Ralhrang ralkap an sual chin lengmang cang ko, Tu lio kan kawlram kong hei ruat ah cun lung a mit tak tak ko. Kumhnih a si dengmang cang, Natein thawngpang tha lei thei dingmi a um lo. Siang ngakchia hrim hrim hna hi zaangfah an si. Covid ruangah caan saupi siang an kai kho ti lo hnuah kawlram a vun buai than tikah, caan saupi siang inn an kai lo ahcun hmai lei caah a pawi chin
lengmang lai ti kha fiang tein thei a si. CDM ngakchia cachimtu Kaung for you education
an hotu bik zahan ah an tlaih tiah thawngpang thei a si. Mah lawng si lo in a tangah a tuanmi
cachim tu hna zong an tlaih thluamah hna tiah thei a si. Mah kongah NUG zong nih ralkap pawl thil tuah ning cu a diklo tukmi thil tuah ning a si tiah a soisel ve. Atu hi ralhrang ralkap nih CDM siang ngakchia nu le pa hna cu kawl i tlaih dingin tim tuahnak a ngei lio a si tiah thawngpang thei a si. Cred-Tahan News
Thawngpang dang…Khin-U peng ah SAC Ralkap Nih Helicopter 5 In Kahdohnak An Tuah!:
Sagaing ramṭhen Khin-U peng le Depeyin peng Ngawng Hlah, Ma Yan Kan, Yin Kyay le Nama khua
hna cu SAC ralkap nih helicopter in an kah hna caah mipi a thong reng lo cu ralzaam dirhmun an phan, tiah theih a si. Nihin July 14, chunhnu suimilam 1:40 luan in SAC ralkap nih Mi35 helicopter 5 hmang in cu khua hna cu an kah hna, tiah theih a si. “Ralzaam umhmun khuarnak lei zong an kah hna i, Depeyin
peng le Khin-U peng kar ah ummi khua hna cu an zaam dih,” tiah NgawngHlah khuami pakhat nih
a chim. Kahdohnak ruangah thil a rawkralmi tampi a um lai nain thil sining fiang tein theih
khawh a si rih lo,” tiah tualchung mi nih an chim. Nihin July 14, zinglei suimilam 4:00 ah Yee-U in a chuakmi SAC ralkap hna cu Yee-U le Khin-U lampi ah Yee-U tualchung hriamtlai phufonh le Khin-U hriamtlai phu nih bomb an puahhnawh hna caah SAC ralkap 8 an thi, tiah theih a si.
==Watlet Peng Ah Cozah Rianṭuantu 7 Nih CDM An Tuah!: Sagaing ramṭhen Watlet peng ah a
luancia zarhhnih chung ahkhan Education department le uknak lei rianṭuantu minung 7 nih
CDM an tuah, tiah Watlet peng tualchung hriamtlai phu le mizapi uknak lei rianṭuantu phu nih an chim. SAC ralkap kuttang um Cozah rianṭuantu hna nih cun CDM an tuahnak kong cu Watlet peng tualchung hriantlai phu sin ah thawng theihternak an tuah tiah mizapi uknak lei phu chungtel pakhat nih a chim. Watlet pengchung SAC kuttang um department in CDM cawlcanghnak tuah duh ruangah pehtlaihnak a
kan tuahmi an um, tiah a chimchap. Watlet peng fimcawnnak zung rianṭuantu 1800 hrawng chung
ah minung 1400 leng nih CDM an tuah cang, tiah Watlet peng fimcawnnak zung rianṭuantu phu nih an chim.
==Sagaing ramțhen Ayyadaw peng Sentalay khua cu SAC rallap le pyosawti nih an kkhangh i 70 leng a ciam tiah tualchung thawngzamh nih a langhter.Nizaan, July 13 zinglei Sml 10 tluk ah SAC ralkap le pyosawtee nih khua cu hriamngan in an kah i khuami an zaam. Khua a khangtu hna ah hin Ngoidwin
khua le Talayba khuami pyosawtee pawl zong an i tel ve tiah theih a si.
Inn an khangh ruang ah Sentalay khua luhnak kehlei kap inn in aa thok i inn 50 tluk a ciam,
a dih lak inn 70 fai aa kaang tiah Ayadaw Post nih a langhter. SAC ralkap nih a luancia July 8 ah khan Ayadaw peng Nuamathin khua an rak luhhnawh i khua pawng ramlak ah ummi PDF sakhan pakhat an hrawh i PDF pakhat an thah. SAC ralkap hna khua an chuah tak hnu ah SAC ralkap thawng petu pakhat an fimtawl ve.
=Sagaing ramțhen , Inndaw peng ah SAC ralkap an tlaih mi hna civil 15 cu thlah loin a dang
minung 10 tu SAC ralkap nih an tlaih chap hna tiah theih a si. July 12 ah Kata peng Yazargyo tlang
in a arak țum mi SAC ralkap batallion 309 minung 100 tluk cu Inndaw peng khua hna an lut i misawhsawh 15 an tlaih hna i nihin tiang an thlah riah hna lo. Cu pin ah midang 10, Tanbo khua mi 7 Natmahohgyi khua mi 3 an tlaih chap hna tiah Inndaw PDF rian ngeitu pakhat nih a chim.
July 12 ah an tlaih mi hna minung 15 cu Kuasetkhua, Kyintaw, Na Naung, Kyaw le
Nakha khua mi an si hna i ralkap uniform an hruk ter hna tiah theih a si. A dang 10 an tlaih hna mi cu an hruk ter ve hna maw? ti cu hlat hlai lio a si. Ni 2 chung ah an tlaih mi hna hi minung 25 an si cang. Lothlo le lei a thuang mi an tlaih hna mi a si i a cheu cu ram lak ah mehhaang an zalhnak ah tlaih mi hna a si tiah theih a si. Cre-TCP