Zoh ngam zong si lo, cutluk thil man fak cu!! Super power ram pakhat a si vemi zong tu lio cu thilman a kai tuk caah an buai ngai. Ramchung President a biapi ning fiang tein a lang chin lengmang. The Consumer Price Index nih a langter ning ahcun, Inn ah kan ei dingmi pawl rawl man cu a luancia thla nak in atu hi 1.4 percent in a kai than tiin a langter. A luancia kum he tahchun ah cun atu hi US ram chungah eidin awk thil man cu 11.9 percent in a kai cang i,
mah hi 1979 hnuah rawl eidin awk thil man a kai bik caan a phan tiah report nih a langter.
Cereals le bakery nih tuah mi hna cu 11.6 percent in a kai i, Sa lei kap, Ar, Cawmpei le a dang dang, nga,
arti hna cu 14.6 percent in a kai. Cawkhnuk an khon i thawhpat i an sermi lei kap hi 11.8 percent in a kai. Thingthei le tisik anhnah hna cu 8.6 percent in a kai. US ramchungah thil man a kai ning hi a fak tuk caah mi tampi nih an celh ti lo si lai, Social media ah Joe Biden soiselnak le thangchiatnak lawngte a si i, mi tampi nih Trump an rak thim lomi kha an nih ngaichih ning heh tiah an chim cang i, mah bantuk president santlaih lo tuk mi
US ram kum 4 a hruai than dingmi cu kan ruat ngam lo tiin heh tiah an lungfak ning an chim. Cre-Breitbart
Kawlram thawngpang..SAC ralkap nih nawlngeihnak an laak hnu in May 31, 2022 tiang ah
inn 18,886 an khangh cang, tiah Data For Myanmar nih an thanh. Ramchung hmun 435 ah Biaknak lei inn telh in, inn 18,886 cu khanghpiak an tong cang. Cheukhat hmunhram ah cun pehtlaihnak a chambau ruangah, atu langhtermi cazin nakin a tak ah a tam deuh kho, tiah ruah a si. SAC ralkap nih inn an khangh tamnak bik cu Sagaing ramṭhen ah a si i,
May thla tiang ah inn 13,840 an khangh cang. Magwe ramṭhen cu a pahnihnak a si i,
inn 3155 an khangh cang. SAC ralkap nih nikum May, 2021 khan inn khangh
hram an thawk i, tukum May tiang ah inn 18,886 an khangh manh. Kan hnu thla May, 2022 thlakhat chung lawng ah inn 7146 an khangh i, Sagaing ramṭhen chung lawng ah inn 6014 an khangh, tiah Data for Myanmar nih an thanh.
==India ram nih ASEAN ram hna he an i pehtlaihnak kum 30 a tlin philhlonak ah ti in ramdang
palai cio hna tonbiaruahnak ding caan cu June 16-17 ah inntek ṭuanvo lain caan an hmang lai
tiah theih a si. ASEAN-India ramdang Palai hna tonbiaruahnak ah cun SAC kuttang ramdang palai sawm ding le sawm lo ding kong ah ASEAN ram hna phung ning bantuk in a kal lai, tiah India ramdang ministry zung i biachimnak nawlngeitu Arindam Bagchi nih a chim. Myanmar ram ah ramkhel sining aa thlen hnu in ASEAN ram hna nih tonbiaruahnak an tuah tawn mi ah Myanmar in ramkhel lei he aa
pehtlai lomi minung lawng an sawm hna caah tutan ASEAN-India Summit zong
ah SAC an i tel lai lo. Cu tonbiaruahnak ahcun India ramdang Palai le Singapore ramdang
Palai hna nih chairman ṭuanvo an laak lai i, Singapore ramdang palai cu ASEAN chung in India ram he pehtlai in special palai zong a si fawn. ASEAN ram hna le India ram karlak ah a lamkip in i pehtlaihnak cu Kum 1992 December ah khan an rak dirh cang i, Kum 1995, Kum 2002 le Kum 2012 lio ah khan a biapi taktakmi tonbiaruahnak zong an rak ngei bal cang.
==Sittaung Mibawmchantu Motor Kah An Tong I, Minung Pakhat Nunnak A Liam!:
Kyaikhto peng Sittaung mibawmchantu motor(ambulance) pakhat cu kah an ton caah
mibawmchantu chungtel pakhat nunnak a liam i, pakhat nih hliam a tuar, tiah theih a si. Nizaan June 9, zaan suimilam 10:00 hrawng ahkhan Sittaung ah nam sawh a tongmi mizaw pakhat cu mibawmchantu motor, mizaw phorhnak in siizung ah kalpi a si i, an kir lei Ingabo khua pawng an phanh ah an motor cu kah an tong, tiah theih a si. “Motor chung ah cun motor khaltu le midang 2 an cuang i, siizung ah mizaw
an chiah i an kir lei ah kah an tong. Motor chung cuangmi pahnih cu kuan nih a hliamh hna
pakhat cu a paang ah hliam a pu i, pakhat cu a phei ah hliam a pu ve. Siizung an phak hlan lampi ah pakhat cu a nunnak liam,” tiah tualchung mibawmchantu pakhat nih a chim. Sittaung mibawmchantu phu hna cu Covid zawtnak a um thawk in atu tiang mibawmhchanh rian an ṭuan tiah theih a si. “Mi bawmchantu phu motor zong kah kan ton caah zaan ah bawmhnak halmi an um ahcun kan hnon cang lai, aho poh hi kan biapi dih, mizaw zong kanmah zong kan biapi dih,” tiah Kyaikhto khuami mi bawmchantu phu chungtel pakhat nih a chim. Mibawmchantu a kaptu hna hi hote an si theih a si rih lo.