USA Chinmi lakah thawngpang chia; Indianapolish ah um unau pahnih Coronavirus kan ngei tiah an nih phuan

USA ah Coronavirus zawtnak in chinmi USA DC area um mi, Tedim lei ka unau  Kum 38 mi nih mual a kan liam tak i, a chungkhar zong coronavirus an ngeih caah home quarantine in chia an si ti kan theih cang, USA ah coronavirus a ngei mi an tam tuk caah Chinmi lakah coronavirus test a tuah mi tampi an um ve cang i, chinmi unau pahnih Indianapolis ah um mi (An min langter kha a tha lo kan ti caah langter lo) cu coronavirus test an tuah hnuah coronavirus zawtnak an ngei ti thawngthei a si, mah thawngpang hi a hman mi a si maw si lo tiah Indianapolish ah um mi MSA Chairman Pu. Run Rem Lian nih a va chawn hna i, an unau pahnih in test kan tuah i coronavirus zawtnak kan ngei ti fiantein an chim. An unau pahnih in atu hi inn ah an nih zohkhen lio a si i tiin Pu. Run Rem Lian sin ah an chim. Source-CSM

Chinmi ralrin tein um peng ko hna u sih, a thimi an tam thluamah lio a si i, President zong nih ruahchannak tampi he thawngthannak a tuah ve ang. USA cu nikhat chungah a thimi an tam tak tak ko ee!! US mipi nawl an ngaih lo ning hi cu a mak tak tak, mah bantuk in a thimi an tam ko bu in lengah an chuak i, a cheu cu mask zong hmang duh loin an um ko.

Mah bantuk in thimi an tam lio ah Chinmi tampi cu rian an ttuan peng i, minung hi zeibantuk in rum ko hna hman u sih law, kan nunnak hi a dih ah cun tangka pawl hna cu zeihman a si lo. I ralrin chinhin han su si. USA cu zaangfah a si tak tak cang, a thimi an karh thluamah cang i, rian ttuantu pawl zawng mitthli he an um ko cang.

USA dirhmun hi a chia chinchin lengmang caah ralrin lo ah cun mah zawtnak hi fawitein chonh khawh a si caah i ralrin hi sii tha bik a si ko atu dirhmun ah cun US-ah COVID-19 zawtnak ruangah mi 34,641 an thi cang. A damlo mi hi 678,210 an phan cang. USA caah cun khuaci a mui tak tak. A tu dirhmun zoh ah cun mah zawtnak ruangah USA mipi a thi ding mi minung cu a tlawmbik ah 240000 hrawng cu an thi lai tiah zum a si.

Zahan suimilam 24 chung ah minung 4591 bak an thi tthan. Mah hi atu coronavirus zawtnak in nikhat ah a thi tambik record a si. President Trump nih a tu hi cu test tampi kan tuah cang i, case zong a tlawm thluamah cang caah May nikhat thawk in USA mipi nih rian thatein kan ttuan khawh cang lai tiah a chim

Note: Ka thawngpang (tadin) ttial a rel mi vialte cungah lunglawmnak tampi ka ngei. Ka thawngpang ttialmi nan kan rel piak ruangah keimah zong tangka ka hmuh ve i, chungkhar zong ka zohkhen kho ve hna. Nangmah nih thawngin chungkhar ka zohkhen khawh ve caah thawngpang a dik lo mi ttial ka duh lo. Hoax/Rumor/Fake ti bantuk hi ttial ka tim lo. English ka rel mi hi thatein source dang ka zoh hnuah mah hi cu a hman mi a si lai tiah ka ti mi hi hna hi ka miphun a si mi “Chin mi” caah ka ttial tawn. Natein vawlei cung cu tlamtlinglonak a si caah Source ka lak mi ah a hman lo mi a um ti nan theih ah cun zeitik caan poah ka theihterh ulaw keimah zong nih ralrinnak caah a si lai i cun thawngpang a hman mi le dik mi ka thla peng khawhnak ding caah tiin zaangfah kan nih hal hna-Chingpage Editor

Be the first to comment on "USA Chinmi lakah thawngpang chia; Indianapolish ah um unau pahnih Coronavirus kan ngei tiah an nih phuan"

Leave a comment

Your email address will not be published.


*