SAC nih uknak caan thla 6 a sauh chap. qPhunghram chung ah aa tel mi Article 425 ning in rampi cu uknak caan cu thla 6 sauh chap siseh tiah January 31 ah an tuah mi National Defense and Security Council meeting ah SAC nih bia an chah.
Cu meeting ahcun Article 419 ning in SAC chairman Gen. Min Aung Hliang cu uknak nawl sang bik pek rih siseh tiah bia an chah fawn.
National Defense and Security Council meeting ah SAC rianṭuannak kong, CRPH kong, NUG le PDF an rianṭuannak pawl kong kha Gen. Min Aung Hliang nih a chimphuan i atulio caan hi ningkhel a si rih lo tiah an ceihhmai.
Meeting ah CRPH, NUG le PDF hi miṭha lo phu an si tiah an chim i thahnawnnak, kahdohnak le hriamtlaih in hramhram in thil an tuah tiah an puh hna.
Uknak caan hi thla 6 in voi 2 chap a si ko nain thimnak a tlamtlin khawh nak hnga a bau rih mi, a dik mi vote cazin le himnak kong kha hrambunh in SAC hruaitu nih a chimphuan hnu ah thla 6 sauh chap ding in a hal.Atu bantuk in thla 6 caan sauh mi hi phunghram he aa tlak tiah upadi zung nih an cohlan tiah SAC ngeih mi MRTV zong nih a chim.Crd.The Chin Post
Relchap>>>SAC ralkap hriamngan ruang ah Mindat peng hngakchia 3 le nu 1 an i hliam. Chin ramkulh, Mindat peng, Ung khua ah January 31 zaanlei sml 3:45 hrawng ah SAC ralkap nih an kah mi hriamngan a puah caah hngakchia 3 le nu 1 fak ngai in an i hliam tiah theih a si.
Mindat khuachung hrambunh Infantry 274 nih an kah mi hriamngan cu Ung khua siidawr pawng ah a puak i kum 14 tang hngakchia 3 le kum 42 nu 1 an i hliam tiah Mindat peng mipi uknak phu nih an thanh.
SAC ralkap hriamngan ruang ah kum 42 nu 1 a phei 2 aa hliam, kum 14 hngakchia nu a kehlei ban kuan nih a khen, kum 12 hngakchia nu pakhat a kehlei kut fak ngai in aa hliam tiah an thanh.Cun khuachung siidawr, Jeep 1, mipi inn 1 hriamngan nih a khen i a rawk tiah thawng theih a si.Crd.The Chin Post