Myawady Peng Kahdohnak Ah SAC Ralkap 8 An Thi I, Hriamthil Zeimawzat Laak A Si: Karen ramkulh Myayady peng ah, July 13 ahkhan SAC ralkap le KNLA, PDF phufonh kar kahdohnak a chuak i, SAC ralkap lei ralbawi (major) tel in minung 8 an thi i, hriamthil zeimawzat zong laak a si, tiah nihin (July 14) ah Mipi ralkap nih an thanh. SAC ralkap sin in 5.56 kuan 705, MA kuan bawm 4, kutchah bomb lung 3, 60 mm kuan 2, kuanhme 1 le ralthuam zeimawzat an laak.
July 14 ah zohfelnak an ngei i, 5.56 kuan 3000 leng, kutcheh bomb lung 13, vawlei tang phum
mi bomb 12, 60mm mortar 1, MA kuan bawm 11, RPG-7 kuan lung 8, RPG zenthong 9,
Solar 1, NATO kuan 265 le hramthil dangdang an hmuh chap, tiah theih a si. Myawady-Waolay mawtaw lam le Tayat Hnapin khua kar kahdohnak a chuahnak hmun zong ah Cobra hriamtlai phu nih zohfelnak an tuah i, July 13 ah khan 5.56 kuan 400, MA kuan bawm 3, vawlei tang phummi bomb 3 le thilri dangdang hna an laak, tiah theih a si. Nihin July 14 i SAC ralkap nih an zaamtaknak hmun ah
cun 60 mm lung 9, RPG kuan 5 le hriamthil zeimawzat laak a si, tiah theih a si.
Thawngpang dang…Yee-U peng MimawngKung Khua SAC Ralkap Nih An Duah I, Inn 70 Leng An kaang!
Tar Pakhat A Kanghchih!: Sagaing ramṭhen, Yee-U peng, MimawngKung khua cu SAC ralkap nih July 13 ah luhhnawh in an duah caah inn 70 a kaang, cu meikang nih cun Daw Tan Hṭi(kum 90) cu a kanghchih i a nunnak a liam, tiah tualchung mi nih an chim. MimawngKung khua cu inn 100 hrawng umnak khua a si, khua mi hna cu khuachung ah an lut ngam rih lo, tiah theih a si. SAC ralkap hna cu MimawngKung
khua an chuahtak hnu in Wate le Tumawng khuachung ah an lut, tiah tualchung mi nih an chim.
==Khin-U Ah SAC Ralkap Bomb Puahhnawh An Si I, Ralkap 15 An Thi! Sagaing ramṭhen
Khin-U peng ah SAC ralkap mawṭaw hna cu tualchung PDF nih nihin July 14 zing Sml 4 ah bomb an puahhnawh hna i, SAC ralkap 15 an thi, tiah theih a si. Bomb puahhnawh an tonnak hmun cu Innpat khua pawng ah voikhat, Yee-U in an kir lei Myindaung-Thayatpinsuh lam ah voi 2, Kaanpat khua pawng ah voikhat tiin bomb voili puahhnawh an si i, ralkap 15 an thih lengah midang 30 hrawng hliam an tuar, tiah Khin-U thawnglatu pakhat nih a chim. “Nihin ah Siizung in SAC ralkap mawṭaw hme 3, mawṭaw ngan 1 le cycle 5 in SAC ralkap hna cu Khin-U lei ah an ra. Pyosawtee hna cu SAC ralkap 20 he an i bawm
i bomb zohfelnak an tuah. Cu lio ah cun bomb puahhnawh an si,” tiah a chim. Bomb a puahhnawhtu hna
cu KSO le tangrual phu DUGF/Wolf/ FAF/ Northern Tiger Group tel in Ldf phu 14 an i bawm, tiah KSO nih an thanh.
==Tanintharyi Peng Ah Tiva Ti A Lianh Caah Sianginn 2 An Khar! Tanintharyi ramṭhen, Myat pengkomh ah tulio hrawng cu ruah fak ngai in a sur caah tiva ti an ṭhang i SAC nih an on mi sianginn lak ah 2 cu an khar chung, tiah theih a si. July 13 zinglei in tiva cu feet 13 leng a ṭhang i, zaan ah cun feet 14 tiang a phan, tiah tualchung mi nih an chim. Tanintharyi i khausa mi pakhat nih cun, “Nizaan tiang ti a ṭhang peng i nihin ah cun feet 15 le 10 inches tiang a phanh cang caah sianginn an khar chung,” tiah a chim.
Pawah(ပဝ) khuakomh, Pawah-Thayakone khua le Thayakone in Tamoukchaung khua kalnak lam cu ti
nih ft’ 2 tiang a phum caah sianginn 2 cu June 13 in khar a si, tiah pengchung fimcawnnak zung nih an thanh.
==Myitgyina Ah PDF Pakhat Tlaih A Tong!: Kachin ramkulh Myitgyina Panmati sang chuahnak hauka ah KIA in training a dih mi PDF pakhat cu nihin (July 14) chun Sml 12 hrawng ah tlaih a tong, tiah theih a si. “Tlaih a tong mipa cu Myitgyina khuapi hauka ah an tlaih i, dalan nih thawng pek ruangah a si lai, tiah zumh a si. Ralkap nih nih lampi cu an kham caah a mawṭaw he kir awk a ṭha ti lo,” tiah mittu thawnglatu pakhat nih a chim. Tlaih a tong mi pa cu kum 27 hrawng a si i, meithal zun 8 le kuan 1000 pinah pumpak mawṭaw he an tlaih, tiah theih a si.
==Sagaing Ramṭhen Banmauk Peng Kahdohnak Ah SAC Ralkap 5 An Thi, A Nung In 5 Tlaih An Tong!
A luancia June 28 ah Sagaing ramṭhen Banmauk peng KIA, PDF phufonh le SAC ralkap kahdohnak ruangah SAC ralkap 5 an thi i, minung 5 cu an nung in tlaih an si, cu lengah hriamthil zong kan tlaih, tiah Banmauk Revolution – BR nih phungning tein cathanh an chuah. June 28 zaanlei le June 29 zinglei ah Simaw– TawngKyi pawng ah SAC ralkap le KIA, Kata battalion 2(Banmauk PDF, Inndaw PDF), tualchung hriamtlai phufonh kar kahdohnak a chuak i SAC ralkap 5 an thi, 5 cu an nun bu in tlaih an si. Tlaihkhih a tongmi SAC ralkap hna cu ṭha tein an zohkhenh hna, tiah theih a si. Cre-TCP