Tu lio thawngpang, vawleicung ramkip nih kan buaipi ngai mi US le Russia buainak kongah China cu daitein a um dih ti lo, a vun holh ve cang. East le West tension hi thla 3 leng a si cang, Natein a buai chin lengmang ko. Daitein a um peng mi, ramdang nih zeibantuk a vun chim ve lai tiah an zoh peng mi China zong a vun holh ve cang. Zahan zan ah NATO le US nih Russia Security Demands ah lehnak an tuah hnuah,
Russia nih thlakhat hrawng thil sining zoh a tim. China a vun holh i, A bia chim mi cu US caah cohlan har tuk mi a si.
China nih US le NATO sin ah, Russia Security Demands hna cu US nih a ruahpiak i, thatein Russia duh
mi hi tlam a tling ter i, Cold War lungput/mentallity hlawn ding in US cu a vun phomh cawlh. China Foreign minister Wang Yi nih Secretary of State Antony Blinken cu, Aho poah nih Cold War mentality an hlawn awk a si, West pawl nih Russia security demands hi thatein nan ruat piak awk a si. Mah hnu lawngah, European security mechanism hi cabuai in daiter khawh a si lai. Russia nih West ram
pawl sin in Security Demands an tuah mi tampi cu lehnak an rak tuah rih lo tiin a chim, Natein cabuai ah
thatein cei than ding mi lam cu a um ko lai tiah ruachannak kan ngei tiin Russia nih a chim. Cre-RTK
Laitlang Thawngpang….. Ram pumpi Mizapi Silent Strike ah i tello ding in Hakha khuachung ah Nizan january 27 zanlei sml 3:00 hrawng ah ralhrang nih Motor he khua an hel i an au, tiah khua mi hna sin in kan theih. “Meithat motor cung ah Loud Speaker an chiah i, a biapi in CRPH, NUG pawl cu ralhrang phu an si,
Anmah he ai pehtlai mi CDF pawl zong hi ralhrang an si. Cun, Cozah thilri le ngeihchiah a tlakchiatnak
ding ah forhfialnak, hrocernak pawl Social media ah a lamkip in nan tuah ahcun ralhrang upadi in dantat
nan si pin ah nan inn zong chuh nan si lai, tiah an au pin ah cazual tete zong an phawt pah,” tiah khua mi pakhat nih a chim. Febuary 1 ah tuah ding mi ralhrang nih uknak an laak kumkhat tlinnak ni ah ram pumpi in ‘Silent Strike’ ah ai telmi cu pohmah-52(a) le pohmah-124(a) le pohmah-505(a) pin ah Cyber law pohmah 33(a) in tazacuai khawh nan si, tiah ralhrang nihcun Hakha khua mi cu an hro hna.
Kawlram thawngpang… Yangon Mino 7 Cu Bank Rok Case In Kum 10 Thong Thlak An Si Lai; S. Ohkalapah veng,
Yangon ah a um mi Kabar Yatana Bank tangka firnak kong he pehtlai in, tlaihmi mino 7 cu kum 10 cio
thong thlak ding ah Eastern Biaceihzung nih bia an khiah, tiah an sihni pa nih a chim. “Biaceih zung nih an chim ning ah cun tazacuai mi mino, an 7 ning in pohmah-395 in kum 10 thong thlak ding in nizan January 27 ah bia an khiah hi a si. Mino lawngte an si i upa cem hi kum 25 hrawng lawng asi rih,” tiah mino 7 hna i an sihni nih cun a chim. Kum 10 chung thong tla ding mi mino 7 hna cu
Taxi Driver Ko LinLin Htet, Ko Phyu Hein Kyaw, Ma Win Htet Ma @Ama, Ko Kyaw Zaw Lyin, Ko Thura Aung, KonWin Hteih KoKo le Ko Min Hein hna an si.
Hi 7 hna chung ah Ko Lin Lin Htet le Ko Phyu Hein Kyaw tel lo in a dang panga hna cu Bazinhnaung Kabar Yatana Bank luhhnawhnak case in Western District Biaceihzung ah Pohmah-395 in biaceih ṭhan an si rih lai. S. Ohkala Kabar Yatana Bank cu 2021 July 15 ah an luhhnawh i phaisa sing 185 mmk , Bazinhnaung Kabar Yatana bank zong 2021 August 30 ah an luhhnawh i sing 1179mmk an laak, tiah SAC ralkap nih an thanh.