USA ah um Chimi ralrin a her lio te a si. Thawngpang a chia chin lengmang ko

US cu rian a tam thluamah tthan cang caah thawngpang tha ngai a si, natein rian a tam thluamah lio ah thawngpang chia thei ding mi zong a tam thluamah ve. Chinmi tampi cu tu lio hrawng cu beach kal ti an uar ngai. Mah bantuk in lengah chuak lengmang hi a him lo ngai mi pakhat a si. Beach ah in mi tampi a kalmi an um tawn caah ralrin tein inn ah um hi a tha bik

Atu hi US ram chungah coronavirus cu ceilak in a karh thluamah tthan cang. Dr.Fauci nih biahalnak ah a chimmi cu“ Atu ning in zawtnak control loin a karh lengmang than ahcun nikhat ah minung 100000 tluk in an kharh than kho tiah a chim.

Atu kan sining hi a dik lo, lamdang kan pial cang rua tiah a chim. State 16 cu an on hnu ah a thar in a karh than I, phih kharnak an tuah than. Atu lio hi nikhat ah zawtnak a ngei tharmi 40,000 lengmang an si. Tulio I a karh biknak state cu, Texas, Florida le Arizona ah a si.

Mah ti zawtnak a karhmi hi minak ttanhmi, Black Lives Matter pawl lam zawhnak, rili kam an onmi le state cheukhat an on than hnu ah ralrinnak a tlawn caah a si lai tiah an zumh.

Dallas county chungah tuni Covid-19 zawtnak in azawmi minung 572 an hmuh hoi hna. Cucaah minung 20,737 an zaw cang. Tuni a thimi pakhat telhin a thimi zate hi 353 a phan cang. Zawtnak a chekmi ah mah zatzat a zawmi a si hin cun amah le amah zawtnak nih a ka chawnh ti a thei lo le a chek lomi chungah zeitluk dah a tam lai ti cu Doctor degree ngahmi si lo zongah fawite in tuak khawh le ruah khawh asi ko.

Dallas biaceih bawi Jenkins nih mipi kiang um, innleng a si zongah hmaihuh hi 100 % bak in ihuh hram ulaw tiin nawlnak a tuah. Mah bantuk dirhmun tha lo lio ah rian ttuan mi zong nih ralrin tein um i, mask hmang peng ding. Cun lengah a her lo in chuak lo ding. Thawngpang tha ngai pakhat cu India nih Coronavirus sii cu August hramthawk hrawngah mipi sin ah hmang khawh ding in phawt a tim. Mah hi a tlamtling ah cun vawlei cung ramkip caah thawngpang tha tuk mi a si lai. Credit-India Times

Note: Ka thawngpang (tadin) ttial a rel mi vialte cungah lunglawmnak tampi ka ngei. Ka thawngpang ttialmi nan kan rel piak ruangah keimah zong tangka ka hmuh ve i, chungkhar zong ka zohkhen kho ve hna. Nangmah nih thawngin chungkhar ka zohkhen khawh ve ti ka thei caah thawngpang a dik lo mi ttial ka duh lo i ka tim lo. Hoax/Rumor/Fake ti bantuk hi ttial ka tim lo.

Thawngpang ka rel mi le mi dang nih an ttial mi credit ka pek mi hna hi source a hman mi a si maw ti ka zoh hnuah mah hi cu a hman mi a si lai tiah ka ti mi hna hi ka miphun a si mi “Chinmi” caah ka ttial tawn i ka credit tawn. Natein vawlei cung cu tlamtlinglonak ram a si caah ralrin tein ka ttial zong ah Source ka lak mi ah a hman lo mi a um kho mi a si.

Source ka lak mi, a hman lo mi a um ti nan theih ah cun zeitik caan poah ka theihterh kho ulaw, cun keimah ca zong ah ralrinnak a ka pektuk a si hlei ah ka source kha thatein ka zoh nak ding a si lai caah le  thawngpang a hman mi le dik mi lawng ka thla peng khawhnak ding caah tiin zaangfah kan nih hal hna-Chingpage Editor