Kalay Peng Nithum Chung Kahdohnak Ah SAC Rlkap 42 An Thi, PDF 2 Nunnak A Liam!: Sagaing ramṭhen Kalay peng thlanglei ah July 11 in July 13 tiang SAC ralkap le PDF kar faak ngai in kahdohnak a chuak i cu kahdohnak ah cun SAC ralkap 42 an thi i tualchung hriamtlai phu lei in ralkap 2 an nunnak a liam, tiah tualchung hriamtlai phufonh nih cathanh an chuah.
July 11 in Kalay thlanglei Hakhalay khua pawnghrawng ah tualchung hriamtlai phufonh
Kalay pah-kah-phah, PDF Kalay, CNDF, CDF-KKG, RKDF, UGF Kalay phufonh le SAC ralkap
hna cu faak ngai in an i kap. SAC ralkap hna cu July 12, zaanlei suimilam 4:55 ah Tarsi khua phungki sianginn an phak ah tualchung hriamtlai phu hna nih faak ngai in an kah ṭhan hna i, SAC ralkap lei in a thimi zong an tam, tiah theih a si. July 13 ah zinglei suimilam 7:30 in zanlei 2:15 tiang SAC ralkap le PDF hna cu HṭauṭKyaint (ထောက်ကြန့်) khua pawnghrawng ah faak ngai in an i kap ṭhan. Nithum chung kahdohnak ah SAC ralkap 42 an thi i,
tualchung hriamtlai phufonh lei in ralkap 2 an nunnak a liam, tiah theih a si.
Thawngpang dang..Nawlngeihnak Laak Hnu In Bomb Puahnak Ruangah Tualchung Mi 119
Nunnak A Liam!: SAC ralkap nih nawlngeihnak an laak February 2021 hnu in May, 2022 tiang (thla 16 chung) ah bomb puahnak in sualnak ngei lo tualchung mi 119 nunnak a liam i, minung 309 hliamhma an tuar, tiah UNICEF nih an thanh. Cu thla 16 chung ah cun bomb voi 244 a puak, tiah bomb puahkehnak kong cazin khawmhsuattu UNICEF nih an langhter.
SAC ralkap nih uknak an rak laak hlan le uknak an laak hnu i bomb puahkehnak a chuakmi zat
cu tam ngai in aa thlau. SAC ralkap nih uknak an laak hnu February 2021 in December tiang ah bomb
puahkehnak voi 161 a chuak i, minung 86 nunnak a liam, 180 hliamhma an tuar, tiah an cathanh ning in theih a si. 2022, January thla in May thla tiang cathanh an chuahmi ah cun puahkehnak voi 83 a chuak, minung 33 nunnak liam i, 129 hliamhma an tuar. Cazin langhter mi chung ah SAC ralkap hna le ralvengtu phu puahhnawh in puahkehnak a chuakmi le hliam tuarmi relhchih a si lo, tiah UNICEF Myanmar nih cun an langhter.
==Sagaing Ramthen In Nikhat Chung Lawng Ah Tualchung Mi 4 An Thi!:
Sagaing ramṭhen chung Sagaing, Myinkin, Thicheih peng ah July 12 nikhat chung ah mithah
lainawnnak voi 3 a chuak i, minung 4 an thi tiah tualchung mibawmchantu phu nih an thanh. “Zahan zaan lawng ah thah a tong mi minung 4 an um. Sagaing ah pakhat, Myinkin ah pakhat, Thicheih ah pahnih an si,” tiah tualchung mibawmchantu pakhat nih a chim. July 12 chun Sml 2 hrawng ah phungki sianginn in a kir mi NTT sehzung i rianṭuantu 3 cu Shwe Min Won Sagin(ရွှေမင်းဝံစကျင်) lam ah meithal
kah an tong i, pakhat cu a hmun ah a thi colh, tiah theih a si. July 12 ṭhiam zaanlei
Sml 5 hrawng ah Thicheih (ထီးချိုင့်) peng Kunbaung(ကွမ်းဘောင်) khuakomh,
Hlehmi(လှယ်မှီး) khua ah U Than Sein(ဦးသန်းစိန်) le U Kyaw Sein(ဦးကျော်စိန်) zong phungki sianginn in an kir i, inn an phak ah mibu pakhat nih an thah hna. Cu hna pahnih thah an tonnak aruang cu Hlehmi khua cachimtu nu 2 tlaih an ton ruangah a si lai, tiah mi cheukhat nih an chim.
Kalay pengkomh Myinkin(မင်းကင်း) peng Moukkataw(မောက္ကတော်) khua ah Daw Myo Myo San (ဒေါ်မျိုးမျိုးစိန်း) zong Myinkin khuapi a kal lei Anhsaya(အံစရာ) khua ah thah a tong. Hi mithah lainawnnak kong he pehtlai in thahnawn a cannak pengchung palek hna nih hlathlainak an tuah lio, tiah theih a si.