Russia he lentecelhnak hi dawngter cang u tiah a lungfak tuk cang caah Ukraine President Zelenskyy nih a chim cang. Ukraine president Volodymyr Zelenskyy nih western ram pawl hna cu Russia heh mah bantuk idohnak hmangin lentecelh nak nan tuahmi hi dongter cang ding in le Russia cu atu nak in fak deuh in dantat than ding in a nawl hna. Ukraine cu ramdang bohchantu ngei lo in a kal peng lai i,
zeibantuk fak in dah Ukraine nih an tuar lai ti cu mi zakip bia halnak a si cang tiin a chim.
Mah bantuk in Ukraine President nih a chimnak ruang cu; Russia ralkap pawl nih
Ukraine khawchak lei ah Sievierodonetsk le Lysychansk lak ding in heh tiah Ukraine an tuk lio ah, Russian oil cu Western pawl nih an cawk peng caah le European Union cu nihin tiang Russia Oil an cawkmi an dongter rih lo caah mah bantuk bia hi a chimmi a si. Zelenskyy hi nai hrawng ah Western ram pawl sin ah a lungtling lo ngai. Ukraine an tuk in thlathum hrawn a si hnuah, Russia nih Kyiv khualipi lak
ding in an nih timhmi cu an ngawl cang i, Donbas region-ah industrial hmun hma le building poimawh
pawl hna cu lak ding in atu hi cawlhcangnak an ngei than lio a si. “Ukraine ram hi zungzal in
independent state a si peng lai i, Aho hman nih an hrawh kho lai lo. bia halnak pakhat lawng a ummi cu; kan mipi nih hin zalawnnak hmuhnak ding caah nunnak zeizat an pek lai ti hi a si cang. Mah bantuk in raltuknak Russia nih a kalpi mi hi zeidah santlaihnak a ngei?,” tiin Zelenskyy nih a chim. “Vawleicung nih ramdang ah buainak a um tikah an tuanvo an lak ning bantuk in atu Ukraine-ah buainak a chuakmi hi tuanvo lak ve hna seh law atu
Russia nih Ukraine a tukmi hi cu phising a si cang lai tiah a lungfak bu he a chim. Zelenskyy nih EU rampawl hna cu,
Russia dantatnak kongah lungkhat tein rian an tuanti kho lo caah fakpi in a soisel hna i. Cre-RTK
Kawlram thawngpang le UN….Myanmar ram buainak le rammi bawmhchanhnak kong he pehtlai in Myanmar mizapi thinphannak le ramchung buainak hna daihter ding in forhfialnak cathanh cu UN Security Council nih an chuah nain Tuluk(China) le Russia nih an cohlang lo, tiah theih a si. Myanmar ram kong ah UN Security Council cu innka kharkhumh in tonbiaruahnak an ngei. ASEAN Special Representative for Myanmar, Prak Sokhonn le UN Special Envoy to Myanmar,
Noeleen Heyzer nih Myanmar ram buainak daihternak ding lam cu fianternak an tuah.
SAC ralkap nih biatak tein rammi a doh hna cu zeitluk in dah uknak nawl an ngeih timi an
langhternak a si pinah ramchung ral a si, tiah UN thiam sang hna nih an chim. British nih Myanmar ram kong biatung a dirhmi ah, buaibainak cu remdaihnak in a phi kawl ahcun a tlimtling ko lai. ASEAN nih hmaithlak in a ṭuan ding rian zong a langhter. Myanmar rammi himnak ca ah ton ding a simi phu poh he ton ding, ti mi kong hna aa tel. Cu pinah ASEAN Agreement cu a tak in ṭuanchuahmi a tlawm caah
thinphang a si i, Cucaah a tak i langhter ding in forhfialnak an tuah. Sihmanhsehlaw Tuluk le Russia nih
forhfialnak cathanh cu an cohlan lo caah UN Security Council nih cathanh an chuah kho ṭhan lo, tiah theih a si. Cre-TCP
==Non-CDM cozah rianṭuan hna cu a ra lai mi June 1 thok in Uniform tling he zung kai ding a si cang lai, tiah SAC ralkap nih a theihter hna. SAC ralkap kuttang zungkip cozah rianṭuan hna cu Uniform tling he zung kai ding in, May zarhhnihnak ahkhan anmah he a pehtlai mi zung uk nih an thanh chin hna. SAC ralkap nih Uniform tling he zung kai ṭhan ding in nawl an chuah caah cheukhat cu lunghring in am um i,
Uniform hruk in zung kai ding cu an cohlang kho lo, tiah Non-CDM cozah rianṭuan pakhat nih a chim.
Cupinah Uniform hruk in zung kainak ah SAC ralkap nih Security a kan lak piak khawh lo
ahcun kan nunnak ca ah ṭih a nung a si caah kan thinphang ko, tiah a chim. Atu hnu cun cozah rianṭuan hna cu zung rianherh i leng an chuah zong ah Uniform i hruk peng ding in SAC nih nawl an chuah fawn. SAC nih nawlngeihnak an laak hnu February thok in SAC zungkip cozah rianṭuan hna cu anmah siarem ning poh thilthuam i hruk-aih ding in nawl a rak chuah. Tamu Peng CDM Siangngakchia Hna Cu June Thla In Online In Ca An Cawng Lai: SAC ralkap kuttang sianginn ah kai aa tim lomi CDM siangngakchia ca ah
Tamu peng ah caan karlak cacawnnak cu Tamu Township Education Board Facebook Page in cawnnak an thok lai, tiah theih a si.
Caan karlak cacawnnak cu CDM siangngakchia hna nih anmah le inn cio (Home-based Learning) in zalong tein cawn khawh a si lai, tiah Tamu Township Education Board nih cathanh an chuah. Internet line a hmang kho lomi hna ca ah Memory Stick chung ah file in kan chiah lai i, sia rem tein an cawng kho lai. NUG cozah, Ministry Of Education nih Federal Education System in cawn dingmi hna cu video file chung ah siangngakchia hna nih fawi tein an cawn khawh dingah a chiah, tiah theih a si. Cre-TCP