Mi tampi nih mah le duh ning pei si ko cu, zeidah kan nih nuam ngaimi cu nan kan nahchuah ti lei kap in a chim mi tampi zong nan um kho men, mah ka tialmi hi hnachuah ruangah si lo in tu li kan ram thil sining he a pehtlaihmi a si caah tu a si. Ramleng ah ram le miphun caah kan thi lai maw kan dam lai ti kan ruat lio ah ramthumnak ah ummi le ramhnih nak ah ummi pawl nih nuam ngai in lentecelh nan
tuahnak nan vun langter tawnmi, picnic le rawl rei tinak nan vun langter tawnmi kan hmuh
tikah kan nih lawmpi tuk hna, na tein kan mah dirhmun kan hei zoh tikah, kan lung a nuam lo ngai.
Facebook ah heh tiah live nan thla, kan nih zoh peng hna, natein kan dirhmun kan zoh tikah mithli tlaknak lawngte a si. Aruang cu minung hi nuamtein khuasa a duhmi lawngte kan si, natein kan nih ram le miphun caah thi tiang in nun aa pe mi kan si, vawlei nuamnak tete hna hi kan duh ve, kan ram kan zoh, ngaihchia tuk a si fawn tikah, ramthumnak ah ummi pawl hna, nan thil tuah tikah, nangmah na nuamnak
lawng ruat lo in, ka thil tuahmi nih (Facebook ah live ka thlami nih) midang lungthing ah zeitluk in
dah rian a va tuan lai ti zoh bu tein facebook ah live kan thla tawnmi hna hi ralrin hna u sih tiin amthumnak ah ummi nan dihlak sin a h ka lung chungah ummi ka vun chim hna. Tu lio kan ram zoh tikah, mino tampi ramleng ah ram le miphun caah zeibantuk harnak le buainak kan tawn zong ah ram le miphun caah tiin nunnak pek tiang in an um.
Mah bantuk lio ah ramthumnak ah a ummi pawl hna facebook ah nan live tuahmi nih an lungthin a
thleng lai i, an lung a rawk sual lai ti kan phan tuk caah mah hi ka vun tialmi a si. Cred-Hniang Ceu
Kawlram thawngpang…KNU Brigade 3 Hmunram SAC Ralkap Nih Cawlcanghnak An Tuah Caah Sianginn 13 An Khar!: KNU-KhalayLui pengkomh brigade 3 hmunram Muu pengchung ah SAC ralkap nih cawlcanghnak an tuah caah sianginn 13 khar a si lengah siangngakchia le cachimtu zeimawzat
ralzaam dirhmun an phan, tiah KNU nih cathanh an chuah. July 2 in KNU hmunram Muu
pengchung ah SAC ralkap hna cu an luh caah SAC ralkap le KNLA brigade 3 kar kahdohnak
a chuak i, tualchung mi tampi cu ralzaam dirhmun an phan tiah theih a si. KNU-Muu pengchung khua 22 in sianginn hna cu khar an si i, sianghngakchia le cachimtu dihlak minung 600 hrawng cu ralzaam dirhmun an phan tiah an langhter chih.
=Thicheih Peng Ah Cachimtu Nu 2 Tlaih An Tong!: Sagaing ramṭhen, Kata pengkomh,
Thicheih peng Hlehme khua middle school cachimtu nu 2 cu July 3 ah tlaih an tong,
tiah siangngakchia nulepa hna sin in theih a si. Tlaih a tong mi cachimtu 2 cu Daw San San Ma le Daw Aye Aye Hlaing an si tiah theih a si. Cu kong he pehtlai in Thicheih peng khuabawi zung he naihniam in a um mi pakhat nih, “Hlehme khua middle school i cachimtu nu 2 tlaih an tong, cachimtu hna cu NUG nih a chuah mi curriculum ning in cachimtu an si i, SAC nih biaceihnak an ngeih hna lai,” Siangngakchia nulepa hna zong nih, “Sianginn ṭha tein an kan hunpiak kho ti lo i, ngakchia hna cu an kum nih a kalpi
hna hlan ah ca an cawn khawh a biapi tuk, sianginn a kan hunpiak lio zong ah kan
rak kaiter hna i atu zong hi cachimtu an um caah kan kaiter mi hna a si,” tiah an chim.
=Ye-U Traditional Hospital Ah Umhmun Khuarmi SAC ralkap Kah An Tong, 2 An Thi, 10 Hliam An Tuar: Sagaing ramṭhen Ye-U khuachung Traditional Hospital ah umhmun khuarmi SAC ralkap hna cu tualchung hriamtlai phu nih nihin July 4 ah an kah hna i cu kahdohnak ah cun SAC ralkap 2 an thih lengah ralbawi pakhat tel in minung 10 hliamhma an tuar, tiah SNAKE EYES LPDF nih an thanh. SAC ralkap umhmun an khuarnak hmun cu SNAKE EYES LPDF, Non Profit Soldiers Ye-U le City
Hunter(pah-kah-phah YeU) phufonh nih an kahdoh hna. SAC ralkap lei a thimi 2 ruak le
hliamhma tuarmi ralbawi pakhat cu chun hnu suimilam 3:20 ah helicopter in an thiar hna, tiah theih a si.
=Karenni Palek Nih Non-CDM Cachimtu 6 An Tlaih Mi Cu An Thlah Ṭhan Cang Hna: Kaya(Karenni) peng ah a luancia June 24 ah khan Karenni State Police (KSP) nih Non-CDM cachimtu (sayamah) 6 cu an rak tlaih hna i, thlah ṭhan an si cang tiah KSP nih nihin July 4 ah an thanh. Karenni ramkulh No. 5 palek camp hmunhma ah Karenni State Council Committee (KSCC) nawl lo in SAC nih an on mi
sianginn i ca an chimh ruangah KSP nih an tlaih hna i chekhlatnak an rak tuah.
Karenni ramkulh chung ah sianginn on duh ahcun KSCC pehtlaih dih in anmah lei nih nawl pek hnu lawng ah on khawh a si lai, ti zong KSP nih an langhter fawn. Karenni ramkulh chung ah ngakchia hna nih fimcawnnak ṭha tein an ngeih khawh nakhnga mizapi nih tuahmi sianginn ah le private sianginn zong ah cachimtu an herh i, a si khawh chung in kan bawm cio u tiah KSP nih theihternak an tuah. Cre-TcP