The Times of Israel, Jerusalem Post, The Gurdian le vawleicung news outlets dang dang nih an tial cang i, an tial ning ahcun, President Putin nih Israel PM Bennett sin ah ngaithiam a hal tiah an tial, Russia FM Lavrov nih Aldof Hitler cu Juda mi sinak he pehtlaihnak a ngei mi a si, Judah chungin a chuak mi a si tiah comments a tuah ruangah
President Putin nih Israel sin ah ngaithiam a hal mi hi a si. Putin nih President Isaac Herzog sin
ah “congratulate” ti in Israel Independent lawmpinak in ca a kuat. Putin catial ning,
Israel le Russia hoikom sinak le pehtlaihnak cu a thawn chin lengmang lai i, Israel le Russia cu i upat thiam i, Middle East ah himnak a um khonak ding caah heh tiah rian tuan ti i, mipi nih caah thiltha a chuahpi khonak ding caah hmailei kan kar chin lengmang lai tiah a chim. Cred-RTK
Kawlram thawngpang dang…SAC ralkap nih nawlngeihnak an laak hnu 2021,
February 1 in 2022, April 30 tiang, thla 15 chung ah mipi umnak inn 11,417 an khangh cang,
tiah Data for Myanmar nih an thanh. Uknak latu SAC ralkap hna nih tualchung hriamtlai phu hna cu an tei hna lo caah tualchung hriamtlai phu lei kap ah a dir mi mizapi inn le lo hna cu meikhangh in an hrawhpiak hna lengah sualnak ngei lo minung an tlaih hna i, an thiri zong an chuhpiak, firpiak hna.
Myanmar ramchung huap ah SAC ralkap hna nih mipi umnak inn le lo an khangh mi cazin
cu Data for Myanmar nih ṭha tein cazin laak i, a thanh. Internet hman khawh a si
lonak le phone line hman khawh a si lonak hmunhma ah thil sining tlamtling tein hlat awk a that lo caah atu ah langhter mi cazin nakin a tak ah a cang mi cu a tam deuh kho. April thla dongh le May thla thok ah SAC ralkap nih a hlei in Sagaing ramṭhen khuate hna ah pehzulh in inn le lo an khangh hna.
===SAC ralkap hruaitu Min Aung Hliang nih daihnak kong i ceihmai ding in tlangcung
hriamtlai phu hna a auhnak Nationwide Ceasefire Agreement(NCA) minsen thutnak ah
tlangcung hriamtlai phu 5 an i tel lai, tiah Peace Process Steering Team(PPST) sin in theih a si. Nihin May 6 ah PPST cu meeting an tuah hnu ah tlangcung hriamtlai phu 5 lawng nih SAC cu kan ton lai, tiah an fehter ti in meeting aa tel ve mi pakhat nih a chim. Arakan State Liberation Party (ALP), The Karen Army for Democracy (DKBA), Karen National Union/Karen National Liberation Army (Peace Council (KNU / KNLAPC)),
Pa-O National Liberation Organization (PLO) le New Mon State Party (NMSP) hna cu
Naypyitaw ah SAC tong ding in an kal lai, tiah an chim. “All Burma Students Democratic Front(ABSDF) cu Central Committee meeting tuah a hau rih. Cucaah kan ruahnak kan chim kho rih lo. Lahu Democratic Union (LDU) cu tulio anmah chunglei ah tuah ding tete le harnak tlawmpal a um pah caah meeting kai
ding in timtuahnak an ngei kho rih lo, tiah kan ruah. CNF zong tulio sining kong ah an kai kho rih lai lo,
tiah kan ruahpiak hna,” ti in PPST chimnak nawlngeitu Colonel Saw Kyaw Ngunh nih a chim. A luancia April 22 ah SAC Chairman nih rampum daihnak caah tlangcung hriamtlai kip hruaitu hna he tonbiaruahnak kan ngei lai, tiah a rak chim. SAC ralkap hruaitu sawmnak cu thazaang a ṭhawng mi hriamtlai phu hna a si mi Karen National Union (KNU); Chin National Front (CNF) and Kachin Independence Army (KIA) hna nih cun an hnawn. Cre-TCP