Vawleicung thawngpang tih nung chin lengmang ko ee!! Ram pakhat le khat i tuk, i doh a that lo ning a lang chin lengmang cang. Russia le Ukraine buainak cu ni 16 leng si cang. Thawngpang tih nung mi kan thei chin lengmang cang. UN Security Council ah Russia nih Ukraine ah America Bio-Lab ah um tiah a puh ruangah US security Council meeting au a si.
Russian ambassador to the UN, Vasily Nebenzya nih Easter Europe hna tih nung tuk mi ralrinnak
a pek hna i, Atu Russia le Ukraine buainak kong nan nih thlak sual ah cun vawleicung rak
voihthumnak a chuak lai tiin a chim. ‘US & Ukarine nih biological weapons – migratory birds, bats insects hmang in tih nung tuk mi zawtnak an chuak ter kho. Ralrin chin chin hna u. Risk a sang tuk cang, radical nationalist groups Ukarine rian tuan mi hna a si tiin a chim. Cred-RTK
Thawngpang dang…Chin ramkulh Falam pengchung Rihkhuadar ah nihin March 12, zinglei ah SAC
ralkap umnak sakhan pakhat cu Chin mizapi vengtu ralkap CNDF nih an kah. Cu kahdohnak ah cun
SAC ralkap phu chungtel minung 3 an thi, tiah CNO/CNDF in chimphuannak nawlngeitu nih a chim. Nihin March 12, zinglei suimilam 6:00 hrawng ah India-Myanmar ramri Rihkhuadar no.2 sang ah um mi SAC ralkap sakhan cu CNDF nih an kah. “Zinglei suimilam 6:00 in no.2 sangchung ah a um mi SAC ralkap sakhan cu CNDF nih an kah hna. Cu kahdohnak ah cun SAC ralkap minung 3 an thi i,
kanmah lei hliamhma tuar le a thi mi an um lo,” tiah a chim. Cu kahdohnak cu suimilam 1 leng tluk an
rau i, zinglei suimilam 7:00 luan hrawng ah CNDF cu hnu an tolh ṭhan. Kaphnih kar kahdohnak kong
he pehtlai in SAC lei nih cathanh an chuah mi a um lo. Chin mizapi vengtu ralkap CNDF nih Rihkhuadar khuachung um mi no.2 sang SAC ralkap sakhan cu March 7 ah voikhat, March 5 ah voikhat ti in an rak kah cang hna. SAC ralkap hna le mizapi vengtu ralkap CNDF kar kahdohnak ruangah Rihkhuadar pengchung um minung 5000 hrawng cu India ramri lei
ah an tlizaam hna, tiah theih a si. Tuzing kahdohnak ruangah hin India ramchung Zokhuathar ah
SAC ralkap kuan a tla nain meithal kuan nih a hliamh mi an um lo, tiah theih a si.
= Karen National Union(KNU), Mutraw (Phapon) Pengkomh, Me Thasu Hlaw khua um SAC ralkap Khah-Lah-Yiah 97 cu Nizaan March 11 zing Sml 11:30 hrawng ah Karen National Liberation Army(KNLA ) Brigade 5 le Battalion ralkap phu hna nih an kah hna i, SAC ralkap 14 an thi; minung 16 a nung in an tlaih hna lengah meithal 19 le thilri dangdang zong tampi an laak khawh, tiah Kayin thawngzamhnak nih an thanh. A thi mi hna chung in Kawkareih hmunhma um Khah-Lah-Yiah 97 Battalion in an hruaitu
pakhat le ralbawi pakhat an i tel, tiah theih a si.Kahdohnak ngol a si hnu ah, SAC ralkap RPG-7 pahnih,
Machine gun pakhat, K3 Mawtraw pali, Sniper pahnih, MA-2 paruk, MA1 paruk, RPG kuan 6, 60 mm kuan nga, 79mm kuan nga, Kut cheh bomb pakhat, Luchin 24, Phone 15, Sniper kuan ruk, K3 kuan 2099, Nato machine kuan 567, Bomb 1, le phaisa 3,911,110Ks an laak khawh, tiah theih a si. Kahdohnak ah KNLA lei in minung 4 hliam an tuar i, SAC ralkap kuan nih mizapi a khen mi hna chung in minung 4 an nunnak a liam, tiah theih a si. Cre-TCP