VP Henry Van Thio Paletwa a phan nak kong Minister Pu Soe Htet nih a chimh mi cu uar um bak ko

2010 kum hnu ah Myanmar ram Vice President Pu Henry Van Thio dahlo, khuallian deuh Paletwa an phanh bal lo ca ah Chinram chung ah thancho a nuar bik a si, tiah Chin Ramkulh Cozah Chimphuannak Nawlngeitu Sipin Minister Pu Soe Htet nih The Hakha Post ah a chim.

“Myanmar rampum huap in zoh tik ah Chinram hi sifak bik kan si. Cu chung hmanh ah Paletwa cu thancho a nuar bik Peng kan si. A ruang zoh tik ah cu hlan kha cu pehtlaihnak lamsuul a thatlo tuk ruang ah a si. Atu belte cu lamsuul zong a tha ko nain AA le Cozah ralkap kahdohnak ruang ah hmun himlo ah a cang i Myanmar ram in khuallian deuh, Pyidaungsu Minister level zong 2010 kum in nihin tiang ahohmanh an phan lo. Vice President Pu Henry Van Thio belte voi hnih a phan. Phundang in chim ahcun khuallian deuh nih phanh bal lonak hmun cu an harnak kha hngalhpiak le hmuhpiak an si lo tik ah thanchonak cu a khulnuar deuh hrimhrim ko,” tiah Minister Pu Soe Htet nih The Hakha Post ah a chim.

Paletwa khua hi ral ruang ah hmun dangdang ah peem le ralzaam in nihin tiang an um rih i Chinram ah thancho a nuar bik a si. 2020 Chin Miphun Ni zong Paletwa ah tuah ding a si nain ral ruang ah tuah ngam a si lo i 2021 kum tal ahcun Paletwa tuah ding in saduhthahnak an ngei, tiah kan theih.