Voih tampi meeting an tuah hnu zong ah zeihman thawngpang tha lei thei ding mi a um lo caah Ukraine cu Russia nih a thuat peng hna. Vasily Nebenzya, Russian representative to the UN – UN Security Council nih a chim mi cu mi tampi nih ruahphu tak tak a si an ti cang. Vasily nih a chim mi cu “Russia nih hin Ukrainetuk hi kan nih tim mi a si lo, caan saupi kan nghak cang. Donbas dainak le remnak kawl ding in kan rah. Vladimir Aleksandrovych [Zelenskyy] West pawl an nih tim mi hi tlamtling ter hla, Ukraine ram caah a tha ding mi biakhianak thatein tuah cang, West pawl nih hin Ukrainians mipi hna nih a dongh tian nan phan ding mi hi poi ah an chia lo. Bucha, Mariupol ah thil a cang mi vialte kha Ukrainian nationalistic radicals pawl nih an tuah mi hna si, tiin a chim. Cred-RTK
Kawlram thawngpang…Vanlawng- Helicopter le Jet Fighter he CDM a tuahmi poh USD sing 5 pek nan si lai i, raltuknak tank le raltuknak mawṭaw he CDM a tuahmi cu USD singkhat pek nan si lai, tiah NUG nih thanh. Hi NUG cozah nih order a chuah mi hi NUG Acting President Duwa La Shila nih April 7 ah minsen a thut. NUG nawlchuah ning ah cun, “Vanlawng, Helicopter, Jet Fighter he CDM a tuahtu cu USD Ting 5, Myanmar Ks. sing 10,000; Vanlawng, Helicopter le Jet Fihgter i dinhnak Airport a hrawk khotu poh cu pakhat hrawh man ah USD sing 3, Myanmar in Ks. Sing 6000 pek an si lai, tiah an thanh.
Vanlawng pakhat a zuan lio ah rawhter, asilole Mizapi umnak hmun ah bomb thla loin vanlawng rawk ding in a zuanlio ah thlak khawh a si ahcun vanlawng a thlatu cu USD sing 3 laksawng pek a si lai, tiah an thanh chih pinah Vanlawng thilri chiahnak kudawng a hrawk khotu cu USD sing 2 laksawng pek an si lai. Cun, tanglei raldohnak ah hman mi Tank le Mawṭaw pawl a hrawk khotu le CDM a tuahpi khotu cu USD singkhat pek an si lai. Hi thilri vialte hi Mizapi phaisa in cawkmi a si ko nain SAC nih mizapi thahnawnnak tu i an hman caah NUG nih SAC tuahsernak cu kan cohlang kho lo. Cucaah laksawng pek ding kan khiahmi hi a mibu/phu a silole pumpak zong in tuah khawh a si i, hi thil nan tuah ruang ah ‘The Public Property Protection Ac-1947’ ning in tazacuai le dantat nan si lai lo, tiah NUG nih a thanh.
==Nihin April 7, Paletwah pengchung ah CDF-Paletwah le Chin National Army(CNA) nih SAC ralkap umhmun khuarnak hmunhma cu an kah. Cu kahdohnak ah cun SAC ralkap pakhat a thi, tiah Mizapi vengtu ralkap CDF-Paletwah nih cathanh an chuah. CDF- Paletwah nih cathanh an chuah ning ah Paletwah peng Wading khua le Sawngwah khua karlak ah nihin April 7, zinglei suimilam 10:00 hrawng ah SAC ralkap nih umhmun an khuarnak cu CDF-Paletwah le CNA nih an kah hna i, kahdohnak minutes 30 tluk kahdohnak hrawng a chuak. Cu kahdohnak ah cun SAC ralkap 1 a thi i, hliamtuar an um le um lo fiang in theih a si rih lo. CDF-Paletwah le CNA lei hliamtuar um lo in hnu an tolh kho.
Yesagyo Peng Ah SAC Ralkap Bomb Voi 2 Puah Hnawh An Tong, 3 An Thi: Nihin April 7 ah Magwe ramṭhen, Yesagyo peng Yeley tikulh ah SAC ralkap motor 3 in a kal mi hna cu bomb voi 2 phuah hnawh an tong, tiah theih a si. Zinglei Sml 1 hrawng ah Pakhannge khua pawng ah voikhat, zing Sml 11tluk ah Zikune khua pawng ah voi khat tiin doh an tong i SAC ralkap 3 an thi tiah Yesagyo PDF chungtel Wai Gyi nih a chim. “A voikhatnak Pakhannge khua pawng ah kan puah hi zinglei Sml 1ah si i, SAC ralkap a thi mi fiang in kan thei lo. Zikune khua pawng ah zing Sml 11 ah a voihnihnak kan puah hnawh ṭhan hna i SAC ralkap 3 an thi,” tiah Wai Gyi nih cun a chim. April 4 zinglei ah khan SAC ralkap hna cu Pakhangyi khua in an chuah ah Yesagyo PDF nih bomb voihnih an puah hnawh hna i, minung 4 an thi, tiah Yesagyo PDF nih an thanh. Cre-TCP