah US nih ruat ti hlah sehlaw, kan ramri hin a ralkap vialte kirter hna seh, ti kan duh. “Hi(Ukraine) tukdohnak ah kan duh bik mi cu Ukraine ram ah ralkap nawlngeihnak zorter in daihnak umter a si. Kan unau civil mi hna nih nan temtuar hrimhrim lai lo, ral thawhter ding siloin daihnak tuah ding in kan ra; sinain daihnak umter ding in le sualnak tlauter ding in thazaang kan chuah a hau,” tiah President Putin nih cun Ukraine a tukdohnak kong fianternak a tuah. Cre-TCP