Republican pawl tam deuh nih Politico/Morning Consult poll ah kum 2024 ah former president Donald Trump cu President a cuh than ahcun kan vote lai tiin Trump an duh ning an langter. Polls ah biahalnak an tuah mi cu “Nihin ah kum 2024 ah, Republican lei in Presidential candidate ding mi thimnak um seh a ho na duh bik mi a si ti a si. Republican chung, minung 54% nih Trump hi Presidential candidate
caah ka vote lai tiah an ti. A pahnihnak caah Florida Gov. Ron DeSantis a si. Natein Trump nih ceilak
in a tei. Gov. Ron DeSantis cu minung 14% lawng nih an duh. A pathumnak cu former president Mike Pence a si.
Palinak cu former US ambassador to the UN Nikki Haley a si. Survey nih a langter ning ahcun, Atu hi Joe Biden nak in Trump a duh mi an tam deuh i, Trump nih 47 percent a hmuh lio ah Joe Biden nih 43 percent a hmuh ve. Joe Biden hi zeihman a si lo caah a tu hi a rating a chia ngai i, RealClearPolitics’ ahcun
Joe Biden a duh lo mi hi (Biden’s disapproval) 53.2 percent an si i, a duh mi hi 41 percent an si
Atu hi US ramchungah As man cu a niam kho lo i, mah lawng si lo in thil man dang zong a kai tuk
caah Joe Biden hi an zum lo tuk cang. Mah lawng si lo, tu lio ah Russia nih Ukraine a tuk mi kongah Joe Biden cu heh tiah soisel le thangchiait a si. Joe Biden nih a chim ningahcun, Russia cu sanction fakpi in kan phomh chi lengmang lai tiin a chim. Natein Russia nih zeiah a rel piak hna lo i, zei bantuk thil a cang lai ti zoh cuamah a si ko. Cred-Newsmax
Laitlang thawngpang.. Kawl Ralkap Tthing MDF (Mara) Hruaitu nih CDM Palik (CDF-Mara Ralkap) Meithal in a Kah.
Kawl ralkap a rak ttuan balmi Maraland Defense Force (MDF) ralkap haotu Pu Sipa nih CDM palik (CDF-Mara ralkap)
Mang Hrin (25) cu March 25 zaan sml. 9:00 hrawng ah Ngaphaite khua ah meithal in a kah i a nunnak a liam, tiah Ngaphate khua upa nih The Chin Journal ah a chim. “Meithal in a kaptu pa hi Kawl ralkap a rak ttuan tthingmi a si i atu MDF ah ralkap lei haotu a simi Pu Sipa a si. Kawl ralkap a rak ttuan lio ah bomb nih a kee ah a puah hnawh i pension in aa dinmi a si,” tiah a chim.
Pu Sipa nih CDF- Mara ralkap haotu pakhat zong a phei ah a kah ve caah hliamhma a pu. “Kan khua ah a
rak phanmi MDF ralkap hi minung 9 an si. Hriamtlai cio kan si tik ah kan khua an rat cun thawng na
kan thanh ta hmasa awk a si kan ti hna. Cu dih cun an hruaitu Pu Sipa nih kan khuabawi inn ah meithal a kan puah hnawh len,” tiah a cunglei upa nih a chim. March 25 zaan ah khua sianginn ah khuami, MDF le CDF-Mara biaruahnak an ngei hna i biaruahnak a dih hnu ah hi thil a can hi a si. “Tha tein biaruahnak ngeih ding kan ti caah kanmah
CDF-Mara lei cu meithal zong an i ken lo. Biaruahnak zong an tuah dih cang ko. MDF haotu Pu Sipa hi
tlaih i ttha tein chimhrin biaruah ding an ti. A meithal chuh an timh ah CDF-Mara haotu pa cu Pu Sipa nih a phei ah a kah. Cun, CDM palik a simi Mang Hrin nih a zuan hnawh i a kah ve. Mang Hrin cu a nunnak a liam. Cu dih cun meithal voi 60 hrawng a kan puah hnawh i an zaam,” tiah thil sining a chim. A nunnak a liammi Mang Hrin cu nihin
March 26 zaanlei sml. 4:00 hrawng ah an vui. Hi kong he pehtlai hin CDF-Mara nih CNF sin zong ah
thawng an thanh hna i, CNF lei zong nih thil sining ttha tein kan hlat lai an ti, tiah a cunglei upa nih
a chim chap. “Atulio thil sining cun MDF le CDF-Mara cu dirhmun aa ralkah tuk i biaruahnak tuah zong a har ngaingai cang lai. Hi thil a can hnu ah MDF upate lei zong in CDF-Mara sin ah pehtlaih i chawnhbiak le ngaihthiam halnak zong a um rih lo,” tiah a chim. MDF hi atulio ah thazang 60 hrawng an si lai tiah an zumh i AA sin ah raldoh a cawngmi an si.
SAC ralhrang nih Myanmar uknak an chuh hnu in zapi theih in a langmi hriamtlai an si nain
SAC ralhrang doh an tim lo, Mararam kong tu ah cawlcangh aa timmi an si, tiah MDF kong a theitu hna nih The Chin Journal ah an chim. Mizoram, Saiha khua ah hram a bunhmi “Mara Administrative Territorial Council” (Mara Hmunram Uknak lei Council) le MDF hi pehtlai in rian an ttuan, tiah Mara upa pakhat nih a chim. – The Chin Journal