Tu lio Laitlang leh USA ah Thawngpang lar ngai mi le rel nuam tuk mi hna

USA um Salai Lairamthang nih tu lio Laitlang le USA ah thawngpang lartuk mi a ttial mi hna hi vun rel ve.

Ruah Chuk Cho le #Thawngpang Neknawi .. Tulio Facebook ah hmunhma a lai ngaimi cu Surbung vanlawng bual kong a si. Lai party ttanhmi pawl nih Lai party nih an chim ruangah an tuahmi a si an ti, USDP ttanhmi cheukhat nih USDP palai hna nih an rak chim ruangah an tuahmi a si an ti. NLD ttanhmi zong nih NLD palai hna nih an chim ruangah an tuahmi a si an ti ve.

Paletwa Amyotha hluttaw palai, U Hawi Tin cu AA kut in an thlah lio zongah Lai party cheukhat nih kanmah chim ruangah an thlahmi a si ti phun in an chim. Lai nuhrin covo phu cheukhat zong nih kanmah tawlrelnak in a chuakmi a si ti phun in an chim ve. U Hawi Tin chuahnak dingah aho poah an I zuam cio ko, asinain a taktak ahcun Mizoram Chief Minister Pu Zoromthang thawng in a chuakmi a si ko.

Laimi hi credit pek kan rak uarning a lang ngaingai. Surbung vanlawngbual cu mirangchan zongah an rak i zuam ko lai, Ne Win chan, Ralkap chan le Thein Sein chan tiang zong in an rak I zua ko lai. Chin party zong nih an I zuam I, USDP party zong nih an I zuam ve ko lai. Asinain a tuanchuah khotu taktak cu NLD cozah an si ko. Cu hmanh ah Vice President Henry Van Thio union cabinet meting tuah lio ah rak um hlah sehlaw tuan ah na lim kho lai lo. Caan saupi a rau rih lai. Mi zeipaoh nih I timhtuah le chunmang cu manh cio a si ko. Asinain tuanchuah le rian lim hi a biapi bikmi a si. Cu party ee, kha party ee, cu bu ee, kha bu ee an ti ding a si lo, credit pek tlak cu pek ding a si ko.

Joe Biden Caah Vice President Hodah Si Lai …Democrats in President a cuh dingmi Joe Biden i, vice president caah democrats party hruaitu hna nih minung an kawl lio a si. Atu tiang ah thim khawhmi an ngei rih lo. Asinain Vice President caah a min a lang bikmi minung 4 an hung chuak, an dihlak in nu lawngte an si. Cu hna cu, California Sen. Kamala Harris, Massachusetts Sen. Elizabeth Warren, Florida Rep. Val Demings le Atlanta Mayor Keisha Lance Bottoms hna an si. Mah chungah hin minak an thim lai tiah zumh bik a si. Joe Biden nih President ka cuh khawh ahcun vice president caah nu ka thim lai tiah tuante in a rak chim chung cangmi a si.

College Degree Nak-in Skill, A Ngeimi Rian Pek Ding… US cozah nih cozah riantuantu hna an laak tik ah an hmuhmi degree zoh in rian an pek tawn hna. Asinain tuchun ah President Donald Trump nih executive oder a chuah In, collage degree an hmumi nak in rian a thiammi kan laak deuh cang hna lai tiah a chim. Federal cozah nih rian a thiam rih lomi, college chuakmi le degree ngeimi an hlan tik hna ah rian tha tein a thiam lomi an tam deuh caah an duhning in rian an tei lo, cucaah rian thiam mi pawl papek in kan laak cang hna lai ti a si.

BLM Pawl Ni Abraham Lincoln Milem Hrawh An Timh … Minak a ttanhmi, Black Lives Matters pawl nih Washington D.C khuachung I a ummi, Abraham Lincoln milem cu naite ah hrawh an zalh i, National Guard pawl nih an kham manh hna. Tuzarh Friday ah hin hrawh ding in timh tuahnak an ngeimi an hngalh caah President Donald Trump nih national guard a auh hna I a conghter hna. US president hlun a simi, George Washington, Thomas Jefferson, Andrew Jackson le Teddy Roosevelt lungphun le milem pawl cu US state tam nawn ah an hrawh cang. President Donald Trump nih federal cozah tangah a ummi lungphun le milem a simi poah cu federal cozah nih kan venmi a si caah a hrawkmi poah cu kum 10 thong thlak ding in cacawn ni hnih ni ah khan a chim.

Coronavirus Second Wave…. Texas, Florida le Arizona ah Coronavirus a thar in karh tuk caah lockdown le kharnak an tuah than. Texas Governor Greg Abbott nih Zudawr, Bar vialte cu tuchun thawk in khar dingah nawl a chuah than cang. Cacawn nili nih ah Texas ah coronavirus zawtnak a ngei tharmi, 5996 an hmuh hna. Florida zongah a zaw tharmi minung 8942 an hmuh ve hna. Florida zongah zudawr vialte an khar than cang. Arizona ahcun lockdown an tuah than cang hna. Credit- Salai lairamthang

Note: Ka thawngpang (tadin) ttial a rel mi vialte cungah lunglawmnak tampi ka ngei. Ka thawngpang ttialmi nan kan rel piak ruangah keimah zong tangka ka hmuh ve i, chungkhar zong ka zohkhen kho ve hna. Nangmah nih thawngin chungkhar ka zohkhen khawh ve ti ka thei caah thawngpang a dik lo mi ttial ka duh lo i ka tim lo. Hoax/Rumor/Fake ti bantuk hi ttial ka tim lo.

Thawngpang ka rel mi le mi dang nih an ttial mi credit ka pek mi hna hi source a hman mi a si maw ti ka zoh hnuah mah hi cu a hman mi a si lai tiah ka ti mi hna hi ka miphun a si mi “Chinmi” caah ka ttial tawn i ka credit tawn. Natein vawlei cung cu tlamtlinglonak ram a si caah ralrin tein ka ttial zong ah Source ka lak mi ah a hman lo mi a um kho mi a si.

Source ka lak mi, a hman lo mi a um ti nan theih ah cun zeitik caan poah ka theihterh kho ulaw, cun keimah ca zong ah ralrinnak a ka pektuk a si hlei ah ka source kha thatein ka zoh nak ding a si lai caah le  thawngpang a hman mi le dik mi lawng ka thla peng khawhnak ding caah tiin zaangfah kan nih hal hna-Chingpage Editor