Former President Donald Trump nih Republican pawl meeting an tuahnak PAC ah fiang ngaiin kum 2024 ah President a cuh than lai ti lei kap in a chim cang. PAC ah a chim ning ahcun, Kum 2024 ah a voihthumnak caah tiin a rak chim. Kum 2016 ah voihkhanak caah President a cuh i, Cun kum 2020 ah a voihhnihnak caah a cuh than i, cun kum 2024 ah a voihthumnak caah
President ka cuh than lai tiah a chim duhnak a si, A hlan bantuk an hmuh bal lo mi an hmuh cang lai,
voihhnih kan tuah cang i, a voihthumnak zong ah kan tuah than lai tiin a chim. Midterm Election ah
US mipi pawl nih Democrat pawl an kaltak cuahmah cang lai i, Democrat pawl doh ding in vote an tlak dih lai. A luancia ah khan election an rak fir cang. America caah a tha bik tuah ka duh, mah cu tuah ding in ka tim zungzal mi cu a si tiin a chim. Kan ram caah a dik mi le a hman mi ka tuah lai, Mah tikah cun thil sining vialte nan thei dih ko lai. Cre-Newsmax
Thawngpang dang…Russian President Vladimir Putin nih cun Europe le US in economic phihkhar a
tonnak kong ah Europe le nitlaklei ram hna cu faak ngai in a leh hna. Russia ram cu vawleicung ram
cheukhat hna ca ah cun hnahnawk taktak an si i, Ukraine he an buainak cu caan tha ah la riangmang in, rianrang in chawleh phihkharnak le ramdang he an i pehtlaihnak vialte cu chahpiak an ton colhnak kong a chim. A luancia kum riat in khan Ukraine nih cun anmah ramchung Donbass mizapi cung ah thahnawnnak a rak tuah ko nain thlanglei ram hna nih cun an hna an i cheh riangmang i phaisa le hraimthil tawrlecheng an kuat, tiah a chim fawn.
A luancia nithum chung ah Russia nih Ukrain a tuk caah Donbass(Russia nih Ukraine ramchung state
pakhat independent ram ah a cohlan mi) le Russia ramri hna ah cun daihnak a um than cang, nain
Europe le thlanglei ram hna nih i tiamrual in phihkahrnak faakpi in an tuah thiam rih, tiah a langhter fawn. President Putin nih cun, “Russia hi thlanglei ram hna tel loin tuanbia ah kan rak nun peng cang bantuk in atu zong thlanglei ram hna tel loin kan nung hrimhrim lai. Biahalnak a um mi cu, Russia tel loin thlanglei ram hna hi nan um taktak kho hnga maw? Kan hmuh zau lai cu! Kan i tong than te hna lai Europe! le USA.” tiah zeirel lo ngai in a zuamcawh hna.
Thawnpang kan hlat khawh tiang ah Ukraine khualipi pahnihnak kharkiev cu Russia nih an laak cang,
tiah theih a si. Hi lio ah Ukraine president thing Poroshenko chim ning ah Ukraine ralkap nih Russia
Vanlawng 20 leng an thlak cang i, Russia ralkap 3500 leng an thah cang hna, Raltuknak tank 100 leng an hrawh cang leng ah Hriamphor motor 1000 hrawng an hrawh cang fawn. Russia ralkap lei nih cun Ukraine khuapi pakhat Melitopol zong an laak cang, tiah an thanh ve. Russia lei nih cun Ukraine civil mi cung ah fahnak pek an tim hna lo i, an ralthuam chiahnak hmunpi hrawh lawng an i tim, tiah an langhter. Sinain UN lei nih cun Ukrainian civil mi 64 an thi cang, tiah an langhter.
UN Refugee agency nih an langhter ning ah- Poland ramiri ah Ukraine mipi 150,000 hrawng an i dor lio i,
atu dirhmun ah miung 360,000 hrawng nih an inn le lo chuahtak in ral an zaam lio, Kahdohnak hi a daih lo ahcun hinak in ralzaam an karh rih kho, tiah an langhter fawn. US Nih Ukraine $ 350 millions Bawmh: United States nih Ukraine raltuknak caah $350 millions a bawmh, hi bawmhnak hi President Biden nih Ukraine runvennak caah a rannak in $350 millions pek colh ding in a ka chimh,” tiah US Foreign Minister Blinken nih a chim. “Russia nih hruhru hranghrang in Ukraine a tuk cu Ukraine nih biatak tein ai kham ve i cu an i
khamnak ding caah ral bawmh bantuk in kan pekchanh hna hi a si,” tiah Foreign Minister Blinken nih a Twitter ah a ṭial.
Ukraine mipi nih an zalonnak le an nawlngeihnak cu ralṭha taktak in an dirpi i an kilven mi cung ah US zong Ukraine mipi he hmunkhat te ah kan dirṭi ti langhternak zong a si, tiah a langhter chih. Tutan bawmhnak an pek hi a voithumnak a si i a voikhatnak ah 60 millions, A voihnihnak ah 250 millions in kan rak bawmh hna, Nikum chung ahkhan 1 billion leng kan bawmh hna, tiah Cozah rianngei pakhat nih a chim.Cre-TCP