Russia nih Ukraine a tuk mi cu caan saupi a rau cang caah Russia nih ralkap le hriamnam a sung mi a tam tuk cang tiah news tampi nih an chim tawn. New zumtlak ngai mi pakhat, NewsWick nih a langter ning ahcun, Russia nih Ukraine a tuknak ah ralkap le hriamnam a sung mi a tam tuk cang i, atu dirhmun in cun, Russia nih Ukraine a doh hlei ah ramdang tuk than ding ahcun Russia nih thaazang a ngei ti lo tiin a langter.
Report nih a langter ning ahcun, Russia nih Ukraine a tuknak ah Tank a sung mi
dihlak hi Russia hriamnam sertu pawl nih kumhnih chung an rak serh mi nak in tamdeuh
an sung cang tiin report ah a langter. Cun, Aircraft support kumkhat chungah a ser kho mi zat leng Rusia nih a sung cang. Russia nih kum tampi missile a rak ser cangmi cu Russia nih Ukraine a tuknak ah a hmang cang tiin report nih a langter. Bellingcat-a research website nih a langter ning ahcun Russia nih missile a ngei mi zat 70% cu a sung cang tiin a langter.
Oryx website, idohnak ah hriamnam a rawk mi le an sung mi hlethlainak a tuah
tawn tu nih a langter ning ahcun, Russian military hriamnam pawl, Ukraine ralkap
pawl nih an hrawh piak mi dihlak 3,222 a lak khawm cang. Mah bantuk in Russia dirhmun a si cang caah, ramdang doh than ding in Russia nih thaazang a ngei ti lo, Atu cu Russia caah i bohchan ding mi pakhat a um mi cu Nuclear lawng a si cang tiin report nih a langter. Cre-RTK
Kawlram thawngpang…SAC Ralkap Hramngan Kahnak In Hmawpung Khua Mi 2 An Nunnak A Liam!
Kachin ramkulh, Phakanh(ဖားကန့်) peng Lungkhin(လုံးခင်း) khuakomh, Hmawpung(မော်ပုံ) khua cu
May 3 zaan 7:45 ah SAC ralkap nih hriamngan in an kah thlorh caah kuan nih khua mi 2 a khen hna i, an nunnak a liam, tiah tualchung mi nih Yangon Khit Thit ah an chim. A thi mi hna cu U Yung Kui(ဉီးရုံးကွေ) kum 60 le U Maung Hto(ဉီးမောင်ထူး) kum 45 an si i, kuan nih a khen hna nak hmun ah an nunnak a liam colh, tiah theih a si. Kahdohnak um loin SAC ralkap nih hriamngan cu an duh ning poh in an kah,
tiah an chim. Tuzing May 4 zinglei zong ah hriamngan lung 2 an kah, Hriamngan kuan cu
lungkhat a puak i, lungkhat tu cu puak lo, tiah tualchung mi nih an chim.
=Falam Peng, Ramthlo Khua Inn 10 SAC Ralkap Nih An Khangh! Chin ramkulh, Falam peng Ramthlo khua Strawberry dum 2 telh in khuachung inn 10 cu nihin May 4, zinglei ah Hakha in a chuak mi SAC ralkap hna nih an khangh, tiah Ramthlo khua mi ralzaam pakhat nih a chim. “A voikhatnak ah Strawberry dumchung inn 2 a kaang.
Cu hnu ah kan khuachung ah an lut i inn 8 an khangh ṭhan. Zinglei ah cun kan khua
he meng 2 tluk aa hlatnak Tlangzaar khua an phan cang. ‘SAC ralkap Hakha in an i thawh’ ti kan theih
ah kan dihlak in ramlak ah kan zaam dih i, kan thilri zong ramlak ah kan chiah cang. Kum upa deuh cu Falam ah kan kalter hna,” tiah ralzaam dirhmun in um mi Ramthlo khua mi pakhat nih a chim. Ramthlo khua cu inn 180 hrawng umnak khua a si i, milu 800 tluk an um. SAC ralkap motor ruun cu May 2 ah Hakha in Falam lei ah an kal i, nizaan May 3 zaanlei ah CDF Hakha he an i kap. Cu hnu in nihin ah Hakha le Falam kar um Ramthlo khua cu an khangh hi a si, tiah tualchung mi hna sin in theih a si.